» ព័ត៌មានអំពីធនាគារ » ហេតុការណ៍ និងតួលេខ » គណៈកម្មាធិការប្រតិបត្តិ

គណៈកម្មាធិការប្រតិបត្តិ

បណ្ឌិត អ៊ិន ចាន់នី
ប្រធាននាយកប្រតិបត្តិ

ជនជាតិខ្មែរ កើតក្នុងខែមិថុនា ឆ្នាំ១៩៦០ ។ បណ្ឌិត អ៊ិន ចាន់នី ជាប្រធាននាយកប្រតិបត្តិ របស់ធនាគារ អេស៊ីលីដា ភីអិលស៊ី ចាប់តាំងពីធនាគារបានបង្កើតឡើងនៅក្នុងឆ្នាំ២០០០ ។ លោកបណិ្ឌតបានចូលរួមក្នុងក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី នៅខែកញ្ញា ឆ្នាំ២០១៤ ។ បណ្ឌិត អ៊ិន ចាន់នី ជាសហស្ថាបនិករបស់សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា (អេស៊ីលីដា) តាំងពីខែមករា ឆ្នាំ១៩៩៣ ។ ក្នុងតួនាទីជាប្រធាននាយកប្រតិបត្តិ លោកបណ្ឌិតជាអ្នកដឹកនាំគណៈកម្មាធិការប្រតិបត្តិ ទទួលខុសត្រូវរៀបចំផែនការយុទ្ធសាស្ត្ររួម និងដំណើរការងារអាជីវកម្មប្រចាំថ្ងៃរបស់ធនាគារ អេស៊ីលីដា ភីអិលស៊ី និងបុត្រសម្ព័ន្ធ ព្រមទាំងប្រតិបត្តិផែនការអាជីវកម្ម ។ លោកបណ្ឌិតទទួលខុសត្រូវផ្ទាល់ចំពោះក្រុមប្រឹក្សាភិបាល ។

ទំនួលខុសត្រូវផ្សេងទៀតរបស់លោកបណ្ឌិត រួមមាន ជាប្រធានក្រុមប្រឹក្សាភិបាលធនាគារ អេស៊ីលីដា ឡាវ និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំងជាតំណាងភាគទុនិករបស់ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ីលីដា, និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។ លោកបណ្ឌិតក៏ជាប្រធានក្រុមប្រឹក្សាភិបាលរបស់អេស៊ីលីដា ហ្វាយណាន់ហ្សល់ ត្រាស់ ។

លោកបណ្ឌិតជាអ្នកតំណាងរបស់ធនាគារ អេស៊ីលីដា ភីអិលស៊ី ដែលជាសមាជិករបស់វេទិកាសេដ្ឋកិច្ចពិភពលោក ។

នៅក្នុងឆ្នាំ១៩៩៨ លោកបានបញ្ចប់វគ្គគ្រប់គ្រងស្តីពីស្ថាប័នហិរញ្ញវត្ថុសម្រាប់អភិវឌ្ឍន៍សហគ្រាសឯកជន (FIPED) ពីសាកលវិទ្យាល័យ Harvard សហរដ្ឋអាមេរិក ។ លោកបានបញ្ចប់ការសិក្សាថ្នាក់បណ្ឌិត ផ្នែកគ្រប់គ្រងអាជីវកម្ម និងបានបញ្ចប់ការសិក្សាពីវិទ្យាស្ថានអូស្ត្រាលីសម្រាប់អភិបាលក្រុមហ៊ុន (GAICD) ។

បណ្ឌិត សូ ផនណារី
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ

ជនជាតិខ្មែរ កើតក្នុងខែវិច្ឆិកា ឆ្នាំ១៩៦៣ ។ លោកស្រីបណ្ឌិតបានចូលបម្រើការនៅអេស៊ីលីដា ចាប់តាំងពីថ្ងៃទី១៨ ខែសីហា ឆ្នាំ១៩៩៣ ។

ក្នុងមុខតំណែងជា អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ លោកស្រីបណ្ឌិតក៏ជាសមាជិកាគណៈកម្មាធិការប្រតិបត្តិ ទទួលបន្ទុកដឹកនាំលើប្រតិបត្តិការរបស់ធនាគារ និងគ្រប់គ្រងនាយកដ្ឋានប្រតិបត្តិការ, នាយកដ្ឋានទីផ្សារ, នាយកដ្ឋានអភិវឌ្ឍន៍ផលិតផល, នាយកដ្ឋានសេវាឥណទាន និងហិរញ្ញប្បទានពាណិជ្ជកម្ម, និងនាយកដ្ឋានសេវាហិរញ្ញវត្ថុ ។ លោកស្រីបណ្ឌិតទទួលបន្ទុកគ្រប់គ្រងផែនការយុទ្ធសាស្ត្រ និងប្រតិបត្តិការអាជីវកម្មប្រចាំថ្ងៃរបស់ធនាគារ ដោយអភិវឌ្ឍន៍ និងស្រាវជ្រាវសេវាថ្មីៗរបស់ធនាគារ ព្រមទាំងធ្វើផែនការនិងអនុវត្តកំណើននៃការលក់ ។ លោកស្រីបណ្ឌិតទទួលខុសត្រូវទៅលើការដឹកនាំ ត្រួតពិនិត្យ និងវាយតម្លៃលើប្រតិបត្តិការអាជីវកម្មប្រចាំថ្ងៃរបស់ធនាគារ ។

លោកស្រីបណ្ឌិតជាប្រធានគណៈកម្មាធិការគ្រប់គ្រងផលប័ត្រ សមាជិកាគណៈកម្មាធិការគ្រប់គ្រងទ្រព្យសកម្ម និងអកម្ម គណៈកម្មាធិការកំណត់ថ្លៃផលិតផល និងសេវាកម្ម និងគណៈកម្មាធិការឥណទាននៃថ្នាក់គ្រប់គ្រង ។

លោកស្រីបណ្ឌិតទទួលខុសត្រូវចំពោះប្រធាននាយកប្រតិបត្តិ ។

លោកស្រីបានបញ្ចប់ថ្នាក់បណ្ឌិត ផ្នែកគ្រប់គ្រងធុរកិច្ច និងបានបញ្ចប់ការសិក្សាពីវិទ្យាស្ថានអូស្ត្រាលីសម្រាប់អភិបាលក្រុមហ៊ុន (GAICD) ។

លោកស្រី ម៉ារ អមរា
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិហិរញ្ញវត្ថុ

ជនជាតិខ្មែរ កើតក្នុងខែកញ្ញា ឆ្នាំ១៩៦៧ និងបានបម្រើការនៅអេស៊ីលីដា ចាប់តាំងពីខែមិថុនា ឆ្នាំ១៩៩៣ ។ ក្នុងមុខតំណែងជាអនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិហិរញ្ញវត្ថុ លោកស្រីក៏ជាសមាជិកាគណៈកម្មាធិការប្រតិបត្តិ ទទួលបន្ទុកគ្រប់គ្រងផែនការយុទ្ធសាស្ត្រ និងប្រតិបត្តិការអាជីវកម្មប្រចាំថ្ងៃរបស់ធនាគារ ព្រមទាំងប្រតិបត្តិផែនការអាជីវកម្ម ។ លោកស្រីជាប្រធានគណៈកម្មាធិការ Implementation & Conversion of IFRS (International Financial Reporting Standards), ជាប្រធានគណៈកម្មាធិការស្វ័យប្រវត្តិកម្ម និងការធ្វើទំនើបកម្ម, ជាសមាជិកាគណៈកម្មាធិការកំណត់ថៃ្លលើផលិតផល និងសេវាកម្ម, និងគណៈកម្មាធិការឥណទាននៃថ្នាក់គ្រប់គ្រង ។ លោកស្រីក៏ជាអ្នកដឹកនាំការងារ Basel Team ផងដែរ ។ លោកស្រីគ្រប់គ្រងលើនាយកដ្ឋានហិរញ្ញវត្ថុ, ការិយាល័យរៀបចំ និងត្រួតពិនិត្យផែនការថវិកា, ការិយាល័យគណនេយ្យគ្រប់គ្រង, និងការិយាល័យគ្រប់គ្រងការអនុវត្តហិរញ្ញវត្ថុ ។ លោកស្រីទទួលខុសត្រូវផ្ទាល់ចំពោះប្រធាននាយកប្រតិបត្តិ ។

ទំនួលខុសត្រូវផ្សេងទៀតរបស់លោកស្រីរួមមាន ៖ ជាប្រធានក្រុមប្រឹក្សាភិបាល អេស៊ីលីដា ស៊ីឃ្យួរឹធី ភីអិលស៊ី និងជាអនុប្រធាននៃអេស៊ីលីដា ហ្វាយណាន់ហ្សល ត្រាស់ ។

លោកស្រីបានបញ្ចប់វគ្គសិក្សាស្តីពីអភិបាលក្រុមហ៊ុន ពីវិទ្យាស្ថានអូស្ត្រាលីសម្រាប់អភិបាលក្រុមហ៊ុន (GAICD) ក្នុងឆ្នាំ២០១៨ និងបានទទួលបរិញ្ញាបត្រជាន់ខ្ពស់ ផ្នែកគ្រប់គ្រងអាជីវកម្ម ជំនាញហិរញ្ញវត្ថុនៅសាកលវិទ្យាល័យជាតិគ្រប់គ្រងក្នុងរាជធានីភ្នំពេញ ក្នុងឆ្នាំ២០០៦ និងបានបញ្ចប់បរិញ្ញាបត្រពាណិជ្ជសាស្ត្រ ជំនាញគ្រប់គ្រង ក្នុងឆ្នាំ២០០៣ ។ ក្រៅពីនោះនៅមានវគ្គសិក្សាជាច្រើន ដូចជា គណនេយ្យគ្រប់គ្រង គណនេយ្យហិរញ្ញវត្ថុ និងសវនកម្ម ជាដើម នៅសាកលវិទ្យាល័យ Regent ពីឆ្នាំ១៩៩៦ ដល់ឆ្នាំ១៩៩៨ នៅក្នុងរាជធានីភ្នំពេញ ។

លោក រ័ត្ន យូម៉េង
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិរតនាភិបាល

ជនជាតិខ្មែរ កើតក្នុងឆ្នាំ១៩៦២ ។ លោក រ័ត្ន យូម៉េង បានបម្រើការឱ្យអេស៊ីលីដា ចាប់ពីខែមករា ឆ្នាំ១៩៩៩ ។ ចាប់ពីខែមករា ឆ្នាំ១៩៩៩ ដល់ខែសីហា ឆ្នាំ២០០៨ លោកបានកាន់តំណែងជាច្រើនដូចជា ៖ ប្រធានគណនេយ្យករ និងអនុប្រធានហិរញ្ញវត្ថុ (ខែមករា ឆ្នាំ១៩៩៩ ដល់ខែឧសភា ឆ្នាំ២០០៧), នាយកនាយកដ្ឋានហិរញ្ញវត្ថុ (ខែមិថុនា ឆ្នាំ២០០៧ ដល់ខែសីហា ឆ្នាំ២០០៨) និងជានាយកប្រតិបត្តិរតនាភិបាល (ខែកញ្ញា ឆ្នាំ២០០៨ ដល់ខែឧសភា ឆ្នាំ២០១៥) និងជា អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិរតនាភិបាល (ខែមិថុនា ឆ្នាំ២០១៥ ដល់បច្ចុប្បន្ន) ។

លោកទទួលខុសត្រូវដឹកនាំក្រុមគ្រប់គ្រង និងត្រួតពិនិត្យរតនាភិបាល ដូចជា ៖ នាយកដ្ឋានប្រតិបត្តិការហិរញ្ញវត្ថុ ការិយាល័យរតនាភិបាល ការិយាល័យប្រាក់តម្កល់ និងអត្រាប្តូររូបិយប័ណ្ណ និងការិយាល័យរតនពាណិជ្ជកម្ម ។ លោកក៏ជាអ្នកគាំទ្រផ្នែកបច្ចេកទេសដល់ក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី ទាក់ទងនឹងការគ្រប់គ្រងមូលនិធិ ។

បន្ថែមពីនេះទៀត លោកក៏កាន់មុខតំណែងជាប្រធាន និងសមាជិករបស់គណៈកម្មាធិការជាច្រើននៅក្នុងធនាគារ អេស៊ីលីដា ដូចជា ៖ គណៈកម្មាធិការគ្រប់គ្រងទ្រព្យសកម្ម និងអកម្ម, គណៈកម្មាធិការកំណត់ថ្លៃលើផលិតផល និងសេវាកម្ម, គណៈកម្មាធិការធានារ៉ាប់រងមូលបត្រ, និងគណៈកម្មាធិការឥណទាន ។

ចាប់ពីឆ្នាំ២០០១ រហូតដល់ខែកញ្ញា ឆ្នាំ២០១៤ លោកក៏ជាអ្នកតំណាងភាគទុនិករបស់ក្រុមហ៊ុន អេ អេស អេ ដែលជាភាគទុនិកក្នុងស្រុកមួយរបស់ធនាគារ អេស៊ីលីដា ភីអិលស៊ី ។ នៅខែសីហា ឆ្នាំ២០១៤ លោកបានក្លាយជាសមាជិកក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី ។

លោកបានបញ្ចប់ថ្នាក់អនុបណ្ឌិតផ្នែកធនាគារ និងហិរញ្ញវត្ថុ ពីសាកលវិទ្យាល័យ វេស្ទើន នៅទីក្រុងភ្នំពេញ ។ ចាប់ពីឆ្នាំ១៩៩២ រហូតមកដល់ខែមីនា ឆ្នាំ១៩៩៦ និងបានបញ្ចប់ការសិក្សាពីវិទ្យាស្ថានអូស្ត្រាលីសម្រាប់អភិបាលក្រុមហ៊ុន (GAICD) ។

លោក លី ថៃ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិអភិបាលកិច្ច

ជនជាតិខ្មែរ កើតក្នុងខែតុលា ឆ្នាំ១៩៧៥ និងបានបម្រើការនៅអេស៊ីលីដា ចាប់តាំងពីខែធ្នូ ឆ្នាំ១៩៩៧ ។ លោកបានចូលបម្រើការជាមួយអេស៊ីលីដាក្នុងតួនាទីជា ៖ គណនេយ្យករ (១៩៩៧-១៩៩៩), សវនករផ្ទៃក្នុង (១៩៩៩-២០០០), បេឡាធិការ, នាយកសាខា នាយកការិយាល័យប្រតិបត្តិការ (២០០០-២០០៤), នាយកនាយកដ្ឋានប្រតិបត្តិការ (២០០៤-២០០៦), និងនាយកប្រតិបត្តិប្រតិបត្តិការ (២០០៦-២០១៦) ។

ក្នុងមុខតំណែងជាអនុប្រធាននាយកប្រតិបត្តិ និងជាគណៈប្រធាននាយកប្រតិបត្តិអភិបាលកិច្ច លោកក៏ជាសមាជិកគណៈកម្មាធិការប្រតិបត្តិ ទទួលបន្ទុកគ្រប់គ្រងផែនការយុទ្ធសាស្ត្រ និងប្រតិបត្តិការអាជីវកម្មប្រចាំថ្ងៃរបស់ធនាគារ ។ លោកទទួលបន្ទុកគ្រប់គ្រងនាយកដ្ឋានធនធានមនុស្ស, នាយកដ្ឋានរដ្ឋបាល, និងការិយាល័យគ្រប់គ្រងប្រព័ន្ធ SWIFT ។ លោកទទួលខុសត្រូវដោយផ្ទាល់ចំពោះប្រធាននាយកប្រតិបត្តិ ។

ទំនួលខុសត្រូវផ្សេងទៀតរបស់លោក ជាប្រធានក្រុមប្រឹក្សាភិបាលរបស់វិទ្យាស្ថាន ពាណិជ្ជសាស្ត្រ អេស៊ីលីដា ។

លោកបានទទួលបរិញ្ញាបត្រជាន់ខ្ពស់ ជំនាញហិរញ្ញវត្ថុ ពីសាកលវិទ្យាល័យបញ្ញាសាស្ត្រ ក្នុងឆ្នាំ២០០៨ ។

លោកស្រី ប៊ុត ប៊ុនសីហា
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិនីតិកម្ម និងលេខាធិការក្រុមហ៊ុន

ជនជាតិខ្មែរ កើតក្នុងខែសីហា ឆ្នាំ១៩៨០ និងបានបម្រើការនៅអេស៊ីលីដា ចាប់តាំងពីខែតុលា ឆ្នាំ២០០៧ ។

ក្នុងមុខតំណែងជាអនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិនីតិកម្ម និងលេខាធិការក្រុមហ៊ុន លោកស្រីក៏ជាសមាជិកាគណៈកម្មាធិការប្រតិបត្តិ ទទួលបន្ទុកគ្រប់គ្រងផែនការយុទ្ធសាស្ត្ររួម និងប្រតិបត្តិការអាជីវកម្មប្រចាំថ្ងៃរបស់ធនាគារ ដោយអនុលោមទៅតាមបទបញ្ញត្តិ ព្រមទាំងទំនាក់ទំនងជាមួយភាគទុនិក និងក្រុមប្រឹក្សាភិបាល ។ លោកស្រីទទួលបន្ទុកគ្រប់គ្រងលើ នាយកដ្ឋាននីតិកម្ម, នាយកដ្ឋានលេខាធិការក្រុមហ៊ុន និងបង្ហាញព័ត៌មាន, ការិយាល័យគ្រប់គ្រងវិវាទ, និង ការិយាល័យប្រឹក្សាបុត្រសម្ព័ន្ធ ។ លោកស្រីទទួលខុសត្រូវដោយផ្ទាល់ចំពោះប្រធាននាយកប្រតិបត្តិ ។

លោកស្រីទទួលបានបរិញ្ញាបត្រផ្នែកច្បាប់ក្នុងឆ្នាំ២០០៦ ។ បច្ចុប្បន្នលោកស្រីកំពុងសិក្សាថ្នាក់បរិញ្ញាបត្រភាសាអង់គ្លេស នៅសាកលវិទ្យាល័យ វេស្ទើន និងថ្នាក់បរិញ្ញាបត្រជាន់ខ្ពស់ផ្នែកច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ។

លោក ម៉ាច ធែរី
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិព័ត៌មានវិទ្យា

ជនជាតិខ្មែរ កើតក្នុងខែវិច្ឆិកា ឆ្នាំ១៩៦៥ ។ លោក ម៉ាច ធែរី បានបម្រើការងារឱ្យអង្គការ-ស្ថាប័នជាច្រើន ដូចជា ធនាគារ ANZ ក្នុងប្រទេសអូស្ត្រាលី, សាកលវិទ្យាល័យ Monash, UNHCR ប្រចាំប្រទេសកម្ពុជា, អង្គការទស្សនៈពិភពលោកកម្ពុជា, អង្គការពលកម្មអន្តរជាតិ, និងចុងក្រោយធ្វើជាទីប្រឹក្សាឱ្យអង្គការ អេស៊ីលីដា ។ លោកបានចូលបម្រើការពេញម៉ោងនៅធនាគារ អេស៊ីលីដា ក្នុងខែកក្កដា ឆ្នាំ២០០០ ។ លោក ម៉ាច ធែរី បានកាន់តំណែងជានាយកប្រតិបត្តិបច្ចេកវិជ្ជាព័ត៌មាន នៃធនាគារ អេស៊ីលីដា ភីអិលស៊ី ចាប់តាំងពីខែកក្កដា ឆ្នាំ២០០៦ ដល់ខែធ្នូ ឆ្នាំ២០១៧ ។ បន្ទាប់មកលោកក៏ត្រូវបានតែងតាំងជាអនុប្រធាននាយកប្រតិបត្តិ និងជាគណៈប្រធាននាយកប្រតិបត្តិព័ត៌មានវិទ្យា ។ លោកក៏ធ្វើជាប្រធានគណៈកម្មាធិការ IT Steering និងរាយការណ៍ជូនគណៈកម្មាធិការបច្ចេកវិទ្យាព័ត៌មាននៃក្រុមប្រឹក្សាភិបាល ។

លោកទទួលបានបរិញ្ញាបត្រផ្នែកវិទ្យាសាស្ត្រ ជំនាញវិទ្យាសាស្ត្រកុំព្យូទ័រនិងស្តិតិ ពីសាកលវិទ្យាល័យ Monash នៅប្រទេសអូស្រ្តាលី ក្នុងឆ្នាំ១៩៨៦ ។ បន្ទាប់មកលោកបានបន្តការសិក្សាផ្នែកប្រព័ន្ធអាជីវកម្ម (Business Systems) និងបានទទួលសញ្ញាបត្រ ក្នុងឆ្នាំ១៩៩០ ពីសាកលវិទ្យាល័យដដែលនោះ ។

បណ្ឌិត ឡឹង សុភាព
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិហានិភ័យ

ជនជាតិខ្មែរ កើតក្នុងខែមីនា ឆ្នាំ១៩៦៧ ។ បណ្ឌិត ឡឹង សុភាព បានបញ្ចប់ថ្នាក់បណ្ឌិតផ្នែកគ្រប់គ្រងពាណិជ្ជកម្ម ពីសាកលវិទ្យាល័យ Preston រាជធានីភ្នំពេញ ព្រះរាជាណាចក្រកម្ពុជា ក្នុងឆ្នាំ២០១២ ។ លោកបានចូលបម្រើការងារជាមួយ ធនាគារ អេស៊ីលីដា ភីអិលស៊ី ចាប់តាំងពីខែធ្នូ ឆ្នាំ១៩៩៧ ជាគណនេយ្យករ ។ ចាប់ពីពេលនោះមកលោកបានកាន់តំណែង និងតួនាទីផ្សេងៗជាច្រើននៅក្នុងធនាគារ ។ បច្ចុប្បន្ន ក្នុងតួនាទីជាអនុប្រធាននាយកប្រតិបត្តិ និងជាគណៈប្រធាននាយកប្រតិបត្តិហានិភ័យ លោកទទួលខុសត្រូវគ្រប់គ្រងហានិភ័យឥណទាន និងហានិភ័យផ្សេងៗទៀតរបស់ធនាគារទាំងមូល ។ លោកត្រូវបានតែងតាំងជាសមាជិកក្រុមប្រឹក្សាភិបាលរបស់អេស៊ីលីដា ស៊ីឃ្យួរឹធី ភីអិលស៊ី ចាប់តាំងពីខែកក្កដា ឆ្នាំ២០១៧ ។

គណៈកម្មាធិការ​ប្រតិបត្តិ

គណៈកម្មាធិការប្រតិបត្តិ