ENGLISH
navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextអាមេរិករំពឹងទុកថា កម្ពុជានឹងឈានដល់ប្រទេសមានចំណូលមធ្យមក្នុងពេលឆាប់ៗនេះ
អាមេរិករំពឹងទុកថា កម្ពុជានឹងឈានដល់ប្រទេសមានចំណូលមធ្យមក្នុងពេលឆាប់ៗនេះ
ថ្ងៃទី១៤ ខែកុម្ភៈ ឆ្នាំ២០១៦ | ប្រភព ៖ កម្ពុជាថ្មី
ភ្នំពេញ៖ តំណាងមន្រ្តីជាន់ខ្ពស់ឯកអគ្គរដ្ឋទូតសហរដ្ឋអាមេរិកបានថ្លែងថា តាមរយៈកាអភិវឌ្ឍប្រទេសជាតិ យ៉ាងឆាប់រហ័ស និងមានទំនាក់ទំនងផ្នែកពាណិជ្ជកម្មយ៉ាងល្អបែបនេះ កម្ពុជានឹងចាកចេញ LDC ឈានទៅរកប្រទេសដែលមានចំណូលមធ្យម ក្នុងពេលឆាប់ៗជាមិនខាន។
លោក William A.Heidt ឯកអគ្គរដ្ឋទូតសហរដ្ឋអាមេរិកថ្មី ប្រចាំនៅកម្ពុជា បានលើកឡើងក្នុងជំនួបពិភាក្សាការងារនៅទីស្តីការក្រសួងជាមួយលោកទេសរដ្ឋមន្រ្តី ឆាយ ថន រដ្ឋមន្ត្រីក្រសួងផែនការ នៅថ្ងៃទី១២ ខែកុម្ភៈ ឆ្នាំ២០១៦ ថា កម្ពុជាមានការរីកចម្រើនយ៉ាងខ្លាំងក្នុងវិស័យអប់រំសុខាភិបាល និងសន្តិសុខស្បៀង អភិវឌ្ឍន៍ សេដ្ឋកិច្ច ជាពិសេសលើផ្នែកពាណិជ្ជកម្ម ទេសចរណ៍ និងឧស្សាហកម្ម ដែលត្រូវចាត់ទុកជាវិស័យអាទិភាពមួយសម្រាប់កម្ពុជា។
លោកឯកអគ្គរដ្ឋទូត បានថ្លែងលើកឡើងបន្តទៀតថា បើសម្លឹងមើលក្នុងវិស័យវាយនភណ្ឌ ឧស្សាហកម្មកាត់ដេរ កម្ពុជាក៏មានការរីកចម្រើនយ៉ាងខ្លាំងផងដែរ ដែលធ្វើឲ្យផលិតផលនាំចេញពីរោងចក្រទៅកាន់សហរដ្ឋអាមេរិក គឺបានជាប់ក្នុងលំដាប់ថ្នាក់ហើយសម្រាប់ការផ្តល់ប្រាក់បៀវត្សរ៏ ក្នុងវិស័យឧស្សាហកម្មកាត់ដេរនេះវិញ ក៏មានការចំណាយជាង ២០០លានដុល្លារអាមេរិក ក្នុង១ខែផងដែរ ដែលជាទិន្នន័យបានបង្ហាញយ៉ាងច្បាស់អំពីការអភិវឌ្ឍយ៉ាងឆាប់រហ័ស អាចធ្វើឲ្យកម្ពុជាដើរចេញ LDC ទៅរកប្រទេសដែលមានចំណូលមធ្យម ក្នុងពេលឆាប់ៗ ដែលមានការប្រកួតប្រជែងយ៉ាងខ្លាំងដោយទាមទារការអភិវឌ្ឍខ្លួនប្រកបដោយភាពខ្លាំងខ្លាផងដែរ។
នៅក្នុងជំនួបនេះដែរ លោកទេសរដ្ឋមន្ត្រី ឆាយ ថន រដ្ឋមន្រ្តីក្រសួងផែនការ បានថ្លែងឲ្យដឹងផងដែរថា ក្នុងការអភិវឌ្ឍសេដ្ឋកិច្ចជាតិ គិតជាមធ្យម កម្ពុជារក្សាអត្រាសេដ្ឋកិច្ចចំណូល ក្នុងរង្វង់ ៧,៧% ក្នុងមួយឆ្នាំៗ ហើយបើគិតគ្រឹមឆ្នាំ២០១៣ មានអត្រា៧,៣% ឆ្នាំ២០១៤ មានអត្រា៧,១% និងឆ្នាំ២០១៥ កម្ពុជាសម្រេចបានអត្រា៧% ផងដែរ។ ក្នុងនោះសម្រាប់ចំណូលប្រជាពលរដ្ឋវិញ នៅក្នុងឆ្នាំ២០០៣ សម្រាប់ GDP ប្រជាជនម្នាក់ៗមានចំណូលត្រឹមតែ ២៨៣ដុល្លារប៉ុន្តែមកដល់ឆ្នាំ២០១៥ កំណើននេះកើនឡើងដល់ ១.២៤០ដុល្លារអាមេរិក ដែលកម្ពុជាក៏សង្ឃឹមផងដែរថា យើងនឹងអាចដើរចេញពីប្រទេស ដែលមានចំណូលមធ្យមកម្រិតទាប ឈានមករកប្រទេសដែលមានចំណូលមធ្យមជាមិនខាន៕