ENGLISH
navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextវិស័យសហគ្រាសធុនតូច និងមធ្យមទទួលបានចំណូល១៨០០លានដុល្លារពីវិស័យទេសចរណ៍
វិស័យសហគ្រាសធុនតូច និងមធ្យមទទួលបានចំណូល១៨០០លានដុល្លារពីវិស័យទេសចរណ៍
ថ្ងៃទី៥ ខែមីនា ឆ្នាំ២០១៦ | ប្រភព ៖ កម្ពុជាថ្មី
ភ្នំពេញ៖ វិស័យសហគ្រាសធុនតូច និងមធ្យមបានទទួលចំណូល១៨០០លានដុល្លារពីវិស័យទេសចរណ៍ ដោយសារមូលដ្ឋានផលិតកម្មក្នុងស្រុកកាន់តែត្រូវបានពង្រឹង ដោយកាត់បន្ថយលំហូរទំនិញពីបរទេស។
លោកឧកញ៉ា តែ តាំងប៉ ប្រធានសម្ពន្ធសមាគមសហគ្រាសធុនតូច និងមធ្យមកម្ពុជាបានថ្លែងឲ្យដឹងកាលពីពេលថ្មីៗនេះថា សហគ្រាសធុនតូច និងមធ្យមបានទទួលប្រាក់ពីវិស័យទេសចរណ៍ ប្រមាណ១៨០០ លានដុល្លារកាលពីឆ្នាំមុន ហេតុនេះទើបលោកបាន និងកំពុងពង្រឹងកិច្ចសហការជាមួយក្រសួងទេសចរណ៍ ដើម្បីពង្រីកការផ្សព្វផ្សាយ និងតាំងពិព័រណ៍ផលិតផលក្នុងស្រុកក្នុងព្រឹត្តិការណ៍នានា ដើម្បីជំរុញការលក់ និងលើកកម្ពស់ផលិតផលក្នុងស្រុក។
លោកបន្តថា កាលពីឆ្នាំ២០១៤កន្លងមកនេះ កម្ពុជាបានកាត់បន្ថយការនាំចូលទំនិញ៧ភាគរយពីប្រទេសថៃ ដែលមានទឹកប្រាក់ក្នុងរង្វង់២៣០លានដុល្លារអាមេរិក ដោយសារសហគ្រាសធុនតូច និងមធ្យមក្នុងស្រុកបានពង្រឹងគុណភាពផលិតផលរបស់ពួកគេ ដើម្បីវាយលុកទីផ្សារ តាមគោលនយោបាយចតុកោណរបស់រាជរដ្ឋាភិបាល គឺផ្តោតលើការពង្រឹងការផលិតទំនិញក្នុងស្រុក និងកាត់បន្ថយការនាំចូលទំនិញពីបរទេស។
លោកឧកញ៉ា តែ តាំងប៉ ក៏បានជំរុញឲ្យរដ្ឋាភិបាល ប្រើវិធានការសមស្រប ដើម្បីទប់លំហូរទំនិញពីប្រទេសជិតខាង បើទោះជាកម្ពុជាបានធ្វើសមាហរណកម្មសេដ្ឋកិច្ចជាមួយបណ្តាប្រទេសអាស៊ានក្តី ប៉ុន្តែការទប់លំហូរទំនិញជារឿងដែលគួរយកចិត្តទុកដាក់ ព្រោះរដ្ឋាភិបាលថៃបានផ្តល់ប្រាក់ ១០ លានដុល្លារដល់វិស័យឯកជន ដើម្បីពង្រីកលំហូរទំនិញមកកាន់កម្ពុជា តាមរយៈការតាំងពិព័រណ៍ផលិតផលនានា ជាការតាំងពិព័រណ៍លក់ទំនិញរយៈពេលយូរ ដែលបានសម្លាប់ដល់អាជីវករក្នុងស្រុក។
លោក អាង គីមអៀង ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា កម្ពុជាខ្វះសិប្បកម្មផលិតវត្ថុអនុស្សាវរីយ៍ក្នុងស្រុក ដែលគួរមានការវិនិយោគពី វិស័យឯកជន ដើម្បីបង្ហាញពីផលិតផលជាអត្តសញ្ញាណរបស់ខ្លួន ក៏ដូចជាចូលរួមលើកស្ទួយសេដ្ឋកិច្ច ព្រោះភ្ញៀវទេសចរទៅទស្សនានៅប្រទេសណាមួយ ពួកគេចង់ទិញទំនិញផលិតនៅប្រទេសនោះ មិនមែនទិញទំនិញនាំចូលមកពីប្រទេសថៃ និងប្រទេសដទៃទៀតនោះទេ៕