ENGLISH
navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextទំហំពាណិជ្ជកម្មរវាង អាស៊ាន និងសហគមន៍អឺរ៉ុប មានទឹកប្រាក់២០១ពាន់លានយូរ៉ូកើន១១ ភាគរយ
ទំហំពាណិជ្ជកម្មរវាង អាស៊ាន និងសហគមន៍អឺរ៉ុប មានទឹកប្រាក់២០១ពាន់លានយូរ៉ូកើន១១ ភាគរយ
ថ្ងៃទី៥ ខែមីនា ឆ្នាំ២០១៦ | ប្រភព ៖ កម្ពុជាថ្មី
ភ្នំពេញ៖ ទំហំពាណិជ្ជកម្មរវាងអាស៊ាន និងសហគមន៍អឺរ៉ុប មានទឹកប្រាក់សរុប ២០១ ពាន់លានយូរ៉ូ កើនឡើង ១១ ភាគរយ បើប្រៀបធៀបកាលពីឆ្នាំមុន។ នេះបើយោងតាមតាមសេចក្ដីប្រកាសក្រោយកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងស្នងការពាណិជ្ជកម្មសហគមន៍អឺរ៉ុប លើកទី១៤ នៅទីក្រុងឈៀងម៉ៃ ប្រទេសថៃកាលពីថ្ងៃទី៣ ខែមីនា។
លោកស៊ុន ចាន់ថុល រដ្ឋមន្ត្រី ពាណិជ្ជកម្ម និងជារដ្ឋមន្ត្រីសេដ្ឋកិច្ចអាស៊ានសម្រាប់កម្ពុជា បានចូលរួមកិច្ចពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន និងស្នងការពាណិជ្ជកម្មសហគមន៍អឺរ៉ុប លើកទី ១៤ នៅទីក្រុងឈៀងម៉ៃ ប្រទេសថៃបានមានប្រសាសន៍ឲ្យដឹងថា កិច្ចពិគ្រោះយោបល់ សហដឹកនាំដោយលោកស្រី Khemmani Pholsena រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវ និងលោកស្រីCecilia Malmström ស្នងការពាណិជ្ជកម្មសហគមន៍អឺរ៉ុប។
លោកបន្ថែមថា យោងតាមសេចក្ដីប្រកាសក្រោយកិច្ចប្រជុំបានឲ្យដឹងថា៖”នៅឆ្នាំ ២០១៥ ទំហំពាណិជ្ជកម្មរវាងអាស៊ាន និងសហគមន៍អឺរ៉ុប មានទឹកប្រាក់សរុប ២០១ ពាន់លានយូរ៉ូ កើនឡើង ១១ ភាគរយ ប្រៀបធៀបឆ្នាំមុន ដោយផ្អែកតាមស្ថិតិរបស់សហគមន៍អឺរ៉ុប។ នៅឆ្នាំ ២០១៤ លំហូរវិនិយោគផ្ទាល់ពីសហគមន៍អឺរ៉ុប បានកើនឡើង ៣១,៥ ភាគរយ ដែលមានទឹកប្រាក់សរុប ២៩,៣ ពាន់លានដុល្លារអាមេរិក ស្មើនឹង ២១,៥ ភាគរយ នៃលំហូរវិនិយោគផ្ទាល់សរុបទៅកាន់អាស៊ាន។
រដ្ឋមន្ត្រីសេដ្ឋកិច្ចអាស៊ាន និងស្នងការពាណិជ្ជកម្មសហគមន៍អឺរ៉ុប បានសន្យាលើទំនាក់ទំនងពាណិជ្ជកម្ម និងវិនិយោគដ៏រឹងមាំ រវាងតំបន់ទាំងពីរ។ សហគមន៍អឺរ៉ុប ជាដៃគូពាណិជ្ជកម្ម និងលំហូរវិនិយោគផ្ទាល់ធំលំដាប់ទី ២ របស់អាស៊ាន។ រដ្ឋមន្ត្រី និងស្នងការពាណិជ្ជកម្មសហគមន៍អឺរ៉ុបបានពិភាក្សាលើបញ្ហាមួយចំនួនពាក់ព័ន្ធការអនុវត្តកម្មវិធីការងារពាណិជ្ជកម្ម និងវិនិយោគអាស៊ាន-សហគមន៍អឺរ៉ុបឆ្នាំ២០១៥-២០១៦, លទ្ធផលការងារដែលបានអនុវត្តដោយអាស៊ាន និងសហគមន៍អ៊ឺរ៉ុបបូកសរុបរួមដោយឧត្តមមន្ត្រីសេដ្ឋកិច្ចអាស៊ាន និងសហគមន៍អឺរ៉ុប និងទិសដៅអនាគតនៃទំនាក់ទំនងអាស៊ាន-សហគមន៍អឺរ៉ុបរួមមានលទ្ធភាពនៃការបន្តការចរចាកិច្ចព្រមព្រៀងពាណិជ្ជកម្មសេរីអាស៊ាន-សហគមន៍អឺរ៉ុប។
ជាមួយគ្នានេះភាគីទាំងពីរបានផ្លាស់ប្តូរយោបល់គ្នាអំពីការអភិវឌ្ឍន៍សេដ្ឋកិច្ចក្នុងតំបន់និងពិភពលោកនាពេលថ្មីៗ និងបានបញ្ជាក់ឡើងវិញអំពីការប្តេជ្ញាចិត្តរបស់ខ្លួនដើម្បីពង្រឹងកិច្ចសហប្រតិបត្តិការសេដ្ឋកិច្ចរវាងតំបន់ទាំងពីរឲ្យកាន់តែកើនឡើងខ្លាំងថែមទៀត៕