navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextតំបន់សេដ្ឋកិច្ចពិសេសភ្នំពេញ មានក្រុមហ៊ុនអន្តរជាតិ ៧៦ក្រុមហ៊ុន កំពុងប្រតិបត្តិការ
តំបន់សេដ្ឋកិច្ចពិសេសភ្នំពេញ មានក្រុមហ៊ុនអន្តរជាតិ ៧៦ក្រុមហ៊ុន កំពុងប្រតិបត្តិការ
ថ្ងៃទី២១ ខែមេសា ឆ្នាំ២០១៦ | ប្រភព ៖ KHMER NEWS
ភ្នំពេញ៖ តំបន់សេដ្ឋកិច្ចពិសេសភ្នំពេញ (PPSEZ) ត្រូវបានបង្កើតឡើងនៅក្នុងឆ្នាំ២០០៦ ដោយលោកជំទាវ លីម ឈីវហូ ហើយក្រុមមួយនេះមាននិមិត្តរូបភាគហ៊ុន "PPSP" បានវិវត្តន៍ទៅជាតំបន់សេដ្ឋកិច្ចពិសេសនាំមុខគេនៅកម្ពុជានាពេលបច្ចុប្បន្ន ជាមួយផ្ទៃដីជាង ៣៥៧ហិកតា និងក្រុមហ៊ុនអន្តរជាតិ ៧៦ក្រុមហ៊ុន បាននិងកំពុងធ្វើការយ៉ាងសកម្ម នៅក្នុងតំបន់សេដ្ឋកិច្ចពិសេសនេះ។ សេចក្តីប្រកាសនេះបានធ្វើឡើងក្នុងកម្មវិធីបើកសម្ពោធ IPO របស់ក្រុមហ៊ុនភ្នំពេញ អេសអ៊ីហ្សិត កាលពីព្រឹកថ្ងៃទី២០ ខែមេសា ព្រឹកមិញនេះ។
អគ្គនាយកក្រុមហ៊ុន ភ្នំពេញ អេសអ៊ីហ្សិត លោកជំទាវ លីម ឈីវហូ បានមានប្រសាន៍ឱ្យដឹងថា៖ ខណៈពេលដែលការធ្វើសមាហរណកម្មអាស៊ានជិតមកដល់ ប្រទេសកម្ពុជានឹងក្លាយជាតំបន់សំខាន់សម្រាប់តភ្ជាប់នៅក្នុងមហាអនុតំបន់ទន្លេមេគង្គ។ ជាមួយនឹងការវិនិយោគនៅក្រុងប៉ោយប៉ែត ក្រុមហ៊ុនភ្នំពេញ អេសអ៊ីហ្សិត មានបំណងក្លាយជាផ្នែកមួយដ៏សំខាន់នៃតំណភ្ជាប់នេះ។ ម្យ៉ាងវិញទៀត ការចាប់ផ្តើម IPO នៅថ្ងៃនេះ ជាសញ្ញាសំខាន់នៃទំនុកចិត្តនៅក្នុងទីផ្សារសម្រាប់អាជីវកម្មរបស់យើង និងនៅពេលអនាគតរុងរឿងសម្រាប់ភ្នំពេញអេសអ៊ីហ្សិត សម្រាប់វិនិយោគរបស់យើង និងសម្រាប់ប្រទេសកម្ពុជា។
ជាមួយនឹងការវិនិយោគសរុបចំនួនប្រមាណ ៤៦០លានដុល្លារអាមេរិក ភ្នំពេញអេសអ៊ីហ្សិត បានផ្លាស់ប្តូរទិដ្ឋភាពនៃវិស័យឧស្សាហកម្មកម្ពុជា ហើយសួនឧស្សាហកម្មមួយនេះ ជាគន្លឹះសំខាន់ដើម្បីទាក់ទាញក្រុមហ៊ុនអន្តរជាតិបន្ថែមទៀត មកកម្ពុជា។
គួរជម្រាបថា ក្រុមហ៊ុនផលិត និងអ្នកវិនិយោគធំៗនៅក្នុងភ្នំពេញអេសអ៊ីហ្សិត មានដូចជា៖ Betagro, Coca-Cola, Dentso, Laurelton, Diamonds, Minebea និងក្រុមហ៊ុន តូយ៉ូតា ក្នុងចំណោមក្រុមហ៊ុនជាច្រើនទៀត។ បច្ចុប្បន្នសួនឧស្សាហកម្មនេះបានទាក់ទាញវិនិយោគិនចំនួន ៧៦ ហើយ ក្នុងនោះ ៤៣ ជាក្រុមហ៊ុនជប៉ុន ដែលជាវិនិយោគិនច្រើនជាងគេបង្អស់នៅក្នុងតំបន់ និងក្នុងចំណោមតំបន់សេដ្ឋកិច្ចពិសេស ៣៤ ផ្សេងទៀត ក្នុងប្រទេសកម្ពុជា និងជាគោលដៅនាំមុខគេរបស់វិនិយោគិនជប៉ុននៅក្នុងប្រទេសនេះផងដែរ៕