ENGLISH
navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextFacebook ចំណាយ $៦ ពាន់លានទិញហ៊ុនមកវិញ
Facebook ចំណាយ $៦ ពាន់លានទិញហ៊ុនមកវិញ
ថ្ងៃទី២១ ខែវិច្ឆិកា ឆ្នាំ២០១៦ | ប្រភព ៖ ឌឹភ្នំពេញប៉ុស្ត៍
សានហ្វ្រានស៊ីស្កូ៖ កាលពីថ្ងៃសុក្រ ក្រុមប្រឹក្សាភិបាលរបស់ក្រុមហ៊ុន Facebook បានឯកភាពអនុញ្ញាតឲ្យមានការចំណាយប្រាក់រហូតដល់ទៅ ៦ ពាន់លានដុល្លារដើម្បីទិញភាគហ៊ុនមកវិញរបស់ក្រុមហ៊ុនបណ្តាញសង្គមឈានមុខគេនេះ។
កម្មវិធីទិញភាគហ៊ុនមកវិញនេះនឹងចាប់ផ្តើមមានសុពលភាពនៅដើមឆ្នាំក្រោយ ដែលអាចនឹងអនុញ្ញាតឲ្យក្រុមហ៊ុន Facebook ទាញយកចំណេញពីការធ្លាក់ចុះតម្លៃដែលកើតមានឡើងនៅដើមខែនេះ ដោយសារតែមានការលេចឮថាកំណើនប្រាក់ចំណូលនឹងថយចុះ ព្រោះក្រុមហ៊ុនបានឈានដល់កម្រិតនៃចំនួនការផ្សព្វផ្សាយពាណិជ្ជកម្មដែលខ្លួនអាចដាក់បាននៅលើទំព័រ Facebook។
នៅក្នុងលិខិតមួយផ្ញើទៅកាន់គណៈកម្មាធិការមូលបត្រអាមេរិក ក្រុមហ៊ុន Facebook បានឲ្យដឹងថា៖ "ការបរិច្ឆេទ និងចំនួនជាក់លាក់នៃភាគហ៊ុនដែលត្រូវបានទិញមកវិញនឹងអាស្រ័យទៅលើកត្តាផ្សេងៗ រួមមានតម្លៃលក្ខខណ្ឌធុរកិច្ច និងទីផ្សារទូទៅ និងឱកាសវិនិយោគផ្សេងៗទៀត"។
យោងតាមលិខិតដដែលផែនការនេះជាផ្នែកនៃយុទ្ធសាស្រ្តរបស់ក្រុមហ៊ុន Facebook ដើម្បីសង្កត់ធ្ងន់ទៅលើកំណើនពាណិជ្ជកម្មរយៈពេលវែង។
ភាគហ៊ុនរបស់ក្រុមហ៊ុន Facebook ដែលបានធ្លាក់ចុះតិចជាង ១ ភាគរយនៅយប់ថ្ងៃជួញដូរផ្លូវការបានកើនឡើងបន្តិចមកវិញដល់ ១១៨,២៥ ដុល្លារក្នុងមួយហ៊ុនក្នុងការជួញដូរក្រៅទីផ្សារ។
ការទិញភាគហ៊ុនមកវិញអាចជួយឲ្យក្រុមវិនិយោគិនមានភាពស្ងប់ស្ងាត់ឡើងវិញ បន្ទាប់ពីជួបភាពជ្រួលច្របល់មួយសម្រាប់ក្រុមហ៊ុន Facebook។
តម្លៃភាគហ៊ុនបានធ្លាក់ចុះភ្លាមៗនៅដើមខែនេះបន្ទាប់ពីបណ្តាញសង្គមនេះ បានបង្ហាញពីប្រាក់ចំណូលប្រចាំត្រីមាសដ៏ច្រើនរបស់ខ្លួន ក៏ប៉ុន្តែក៏បានធ្វើការព្រមានផងដែរថាកំណើនដ៏គួរឲ្យភ្ញាក់ផ្អើលរបស់ខ្លួននឹងមានការថយចុះ៕