ឥទ្ធិពលសុរា

- បទកាកគតិ -

១-	មួយកែវព្រោកប្រាជ្ញ	ស្រាចូលបាត់ខ្លាច	លេងសើចសប្បាយ
	ប្រឡែងមិត្តភក្តិ	រាក់ទាក់ក្អាកក្អាយ	ពីរកែវប្រែក្លាយ
		ជាស្រាយចិញ្ចើម ។

២-	សម្តីប្រែកាច	បីកែវកំណាច	ឫកពាសម្បើម
	ដកដង្ហើមធំ	យក្សយំចាប់ផ្តើម	បួនកែវជួយផ្សើម
		ប្រែកាយវឹកវរ ។

៣-	ប្រាំកែវបង្ខំ	សំកុកសម្ងំ	អង្គុយលែងឈរ
	កែវទីប្រាំមួយ	ព្រឺព្រួយង៉ក់ងរ	វីវក់វឹកវរ
		ភ្លូកភ្លឹកស្មារតី ។

៤-	ផឹកប្រាំពីរកែវ	ធីងធោងគាស់ចែវ	កលខ្ពើមចំណី
	គេរាំក្បាច់ប្រុស	ឯងខុសក្បាច់ស្រី	ឈរមិនជាប់ដី
		ដេកដីរាំលេង ។

៥-	កែវទីប្រាំបី	ស្តីអស់ដឹងអ្វី	គោះជើងតាមភ្លេង
	កែវទីប្រាំបួន	យល់ខ្លួនធំធេង	ដេកដីច្រៀងលេង
		អសោចកេរ្តិ៍ឈ្មោះ ។

៦-	ដល់កែវទីដប់	ជោរមិនព្រមចប់	រង្គើរង្គោះ
	ក្រហល់ក្រហាយ	គ្មានបាយក្នុងពោះ	ភ្លេចគិតដល់យស
		យកចង្អេរបក់ ។

៧-	កែវទីដប់មួយ	ញាតិមិត្តជុំជួយ	យកទឹកបន្តក់
	ស្លក់ស្លេកស្លោកថ្លើម	ដង្ហើមដង្ហក់	ញាប់ញ័រដូចឆក់
		ស្រាដក់ឆ្អល់ឆ្អែត ។

៨-	បើអ្នកផឹកស្រា	ផឹកគួរពិចារណ៍	វាស់វែងសមហេតុ
	ផឹកបានសប្បាយ	កុំក្លាយជាប្រេត	ផឹកដួលវាស់ម៉ែត្រ
		គួរឈប់ផឹកស្រា ។

៩-	ផឹកមានសុខភាព	ផឹកស្គាល់ខ្ពស់ទាប	ផឹកប្រកបការ
	ផឹកកាយមាំមួន	ធ្វើខ្លួនរាបសា	ផឹកចេះពិចារណ៍
		ផឹករួមសប្បាយ ។

១០-	ផឹកអាហារឆ្ងាញ់	ផឹករំលាយខ្លាញ់	ផឹកថែរាងកាយ
	ផឹកមានបញ្ញា	ភ្លឺថ្លាស្រស់ស្រាយ	ផឹកស្រួលឆ្ងាញ់បាយ
		ស្រាជាឱសថ ។