អកុសលមូល

- បទពាក្យ៧ -

*	លះ អកុសល ក្តីកាចកម្ម	កើតឡើងប្រេះស្រាំក្នុងកាយចិត្ត
	យល់ពិចារណាហេតុពិសិដ្ឋ	វិភាគល្អន់ល្អិតស្រាវឫសគល់ ។

*	លោភៈ លោភលន់មិនមើលប្រាណ	ឃើញគេមានបានឯងវិលវល់
	ស្ទុះភ្លែតធ្វើតាមមិនដឹងពុល	វិនាសទើសទល់ហិនហោចប្រាណ ។

*	ទោសៈ កើតខឹងឡើងឆេវឆាវ	រករឿងដកដាវខឹងសន្តាន
	បង្កើតក្តីក្តាំចាកក្សេមក្សាន្ត	រុងរឿងថ្កើងថ្កានក្លាយជាផេះ ។

*	តាំងចិត្តប្រមូលសព្វអារម្មណ៍	ទប់កំហឹងខំតាមតម្រិះ
	រៀនអប់រំចិត្តតាមចំណេះ	កុំឱ្យស្រាំប្រេះខូចប្រយោជន៍ ។

*	មោហៈ ល្ងង់ខ្លៅត្រូវជាខុស	វិលវល់ផុលផុសធ្វើឱ្យខ្លោច
	យល់ឃើញរឿងធំប៉ុនស្រមោច	ប្រៀបធៀបហិនហោចមិនត្រូវសោះ ។

*	ងងឹតងងល់ក្នុងចិន្តា	ស្លាប់ស្លុងអាត្មាខ្វះចន្លោះ
	យល់ឃើញក្តីខុសត្រូវទាំងអស់	យល់ល្ងង់ខ្លៅសោះថាចំណាន ។

*	ប្រៀបដូចមមង់មិនស្គាល់ភ្លើង	ហើរតាមទំនើងយល់ក្សេមក្សាន្ត
	ឆាបឆេះសុសអស់គ្មានសល់ប្រាណ	បាត់បង់ថ្កើងថ្កានដោយក្តីល្ងង់ ។

*	ហៃមហាជនគួរពិចារណ៍	សព្វន័យខ្លឹមសារបានទ្រទ្រង់
	រួចគ្រោះដូចកុកហើរផុតជង់	សាមគ្គីគង់វង្សអភិវឌ្ឍន៍ ។