ពុក !!!

- បទពាក្យ៧ -

*	ពុកអើយកូននឹកគ្រប់វេលា	ពុកនឿយម្នីម្នាចិញ្ចឹមកូន
	ឃើញពុករាល់ថ្ងៃឥឡូវសូន្យ	ជួបតែបងប្អូនកូនខ្លោចផ្សា ។

*	ភ្លៀងផ្គររលឹមពុកភ្ជួររាស់	ថ្ងៃក្តៅកាប់គាស់រានចម្ការ
	នឿយគ្រប់រដូវប្រាំងវស្សា	ប្រឹងប្រកបការឱ្យកូនរៀន ។

*	ពុកធ្លាប់លើកកូនជិះលើស្មា	ទៅលេងយាយតាញាតិព្រៀងលាន
	ពុកបាននិយាយរឿងនិទាន	ពុកយល់កូនឃ្លានឱ្យអាហារ ។

*	កូនឈឺពុកព្រួយប្រឹងព្យាបាល	កក់ក្តៅនៅកាលវ័យកុមារ
	ពុកអប់រំកូនឱ្យឧស្សាហ៍	ពុកប្រោសមេត្តារាល់កំហុស ។

*	ពុករកផ្គត់ផ្គង់ក្នុងគ្រួសារ	ពុកប្រឹងធ្វើការឱ្យដាលដុះ
	ពុកកែតម្រូវពេលកូនខុស	ឱ្យកូនចាំចុះជាសីលធម៌ ។

*	កាលក្មេងរស់នៅបានជួបជុំ	ចម្រើនវ័យធំគួរត្រេកអរ
	ស្រាប់តែបាត់អ្នកមានគុណល្អ	មមៃបន្តនឹកឃើញពុក ។

*	គ្មានអ្វីតបស្នងគុណស្មើពិត	ពុកផ្តាំកូនគិតរក្សាទុក
	ចងក្រងបណ្តាំជាទំនុក	ទ្រព្យថ្លៃពាក្យពុកមានខ្លឹមសារ ។

*	ស្រឡាញ់ពេញចិត្តតួនាទី	ព្យាយាមសម្ភីប្រកបការ
	ទទួលខុសត្រូវគ្រងរក្សា	ជួយសព្វញាតិសាសងគុណពុក ។