លោក រ័ត្ន យូម៉េង, អភិបាល

ជនជាតិខ្មែរ កើតក្នុងឆ្នាំ១៩៦២ ។ លោក រ័ត្ន យូម៉េង បានបម្រើការឱ្យអេស៊ីលីដា ចាប់ពីខែមករា ឆ្នាំ១៩៩៩ ។ ចាប់ពីខែមករា ឆ្នាំ១៩៩៩ ដល់ខែសីហា ឆ្នាំ២០០៨ លោកបានកាន់តំណែងជាច្រើនដូចជា ៖ ប្រធានគណនេយ្យករ និងអនុប្រធានហិរញ្ញវត្ថុ (ខែមករា ឆ្នាំ១៩៩៩ ដល់ខែឧសភា ឆ្នាំ២០០៧), នាយកនាយកដ្ឋានហិរញ្ញវត្ថុ (ខែមិថុនា ឆ្នាំ២០០៧ ដល់ខែសីហា ឆ្នាំ២០០៨) និងជានាយកប្រតិបត្តិរតនាភិបាល (ខែកញ្ញា ឆ្នាំ២០០៨ ដល់ខែឧសភា ឆ្នាំ២០១៥) និងជា អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិរតនាភិបាល (ខែមិថុនា ឆ្នាំ២០១៥ ដល់បច្ចុប្បន្ន) ។

លោកទទួលខុសត្រូវដឹកនាំក្រុមគ្រប់គ្រង និងត្រួតពិនិត្យរតនាភិបាល ដូចជា ៖ នាយកដ្ឋានប្រតិបត្តិការហិរញ្ញវត្ថុ ការិយាល័យរតនាភិបាល ការិយាល័យប្រាក់តម្កល់ និងអត្រាប្តូររូបិយប័ណ្ណ និងការិយាល័យរតនពាណិជ្ជកម្ម ។ លោកក៏ជាអ្នកគាំទ្រផ្នែកបច្ចេកទេសដល់ក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី ទាក់ទងនឹងការគ្រប់គ្រងមូលនិធិ ។

ចាប់ពីឆ្នាំ២០០១ រហូតដល់ខែកញ្ញា ឆ្នាំ២០១៤ លោកក៏ជាអ្នកតំណាងភាគហ៊ុនិករបស់ក្រុមហ៊ុន អេ អេស អេ ដែលជាភាគហ៊ុនិកក្នុងស្រុកមួយរបស់ធនាគារ អេស៊ីលីដា ភីអិលស៊ី ។ នៅខែសីហា ឆ្នាំ២០១៤ លោកបានក្លាយជាសមាជិកក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី ។

លោកបានបញ្ចប់ថ្នាក់អនុបណ្ឌិតផ្នែកធនាគារ និងហិរញ្ញវត្ថុ ពីសាកលវិទ្យាល័យ វេស្ទើន នៅទីក្រុងភ្នំពេញ និងបានបញ្ចប់ការសិក្សាពីវិទ្យាស្ថានអូស្ត្រាលីសម្រាប់អភិបាលក្រុមហ៊ុន (GAICD) ។