ព័ត៌មានព័ត៌មានថ្មីៗធនាគារអេស៊ីលីដា ឡាវ ចាប់ផ្តើមប្រតិបត្តិការ

ធនាគារអេស៊ីលីដា ឡាវ ចាប់ផ្តើមប្រតិបត្តិការ

ថ្ងៃទី១៦ ខែកក្កដា ឆ្នាំ២០០៨

ការិយាល័យកណ្តាល ធនាគារអេស៊ីលីដា ឡាវ

ទីក្រុងវៀងចន្ទន៍ – ថ្ងៃទី០៨ ខែកក្កដា ឆ្នាំ២០០៨ – ធនាគារអេស៊ីលីដា ឡាវ បានប្រារព្ធពិធីសម្ពោធជាផ្លូវការនូវអគារការិយាល័យកណ្ដាលរបស់ខ្លួន មានកម្ពស់បួនជាន់ មានទីតាំងនៅអគារលេខ៣៧២ រង្វង់មូលផ្លូវឌុងប៉ាឡាន និងឌុងប៉ាយណា ក្រុមទី២១ ភូមិផូនសាក់វណ្ណនឿ ខណ្ឌស៊ីសាត់តាក់ណាក ទីក្រុងវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ ។ ពិធីនេះបានទទួលកិត្តិយសចូលរួមដ៏ឧត្ដុង្គឧត្ដមពីសំណាក់ទេសាភិបាលធនាគារឡាវ, ឯកអគ្គរដ្ឋទូតតំណាងប្រទេសនានាប្រចាំប្រទេសឡាវ, ភ្ញៀវកិត្តិយស, ថ្នាក់គ្រប់គ្រងធនាគារអេស៊ីលីដា ភីអិលស៊ី, ថ្នាក់គ្រប់គ្រងនិងបុគ្គលិកធនាគារអេស៊ីលីដាឡាវ ទាំងអស់ ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានសម្ដែងការស្វាគមន៍ជាពិសេស ចំពោះលោកស្រី Mattheuis-Maier អញ្ជើញមកពី KfW នាប្រទេសអាល្លឺម៉ង់ មកចូលរួមក្នុងពេលនេះ ហើយលោកស្រីជាអ្នកគាំទ្រដ៏សំខាន់និងតាំងពីដំបូងបង្អស់ ដល់ការរីកចម្រើនរបស់អេស៊ីលីដា ។ យើងទទួលបានការចូលរួមពីភ្ញៀវកិត្តិយស និងអតិថិជនមកពីតំបន់នានាជុំវិញពិភពលោក ដែលមានវត្តមាននៅទីនេះ នាពេលនេះ និងបានធ្វើឱ្យការសម្ពោធនេះក្លាយជាពិធីមួយមានលក្ខណៈជាអន្តរជាតិយ៉ាងពិតប្រាកដ ។ លោក អ៊ិន ចាន់នី បានបន្ថែមទៀតថា "ថ្ងៃនេះ ខ្ញុំមានមោទនភាពខ្លាំងណាស់ ដែលពិធីមួយនេះនឹងជួយជំរុញឱ្យវត្តមានរបស់ធនាគារអេស៊ីលីដា នៅប្រទេសឡាវ បោះជំហានឆ្ពោះទៅមុខ ស្របតាមយុទ្ធសាស្ត្រចីរភាពយូរអង្វែងរបស់យើង ដែលចង់ក្លាយជាធនាគារមួយដ៏ជោគជ័យប្រចាំតំបន់" ។

លោក អ៊ិន ចាន់នី បានថ្លែងអំណរគុណយ៉ាងជ្រាលជ្រៅចំពោះលោកឯកឧត្ដមទេសាភិបាលធនាគារឡាវ ដែលបានគាំទ្រយ៉ាងមុតមាំ និងផ្ដល់ទំនុកចិត្តចំពោះយើងខ្ញុំ ដែលបង្ហាញឡើងតាមរយៈការផ្ដល់អាជ្ញាប័ណ្ណពេញលេញដល់ធនាគារអេស៊ីលីដា ឡាវ នាថ្ងៃនេះ ។

លោក វ៉ាន់ សារឿន អគ្គនាយក ធនាគារអេស៊ីលីដា ឡាវ បានមានប្រសាសន៍ថា បច្ចុប្បន្នយើងមានបុគ្គលិក ៦៦នាក់ ដែលបានបញ្ជូនទៅសិក្សាទាំងទ្រឹស្ដីនិងការអនុវត្ត នៅការិយាល័យកណ្ដាល ប្រទេសកម្ពុជា រយៈពេលពីរខែ ។ យើងកំពុងជ្រើសរើសបន្ថែមទៀត និងកំពុងយកចិត្តទុកដាក់កសាងសមត្ថភាព ផ្ទេរចំណេះដឹងនិងបទពិសោធន៍នៅទីនេះ ។ បន្ទាប់ពីពីរឆ្នាំខាងមុខ ក្រុមជំនាញកម្ពុជានឹងចាប់ផ្ដើមចាកចេញ ដោយផ្ទេរតំណែងឱ្យបុគ្គលិកជនជាតិឡាវ ចូលទទួលតំណែងគ្រប់គ្រងទាំងនោះដោយផ្ទាល់តែម្ដង ។

ក្នុងការខិតទៅជិតអតិថិជន ដើម្បីបម្រើសេវាហិរញ្ញវត្ថុជូនពួកគាត់ ធនាគារអេស៊ីលីដា ឡាវ នឹងបើកសាខារបស់ខ្លួនពីរបន្ថែមទៀតក្នុងឆ្នាំនេះ នៅខេត្តសាក់វណ្ណខេត និងចំប៉ាសាក់ រួចហើយបើកសាខាមួយទៀតនៅឆ្នាំក្រោយ ក្នុងស្រុកថាខេក ខេត្តខាំមួន ។ ក្នុងរយៈពេលប្រាំឆ្នាំខាងមុខ ធនាគារអេស៊ីលីដា មានគម្រោងបើកសាខាខេត្ត-រាជធានីចំនួនបួន សាខាស្រុកចំនួន១១ សង្កាត់ចំនួន១៩ ដោយមានបុគ្គលិកកើនឡើងសរុបដល់ ៤០០នាក់ ។ ធនាគារអេស៊ីលីដា រំពឹងថានឹងផ្ដល់ឥណទានជូនអតិថិជនរបស់ខ្លួនបានចំនួន ១៥០.០០០នាក់ ក្នុងអំឡុងពេលនោះ ។

តាមសារព័ត៌មាន Vientiane Times របស់ឡាវ ចេញផ្សាយថ្ងៃទី១០ កក្កដា ២០០៨ ទេសាភិបាលធនាគារឡាវ បានមានប្រសាសន៍ថា "វត្តមានរបស់ធនាគារអេស៊ីលីដា ឡាវ បានឆ្លុះបញ្ចាំងពីការប្តេជ្ញាចិត្តដ៏មុតមាំរបស់ខ្លួន ក្នុងការចូលរួមអភិវឌ្ឍន៍វិស័យហិរញ្ញវត្ថុ ដោយសហការជាមួយរដ្ឋាភិបាលឡាវ" ។

យោងតាមសារព័ត៌មាន Phnom Penh Post ដែលចុះផ្សាយសម្រាប់ថ្ងៃ ១១-២៤ កក្កដា ២០០៨ បាននិយាយថា ធនាគារអេស៊ីលីដា ភីអិលស៊ី ជាធនាគារពាណិជ្ជរបស់កម្ពុជាដំបូងគេ ដែលពង្រីកប្រតិបត្តិការនៅបរទេស ចាប់ពីថ្ងៃទី០៨ ខែកក្កដា នេះតទៅ ។ សារព័ត៌មាននេះក៏បានលើកយកប្រសាសន៍លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា កាលពីថ្ងៃទី០៧ ខែកក្កដា នេះថា ការដាក់ទុនវិនិយោគរបស់ធនាគារអេស៊ីលីដា នៅក្នុងប្រទេសឡាវនេះ បានទទួលការគាំទ្រយ៉ាងពេញលេញពីធនាគារជាតិនៃកម្ពុជា ។ លោកជំទាវ បានមានប្រសាសន៍ថា យើងបានលើកទឹកចិត្តឱ្យធនាគារកម្ពុជាពង្រីកប្រតិបត្តិការរបស់ខ្លួនទៅក្រៅប្រទេស ហើយធនាគារអេស៊ីលីដា ជាធនាគារដំបូងបង្អស់ដែលធ្វើបានសម្រេច ។

កត្តាមួយចំនួនដែលជំរុញឱ្យធនាគារអេស៊ីលីដាជ្រើសរើសមកប្រទេសឡាវ រួមមានដូចជា ការរីកចម្រើនខ្លាំងនៃសេដ្ឋកិច្ចប្រទេសឡាវប្រកបដោយចីរភាព, ទទួលបានការគាំទ្រយ៉ាងពេញលេញពីអាជ្ញាធរសាធារណរដ្ឋប្រជាធិបតេយ្យប្រជាមានិតឡាវ, ការគាំទ្រយ៉ាងពេញទំហឹងពីភាគហ៊ុនិកនិងក្រុមប្រឹក្សាភិបាល ព្រមជាមួយនឹងថ្នាក់គ្រប់គ្រង និងបុគ្គលិករបស់យើង ដែលមានការប្ដេជ្ញាចិត្តខ្ពស់ ។

ធនាគារអេស៊ីលីដា ឡាវ នឹងចាប់ផ្ដើមបម្រើនូវសេវាធនាគារពាណិជ្ជ និងសេវាធនាគារលក់រាយគ្រប់ប្រភេទ រួមមានដូចជា សេវាឥណទាន សេវាបញ្ញើ-សន្សំ សេវាផ្ទេរប្រាក់ និងសេវាចាត់ចែងសាច់ប្រាក់ ។

សម្រាប់ព័ត៌មានបន្ថែម សូមទាក់ទងតាមរយៈ

ធនាគារ អេស៊ីលីដា ឡាវ ការិយាល័យកណ្ដាល ៖ អគារលេខ៣៧២ រង្វង់មូលផ្លូវឌុងប៉ាឡាន និងឌុងប៉ាយណា ក្រុមទី២១ ភូមិផូនសាក់វណ្ណនឿ ខណ្ឌស៊ីសាត់តាក់ណាក ទីក្រុងវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ
ប្រអប់សំបុត្រលេខ ៖ ១៥៥៥
ទូរស័ព្ទ ៖ +៨៥៦ (០)២១ ២៦៤ ៩៩៤
ទូរសារ ៖ +៨៥៦ (០)២១ ២៦៤ ៩៩៥
អ៊ីម៉ែល ៖
SWIFT ៖ ACLBLALA

« ព័ត៌មានមុន
ធនាគារអេស៊ីលីដា បើកសាខាថ្មីទីមួយនៅប្រទេសឡាវ ព័ត៌មានបន្ទាប់ »
ធនាគារ អេស៊ីលីដា សាខាខេត្តកំពង់ចាមសម្ពោធអគារការិយាល័យថ្មី

ធនាគារ​អេស៊ីលីដា ឡាវ ចាប់​ផ្តើម​ប្រតិបត្តិការ

ធនាគារអេស៊ីលីដា ឡាវ ចាប់ផ្តើមប្រតិបត្តិការ