ព្រហើនកើនគ្រោះថ្នាក់

- បទពាក្យ៧ -

១-	ប្រហែសព្រហើនកើនគ្រោះថ្នាក់	ភ្លេចមិនទុកដាក់កើនបាត់បង់
	ការងារមិនល្អដ្បិតមិនចង់	ចិត្តមិនស្មោះត្រង់ដ្បិតមានបាប ។

២-	បើកបរអារម្មណ៍មិននឹងនរ	ដំណើរទៅមក៍ងុយងោកស្ងាប
	គាប់ជួនស្រវឹងខ្លាំងដុនដាប	បុកឆ្កែយល់ចាបដួលដាំដូង ។

៣-	បុកគោក្របីជ្រូកមាន់ទា	រអិលបុកគ្នាធ្លាក់អណ្តូង
	បោកប៉ះទង្គិចដួលដេកតូង	លិចកើតជើងត្បូងធ្លាក់ចុះស្រែ ។

៤-	គ្រេចភ្លាត់បែកបាក់ឆ្អឹងសរសៃ	មុខមាត់ជើងដៃដេករាប់ខែ
	គាប់ជួនគ្រោះធ្ងន់ស្លាប់ចោលម៉ែ	ខ្លួនប្រាណខំថែបែរពិការ ។

៥-	ខ្វះប្រុងប្រយ័ត្នបាត់ទូរស័ព្ទ	ភ្លេចមិនចំណាប់ដូចមរណា
	បាត់ទ្រព្យដឹងខុសពេលត្រូវការ	ភ្លេចនាំខ្លោចផ្សាក្នុងជីវិត ។

ជំនួយស្មារតី : ក្រើនរំឭក ឲ្យយល់អំពីហេតុផលដែលនាំឲ្យខ្លោចផ្សាក្នុងជីវិត គឺបណ្តាលមកពីប្រហែសព្រហើន និងការភ្លេចភ្លាំង ខ្វះការប្រុងប្រយ័ត្ន ។