ព័ត៌មានព័ត៌មានមូលបត្រថ្មីៗកិច្ចសហប្រតិបត្តិការរវាងធនាគារ អេស៊ីលីដា ភីអិលស៊ី និងអេស៊ីលីដា ស៊ីឃ្យួរឹធី ភីអិលស៊ី ជាមួយក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី

កិច្ចសហប្រតិបត្តិការរវាងធនាគារ អេស៊ីលីដា ភីអិលស៊ី និងអេស៊ីលីដា ស៊ីឃ្យួរឹធី ភីអិលស៊ី ជាមួយក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី

ថ្ងៃទី២៦ ខែតុលា ឆ្នាំ២០១១

លោក ឆាយ សឿន ប្រធានក្រុមប្រឹក្សាភិបាលអេស៊ីលីដាស៊ីឃ្យួរឹធី, លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា, លោក You Joon Ryeol ប្រធាននាយកប្រតិបត្តិក្រុមហ៊ុនតុងយ៉ាងស៊ីឃ្យួរឹធី, និងលោក Han Kyung Tae ប្រធានក្រុមប្រឹក្សាភិបាលក្រុមហ៊ុនតុងយ៉ាងស៊ីឃ្យួរឹធី(ខេមបូឌា)

រាជធានីភ្នំពេញ, ថ្ងៃទី២៦ ខែតុលា ឆ្នាំ២០១១ ៖ ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់ផ្នែកនៃសេវាធនាគារ និងក្រុមហ៊ុនបុត្រសម្ព័ន្ធរបស់ខ្លួន អេស៊ីលីដា ស៊ីឃ្យួរឹធី ភីអិលស៊ី ដែលជាក្រុមហ៊ុនមូលបត្រទទួលអាជ្ញាបណ្ណដំបូងគេពី គណៈកម្មការមូលបត្រកម្ពុជា ក្នុងការធ្វើអាជីវកម្មជើងសាមូលបត្រ និងក្រុមហ៊ុន តុងយ៉ាង ស៊ីឃ្យួរឹធី (ខេមបូឌា) ភីអិលស៊ី បានប្រកាសអំពីការធ្វើកិច្ចសហប្រតិបត្តិការជាមួយគ្នាតាមរយៈ ការចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការ ក្រោមវត្តមានរបស់លោកប្រធាននាយកប្រតិបត្តិធនាគារ អេស៊ីលីដា ភីអិលស៊ី និងលោកប្រធាននាយកប្រតិបត្តិក្រុមហ៊ុនតុងយ៉ាងស៊ីឃ្យួរឹធី ដែលជាក្រុមហ៊ុនមេរបស់ក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី ។

តាមរយៈអនុស្សរណៈយោគយល់គ្នានេះ ធនាគារ អេស៊ីលីដា ភីអិលស៊ី, អេស៊ីលីដា ស៊ីឃ្យួរឹធី ភីអិលស៊ី, និងក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី អាចផ្តល់ជូនអតិថិជន និងវិនិយោគិន ទាំងអស់នូវជំនាញ និងសេវាកម្មហិរញ្ញវត្ថុគ្រប់ប្រភេទក្នុងព្រះរាជាណាចក្រកម្ពុជា ។ យើងបានកំណត់យ៉ាងច្បាស់អំពីការបំពេញគ្នាទៅវិញទៅមកតាមរយៈជំនាញ និងភាពខ្លាំងនៃភាគីទាំងបី ។ តាមរយៈការប្រមូលផ្តុំការបំពេញបន្ថែមគ្នា ស្ថាប័នទទួលផលនីមួយៗនឹងផ្តល់អត្ថប្រយោជន៍ជូនអតិថិជនទាំងអស់ ជាមួយនឹងការប្រើប្រាស់សេវាដ៏សមស្រប និងកាន់តែមានប្រសិទ្ធភាព ។ ជាពិសេសទៅទៀត ក្រុមហ៊ុនតុងយ៉ាងស៊ីឃ្យួរឹធី និងអេស៊ីលីដា នឹងផ្តល់ជូននូវភាពងាយស្រួល និងដំណើរការប្រកបដោយប្រសិទ្ធភាព ក្នុងប្រតិបត្តិការមូលបត្រសម្រាប់ការបោះផ្សាយលក់មូលបត្រលើកដំបូងជាសាធារណៈក្នុងទីផ្សារមូលបត្រកម្ពុជា ។

ពីឆ្វេងទៅស្តាំ ៖ លោក You Joon Ryeol, លោក ឆាយ សឿន, និងលោក អ៊ិន ចាន់នី

លោក អ៊ិន ចាន់នី ប្រធាននាយកប្រតិបត្ដិធនាគារ អេស៊ីលីដា ភីអិលស៊ី បានមានប្រសាសន៍ថា ៖ អនុស្សរណៈយោគយល់គ្នានេះនឹងបញ្ចូលគ្នារវាងបទពិសោធន៍រយៈពេល ៤៩ឆ្នាំ របស់ក្រុមហ៊ុនតុងយ៉ាងស៊ីឃ្យួរឹធី ដែលជាក្រុមហ៊ុនមូលបត្រឈានមុខមួយនៅក្នុងទីផ្សារមូលបត្រក្នុងប្រទេសកូរ៉េខាងត្បូង ជាមួយនឹងធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេនៅក្នុងព្រះរាជាណាចក្រកម្ពុជា និងជាធនាគារដែលលោកអ្នកជឿទុកចិត្ត ដើម្បីប្រើប្រាស់ជំនាញនិងបទពិសោធន៍ក្នុងការផ្តល់ជូនសេវាកម្មប្រឹក្សា និងហិរញ្ញវត្ថុ ព្រមទាំងការរៀបចំហិរញ្ញប្បទានសម្រាប់ការបោះផ្សាយលក់ និងការចុះបញ្ជីលក់មូលបត្រជាសាធារណៈ ។

លោក ឆាយ សឿន ប្រធានក្រុមប្រឹក្សាភិបាលអេស៊ីលីដា ស៊ីឃ្យួរឹធី ភីអិលស៊ី បានមានប្រសាសន៍ថា ៖ វាជាឱកាសថ្មីសម្រាប់វិនិយោគិន ជាពិសេសអ្នកវិនិយោគឯកត្តជនធ្វើការវិនិយោគក្នុងទីផ្សារមូលបត្រកម្ពុជា ចាប់ពីការបោះផ្សាយលក់មូលបត្រលើកដំបូងជាសាធារណៈតាមរយ:ក្រុមហ៊ុនមូលបត្រអេស៊ីលីដា ស៊ីឃ្យួរឹធី ភីអិលស៊ី ។ លើសពីនេះ ទាំងវិនិយោគិន និងសាធារណជនអាចទទួលបានរបាយការណ៍វិភាគស្រាវជ្រាវ និងព័ត៌មានហិរញ្ញវត្ថុបានកាន់តែទូលំទូលាយ ។

លោក You Joon Ryeol ប្រធាននាយកប្រតិបត្តិក្រុមហ៊ុនតុងយ៉ាងស៊ីឃ្យួរឹធី បានមានប្រសាសន៍ថា ៖ ភាពជាដៃគូដែលយើងបង្កើតនាថ្ងៃនេះ នឹងបង្កើតឱ្យមាននូវផលប្រយោជន៍ទៅវិញទៅមកជាក់លាក់ សម្រាប់ការរីកលូតលាស់របស់ភាគីនីមួយៗដោយការរួមបញ្ចូលគ្នានូវជំនាញ និងភាពខ្លាំងរបស់ខ្លួន ។ ជាមួយនឹងកេរ្តិ៍ឈ្មោះរបស់ធនាគារអេស៊ីលីដា ដែលជាគ្រឹះស្ថានហិរញ្ញវត្ថុឈានមុខគេ នៅក្នុងព្រះរាជាណាចក្រកម្ពុជា វានឹងធ្វើឱ្យយើងកាន់តែងាយស្រួលក្នុងការទទួលបាននូវវិនិយោគិនដ៏ច្រើន ទាំងក្នុងប្រទេស និងក្រៅប្រទេស សម្រាប់ការបោះផ្សាយលក់មូលបត្រលើកដំបូងជាសាធារណៈ ដែលយើងធ្វើជាក្រុមហ៊ុនធានាទិញមូលបត្រ ។ វាក៏នឹងធ្វើឱ្យអេស៊ីលីដា បង្កើតបាននូវសហគមន៍នៃវិនិយោគិន កាន់តែទូលំទូលាយ ដែលធ្វើឱ្យប្រសើរដល់អាជីវកម្មរបស់អេស៊ីលីដា ទាំងក្នុងពេលបច្ចុប្បន្ន ទាំងក្នុងពេលអនាគត ។ បន្ថែមលើនេះ យើងរីករាយនឹងជួយធនាគារអេស៊ីលីដា នៅក្នុងការរៀបចំផែនការបោះផ្សាយលក់មូលបត្រលើកដំបូងជាសាធារណៈរបស់ធនាគារនាពេលអនាគត ។ សរុបសេចក្តីមក កិច្ចសហប្រតិបត្តិការនេះ នឹងផ្តល់ភាពពេញចិត្តដល់វិនិយោគិន និងអតិថិជននៃការបោះផ្សាយលក់មូលបត្រលើកដំបូងជាសាធារណៈនៅក្នុងព្រំដែននៃទីផ្សារហិរញ្ញវត្ថុនៅក្នុងប្រទេសនេះ ដែលជាលទ្ធផលនៃអត្ថប្រយោជន៍ ប្រកួតប្រជែងដ៏ច្បាស់លាស់តាមរយៈសម្ព័ន្ធភាពនេះ ៕

សម្រាប់ព័ត៌មានបន្ថែម សូមទាក់ទងតាមរយៈ ៖

ធនាគារ អេស៊ីលីដា ភីអិលស៊ី

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

អេស៊ីលីដា ស៊ីឃ្យួរឹធី ភីអិលស៊ី

លោក ហោ ស៊ីម៉េត ប្រធានប្រតិបត្តិការ
អ៊ីម៉ែល ៖

លោក លឹម ច័ន្ទតារា ប្រធានភ្នាក់ងារក្រុមហ៊ុនមូលបត្រ
អ៊ីម៉ែល ៖

ក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី

លោក Choi Young Chul ប្រធានប្រតិបត្តិការ
អ៊ីម៉ែល ៖

កញ្ញា គុំ ម៉ង់ដារីន អ្នកវិភាគ ផ្នែកច្បាប់
អ៊ីម៉ែល ៖