វចនានុក្រម​មូលបត្រ

វចនានុក្រម​មូលបត្រ នេះ​ជា​ឯកសារ​ជំនួយ​ថ្មី និង​ដំបូង​គេ​ដែល​ត្រូវ​បាន​រៀប​រៀង​ចងក្រង​សម្រេច​ជា​រូបរាង​ឡើង​នៅ​ឆ្នាំ២០១១ ដើម្បី​ឆ្លើយតប​ទៅ​នឹង​តម្រូវ​ការ​ក្នុង​ការ​ប្រើប្រាស់​ពាក្យពេចន៍​ក្នុង​វិស័យ​មូលបត្រ ដែល​ជា​បរិបទ​ថ្មី​សម្រាប់​ព្រះរាជាណាចក្រ​កម្ពុជា និង​ដំណើរការ​នៃ​ការ​រៀបចំ​ទីផ្សារ​មូលបត្រ​កម្ពុជា ដោយ​បាន​ប្រមូល​ផ្តុំ​នូវ​ពាក្យ ឃ្លាឃ្លោង និង​សេចក្តី​ពន្យល់ មាន​អត្ថសេចក្តី ជា​អត្ថានុរូប​(ន័យ​ត្រង់ៗ) ឬ​អត្ថបដិរូប​(ន័យ​ប្រដូច) ពី​ប្រភព​នានា ពិសេស​ឯកសារ​ច្បាប់ បទប្បញ្ញត្តិ ដែល​ទាក់ទង​នឹង​មូលបត្រ និង​ឯកសារ​អេឡិកត្រូនិក​ផង​ដែរ ។

វចនានុក្រម​មូលបត្រ នេះ​រៀបចំ​ឡើង​ក្នុង​គោលបំណង ៖

• បំពេញ​នូវ​តម្រូវការ​នៃ​ការប្រីប្រាស់​ពាក្យ​បច្ចេកទេស​នៅ​ក្នុង​វិស័យ​មូលបត្រ
• រួមចំណែក​ដល់​ការ​លើក​កម្ពស់​ចំណេះដឹង​លើ​ពាក្យ​បច្ចេកទេស និង​អត្ថ ដែល​មាន​ក្នុង​ទីផ្សារ​មូលបត្រ សម្រាប់​ប្រើប្រាស់​តាម​ការ​ចាំ​បាច់
• ដើម្បី​ឲ្យ​ការ​ប្រើ​ពាក្យ​បច្ចេកទេស​មូលបត្រ​មាន​លក្ខណៈ​បទដ្ឋាន
• សម្រួល​ដល់​ការសិក្សា និង​ស្វែងយល់​អំពី​អភិវឌ្ឍន៍ភាព​នៃ​វិស័យ​មូលបត្រ​ក្នុង​ព្រះរាជាណាចក្រ​កម្ពុជា
• ផ្សព្វផ្សាយ​ឲ្យ​ប្រើប្រាស់​ជា​ប្រយោជន៍​សាធារណៈ​ជា​ឯកសារ​អេឡិកត្រូនិក​តទៅ

សូម​ថ្លែង​អំណរគុណ​ដ៏​ជ្រាល​ជ្រៅ ចំពោះ​ថ្នាក់​ដឹកនាំ​និង​កម្មករ​និយោជិត ក្រុមហ៊ុនមូលបត្រ អេស៊ីលីដា ម.ក ទាំង​អស់​ដែល​បាន​ផ្តល់​នូវ​វិភាគទាន​ដ៏​ថ្លៃថ្លា ក្នុង​ការ​ចូលរួម​តាក់តែង ចងក្រង និង​រៀបចំ​នូវ​វចនានុក្រម​មូលបត្រ​នេះ​ឲ្យ​កើត​ជា​រូបរាង​ឡើង ។

សូម​ឲ្យ​ថ្នាក់ដឹកនាំ និង​កម្មករ​និយោជិត ក្រុមហ៊ុនមូលបត្រ អេស៊ីលីដា ម.ក ព្រមទាំង​ក្រុម​គ្រួសារ អតិថិជន​ជា​វិនិយោគិន​វៃឆ្លាត​រាប់​ពាន់​នាក់​របស់ក្រុមហ៊ុនមូលបត្រ អេស៊ីលីដា ម.ក និង​អតិថិជន​ជាង​មួយ​លាន​នាក់​របស់ ធនាគារ អេស៊ីលីដា ភីអិលស៊ី ទទួល​បាន​នូវ​ពុទ្ធពរ​ទាំង​ប្រាំ​ប្រការ គឺ អាយុ វណ្ណៈ សុខៈ ពលៈ និង​បដិភាណៈ កុំ​បី​ឃ្លៀង​ឃ្លាត​ឡើយ ។

សូម​មេត្តា​អនុញ្ញាត​រួម​រស់​ដោយ​ស្មោះ និង​ចូលរួម​នូវ​រាល់​ការងារ​ក្នុង​សង្គម​មនុស្ស​ជាអមតៈ ។

ភ្នំពេញ, ថ្ងៃទី១៤ ខែសីហា ឆ្នាំ២០១៤   
អគ្គនាយក ក្រុមហ៊ុនមូលបត្រ អេស៊ីលីដា ម.ក