ព័ត៌មានព័ត៌មានមូលបត្រថ្មីៗពិធីចម្រើនមង្គលអគារការិយាល័យថ្មីទី២៥២ ធនាគារអេស៊ីលីដា សាខាសុធារស (ផ្សារអ៊ីអន)

ពិធីចម្រើនមង្គលអគារការិយាល័យថ្មីទី២៥២ ធនាគារអេស៊ីលីដា សាខាសុធារស (ផ្សារអ៊ីអន)

ថ្ងៃទី១៧ ខែមិថុនា ឆ្នាំ២០១៤

ពិធីចម្រើនមង្គលអគារការិយាល័យថ្មី សាខាសុធារស (ផ្សារអ៊ីអន)

នៅរសៀលថ្ងៃទី១៧ ខែមិថុនា ឆ្នាំ២០១៤ ធនាគារ អេស៊ីលីដា ភីអិលស៊ី បានរៀបចំពិធីចម្រើនមង្គលអគារការិយាល័យថ្មីទី២៥២ សាខាសុធារស (ផ្សារអ៊ីអន) ដែលមានទីតាំងស្ថិតនៅក្នុងផ្សារទំនើបអ៊ីអន អគារលេខ១៣២ មហាវិថីសម្តេចសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា ។ សាខាថ្មីនេះ នឹងចាប់បម្រើសេវាកម្មធនាគារគ្រប់ប្រភេទ ជូនអតិថិជននិងសាធារណជន ចាប់ពីថ្ងៃទី២០ ខែមិថុនា ឆ្នាំ២០១៤ នេះតទៅ ។

ទីតាំងអគារការិយាល័យថ្មីនេះស្ថិតនៅក្នុងផ្សារទំនើបអ៊ីអន ធំទូលាយ មានសុវត្ថិភាពខ្ពស់ និងមានទីកន្លែងសម្រាប់បំពេញការងារប្រកបដោយផាសុកភាព ។ គោលបំណងក្នុងការបើកឱ្យប្រតិបត្តិការ សាខាសុធារស (ផ្សារអ៊ីអន) នេះឡើង គឺដើម្បីពង្រីកបណ្តាញប្រតិបត្តិការរបស់ធនាគារអេស៊ីលីដា ឱ្យស្ថិតនៅជិតអតិថិជន និងសារណជន ជាពិសេសដើម្បីផ្តល់ភាពងាយស្រួលដល់អាជីវករលក់ដូរក្នុងផ្សារអ៊ីអន និងសារណជនទូទៅ អាចប្រើប្រាស់សេវាកម្មធនាគារ និងហិរញ្ញវត្ថុគ្រប់ប្រភេទរបស់ធនាគារអេស៊ីលីដា ជាពិសេសផ្តល់នូវមធ្យោបាយក្នុងការគ្រប់គ្រង ចាត់ចែងសាច់ប្រាក់ និងទូទាត់សេវាផ្សេងៗទៀតតាមតម្រូវការ ពីព្រោះថាជាជំហានដំបូងនេះ ធនាគារអេស៊ីលីដាបានបំពាក់ម៉ាស៊ីនសម្រាប់ដកប្រាក់ចំនួនពីរគ្រឿង និងម៉ាស៊ីនដាក់កញ្ចប់ប្រាក់ ចំនួនពីរគ្រឿងផងដែរ ។ ជាជំហានបន្ទាប់ យើងខ្ញុំមានគម្រោងបំពាក់ម៉ាស៊ីនដាក់កញ្ចប់ប្រាក់ ចំនួន ៥ គ្រឿង និងម៉ាស៊ីនដាក់ប្រាក់ ១គ្រឿងបន្ថែមទៀតផងដែរ ។

លោកស្រីបណ្ឌិត សូ ផនណារី អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ ផ្តល់បទសម្ភាសដល់អ្នកសារព័ត៌មាន ក្នុងពិធីចម្រើនមង្គល

សាខាសុធារស (ផ្សារអ៊ីអន) ជាសាខាទី២៥២ របស់ធនាគារអេស៊ីលីដា ហើយក្នុងឆ្នាំ២០១៤ នេះ ធនាគារអេស៊ីលីដាមានផែនការពង្រីកបណ្តាញប្រតិបត្តិការរបស់ខ្លួនរហូតដល់ ២៥៥ សាខា ដើម្បីផ្តល់ភាពងាយស្រួលដល់អតិថិជន និងសាធារណជន ក្នុងការប្រើប្រាស់ផលិតផល-សេវាកម្មធនាគារ និងហិរញ្ញវត្ថុគ្រប់ប្រភេទរបស់ធនាគារអេស៊ីលីដា ។

ការបង្កើតសាខាសុធារស (ផ្សារអ៊ីអន) នេះបញ្ជាក់ឱ្យឃើញពីការប្តេជ្ញាចិត្តខ្ពស់ និងកិច្ចខិតខំប្រឹងប្រែងរបស់ធនាគារ ក្នុងការបម្រើសេវាកម្មជូនដល់អតិថិជន និងសាធារណជនគ្រប់មជ្ឈដ្ឋានក្នុងសហគមន៍ឱ្យកាន់តែមានភាពងាយស្រួល និងល្អប្រសើរជាងមុន និងបង្កើនទំនុកចិត្តកាន់តែខ្លាំងឡើងមកលើធនាគារអេស៊ីលីដា ដែលជា ប្រជាធនាគារដែលលោកអ្នកជឿទុកចិត្ត ។ ជាងនេះទៅទៀត វាក៏បានបញ្ជាក់ផងដែរពីការរីកចម្រើនរបស់ខ្លួនប្រកបដោយចីរភាព ។

ត្រឹមដំណាច់ខែឧសភា ឆ្នាំ២០១៤ ធនាគារ អេស៊ីលីដា ភីអិលស៊ី មានបណ្តាញការិយាល័យប្រតិបត្តិការ ចំនួន ២៥១សាខា នៅទូទាំងព្រះរាជាណាចក្រកម្ពុជា, ៤១ ការិយាល័យ នៅប្រទេសឡាវ និង ៦ ការិយាល័យ នៅប្រទេសមីយ៉ាន់ម៉ា ជាមួយនឹងទ្រព្យសកម្មសរុប ចំនួនជាង ២,៦៤ ពាន់លានដុល្លារអាមេរិក ។ ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។ ហើយតាមយុទ្ធសាស្ត្រ ធនាគារ អេស៊ីលីដា ភីអិលស៊ី នឹងបន្តពង្រីកវិសាលភាពប្រតិបត្តិការ ទៅក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀតផងដែរ ។

សម្រាប់ព័ត៌មានបន្ថែម សូមទាក់ទងតាមរយៈ ៖

បណ្ឌិត សូ ផនណារី
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល : phonnary@acledabank.com.kh

លោក ព្រំ វិសុទ្ធ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល : visoth@acledabank.com.kh

ពិធី​ចម្រើន​មង្គល​អគារ​ការិយាល័យ​ថ្មី​ទី២៥២ ធនាគារ​អេស៊ីលីដា សាខា​សុធារស (ផ្សារអ៊ីអន)

ពិធីចម្រើនមង្គលអគារការិយាល័យថ្មីទី២៥២ ធនាគារអេស៊ីលីដា សាខាសុធារស (ផ្សារអ៊ីអន)