ព័ត៌មានព័ត៌មានមូលបត្រថ្មីៗធនាគារធំជាងគេរបស់ប្រទេសជប៉ុន SMBC បានវិនិយោគជាមួយធនាគារ អេស៊ីលីដា ភីអិលស៊ី

ធនាគារធំជាងគេរបស់ប្រទេសជប៉ុន SMBC បានវិនិយោគជាមួយធនាគារ អេស៊ីលីដា ភីអិលស៊ី

ថ្ងៃទី១៨ ខែសីហា ឆ្នាំ២០១៤

រាជធានីភ្នំពេញ ថ្ងៃទី១៨ ខែសីហា ឆ្នាំ២០១៤ ធនាគារ អេស៊ីលីដា ភីអិលស៊ី (ប្រជាធនាគារដែលលោកអ្នកជឿទុកចិត្ត) ជាធនាគារពាណិជ្ជឈានមុខគេលើគ្រប់វិស័យក្នុងព្រះរាជាណាចក្រកម្ពុជា បានប្រកាសថ្ងៃនេះថា ធនាគារ Sumitomo Mitsui Banking Corporation (SMBC) ជាសាជីវកម្មធនាគារ បង្កើតឡើងក្រោមច្បាប់នៃប្រទេសជប៉ុន បានវិនិយោគជាមួយធនាគារ អេស៊ីលីដា ភីអិលស៊ី ក្នុងចំណែកភាគហ៊ុនចំនួន ១២,២៥% នៃសាជីវកម្មហិរញ្ញវត្ថុអន្តរជាតិ (IFC) ដែលបច្ចុប្បន្នជាភាគទុនិកមួយរបស់ធនាគារ អេស៊ីលីដា ភីអិលស៊ី ។

សាជីវកម្មហិរញ្ញវត្ថុអន្តរជាតិ (IFC) ជាដៃគូរបស់អេស៊ីលីដា ចាប់តាំងពីឆ្នាំ១៩៩៩ ពេលដែលអេស៊ីលីដាបានចាប់ផ្តើមកម្លាយខ្លួនពីអង្គការក្រៅរដ្ឋាភិបាលទៅជាធនាគារ ។ រយៈពេល១៥ឆ្នាំ កន្លងមកហើយ ដែល IFC ក្នុងនាមជាភាគហ៊ុនស្ថាបនិកមួយ បានចូលរួមចំណែកជួយធនាគារ អេស៊ីលីដា ភីអិលស៊ី ឱ្យមានការរីកចម្រើនក្លាយជាធនាគារមានទ្រព្យសកម្មធំជាងគេនៅប្រទេសកម្ពុជា តាមរយៈការផ្តល់ដើមទុនហិរញ្ញប្បទានបន្ទាប់បន្សំថ្នាក់ទី២ ហិរញ្ញប្បទានរយៈពេលវែង និងហិរញ្ញប្បទានពាណិជ្ជកម្ម ។ IFC មាននាទីប្រឹក្សាយោបល់ជូនធនាគារ អេស៊ីលីដា ភីអិលស៊ី ពីការបង្កើតនីតិវិធីធនាគារអន្តរជាតិ ពង្រឹងប្រព័ន្ធគ្រប់គ្រងអភិវឌ្ឍន៍ សមត្ថភាពបុគ្គលិក លើកស្ទួយការផ្តល់ឥណទានដល់សហគ្រាសខ្នាតតូច មធ្យម ហិរញ្ញប្បទាន និងឧបត្ថម្ភបច្ចេកទេសរួមចំណែកជាមួយធនាគារ អេស៊ីលីដា ភីអិលស៊ី ក្នុងការពង្រីកសេវាកម្មហិរញ្ញវត្ថុ នៅសាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋសហភាពមីយ៉ាន់ម៉ា ។ IFC ជាភាគទុនិកមួយរបស់ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ដែលជាបុត្រសម្ព័ន្ធរបស់ធនាគារ អេស៊ីលីដា ភីអិលស៊ី ដែលបានចាប់ផ្តើមប្រតិបត្តិការនៅឆ្នាំ២០១៣ ជាការឆ្លើយតបទៅនឹងតម្រូវការចាំបាច់ផ្នែកហិរញ្ញវត្ថុរបស់សហគ្រាសខ្នាតតូចបំផុត ខ្នាតតូច និងមធ្យម នៅសាធារណរដ្ឋសហភាពមីយ៉ាន់ម៉ា ។

លោក អាឌែល ម័រ ជាគណៈនាយក IFC ប្រចាំនៅអាស៊ីប៉ាស៊ីហ្វិក បានមានប្រសាសន៍ថា IFC បានគាំទ្រអេស៊ីលីដា ក្នុងការកម្លាយខ្លួនពីអង្គការក្រៅរដ្ឋាភិបាលទៅជាធនាគារឯកទេស និងកម្លាយខ្លួនទៅជាធនាគារពាណិជ្ជ ដោយជោគជ័យ ។ លោកបានអះអាងថា ធនាគារជប៉ុន SMBC ជាដៃគូយុទ្ធសាស្ត្រដ៏សំខាន់របស់ធនាគារ អេស៊ីលីដា ភីអិលស៊ី អាចបន្តគាំទ្រការរីកចម្រើនយូរអង្វែងរបស់ធនាគារ អេស៊ីលីដា ភីអិលស៊ី និងចូលរួមចំណែកដល់ការអភិវឌ្ឍសេដ្ឋកិច្ច និងការបង្កើតការងារនៅប្រទេសកម្ពុជា ដោយមានសក្តានុពលហិរញ្ញវត្ថុដ៏រឹងមាំ និងវិជ្ជាជីវៈធនាគារខ្ពស់ដូចគ្នា ។ IFC នៅតែបន្តគាំទ្រដល់ប្រតិបត្តិការរបស់ធនាគារ អេស៊ីលីដា ភីអិលស៊ី នៅប្រទេសកម្ពុជា ឡាវ មីយ៉ាន់ម៉ា និងប្រទេសដទៃទៀតនៅក្នុងតំបន់ ។

លោក ម៉ាសាយូគី ស្ហីមូរ៉ា អគ្គនាយក SMBC ប្រចាំអាស៊ីប៉ាស៊ីហ្វិក និងជាអ្នកគ្រប់គ្រងទីផ្សារដែលកំពុងមានការលូតលាស់ បានមានប្រសាសន៍ថា ក្នុងទស្សនៈនៃការពង្រីកសេដ្ឋកិច្ចកម្ពុជា SMBC បានចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការធុរៈកិច្ចជាមួយធនាគារ អេស៊ីលីដា ភីអិលស៊ី តាំងពីខែសីហា ឆ្នាំ២០១២ និងបានលើកស្ទួយកិច្ចសហប្រតិបត្តិការធុរៈកិច្ចចាប់ពីពេលនោះមក ។ ជាក់ស្តែងនៅខែមករា ឆ្នាំ២០១៤ SMBC បានចាប់ផ្តើមផ្តល់ការគាំទ្រផ្នែកប្រតិបត្តិការដល់ធនាគារ អេស៊ីលីដា ភីអិលស៊ី ក្នុងការបង្កើតផ្នែកសាជីវកម្មអន្តរជាតិសម្រាប់បម្រើសេវាពិគ្រោះយោបល់ជូនអតិថិជនសាជីវកម្មអន្តរជាតិរបស់ធនាគារ អេស៊ីលីដា ភីអិលស៊ី ។

ពេលនេះ SMBC បានវិនិយោគដោយផ្ទាល់ក្នុងធនាគារ អេស៊ីលីដា ភីអិលស៊ី តាមរយៈការទិញយកភាគហ៊ុន ចំនួន ១២,២៥% ពី IFC ដោយទទួលបានការអនុម័តពីធនាគារជាតិនៃកម្ពុជា ។ SMBC មានមោទនភាពយ៉ាងក្រៃលែងដែលមានឱកាសធ្វើជាដៃគូជាមួយធនាគារ អេស៊ីលីដា ភីអិលស៊ី ។ ការវិនិយោគនេះ មានគោលដៅពង្រីកកិច្ចសហប្រតិបត្តិការ និងទំនាក់ទំនងដែលមានស្រាប់រវាងធនាគារទាំងពីរ ។ SMBC ប្តេជ្ញាខ្ពស់ក្នុងការបំពេញតម្រូវការជូនអតិថិជននៅអាស៊ី រួមទាំងប្រទេសកម្ពុជា តាមរយៈទំនាក់ទំនងកិច្ចសហប្រតិបត្តិការជាមួយធនាគារ អេស៊ីលីដា ភីអិលស៊ី បន្ថែមលើតួនាទីការិយាល័យតំណាងរបស់ SMBC នៅរាជធានីភ្នំពេញ ដែលមាននាទីផ្តល់ព័ត៌មាន ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ធនាគារ អេស៊ីលីដា ភីអិលស៊ី ពេញចិត្តយ៉ាងខ្លាំងចំពោះ IFC ជាដៃគូយុទ្ធសាស្ត្រយូរអង្វែង ដែលបានគាំទ្រការរីកចម្រើនរបស់ធនាគារ អេស៊ីលីដា ភីអិលស៊ី អស់រយៈពេលជាងមួយទសវត្សរ៍កន្លងមកនេះ ហើយធនាគារ អេស៊ីលីដា ភីអិលស៊ី នៅតែបន្តភាពជាដៃគូ និងកិច្ចសហប្រតិបត្តិការល្អ ដើម្បីគាំទ្រដល់ការរីកចម្រើននៅថ្ងៃអនាគត ។ IFC បានជួយដល់ធនាគារ អេស៊ីលីដា ភីអិលស៊ី ឱ្យមានជំហររឹងមាំ និងផ្តល់ជូនធនាគារ អេស៊ីលីដា ភីអិលស៊ី នូវវិនិយោគិនដ៏ល្បីឈ្មោះគឺ SMBC ។ តាមរយៈការវិនិយោគទុនរបស់ SMBC នៅក្នុងធនាគារ អេស៊ីលីដា ភីអិលស៊ី យើងអាចសហការគ្នាបើកទំព័រថ្មីក្នុងការអនុវត្តនូវស្តង់ដារ និងបច្ចេកទេសធនាគារជាលក្ខណៈអន្តរជាតិ ។ កម្មករនិយោជិតធនាគារ អេស៊ីលីដា ភីអិលស៊ី ទាំងអស់បន្តកិច្ចខិតខំប្រឹងប្រែង ដើម្បីកសាងចំណេះជំនាញអាជីព ក្នុងការបម្រើជូនសេវាកម្មហិរញ្ញវត្ថុយ៉ាងសម្បូរបែប ដោយផ្តោតលើតម្រូវការអតិថិជនគ្រប់មជ្ឈដ្ឋានក្នុងសហគមន៍ជាតិ និងអន្តរជាតិ រហូតដល់ទទួលទំនុកចិត្តពីសាធារណជនទាំងក្នុង និងក្រៅប្រទេស ។ ធនាគារ អេស៊ីលីដា ភីអិលស៊ី មានមោទនភាពសូមប្រកាសថា SMBC វិនិយោគភាគហ៊ុនចំនួន ១២,២៥% នៅក្នុងធនាគារ អេស៊ីលីដា ភីអិលស៊ី ។ នេះជាសក្ខីភាពបញ្ជាក់ថាធនាគារ អេស៊ីលីដា ភីអិលស៊ី មានសក្តានុពលភាពទាក់ទាញបាននូវវិនិយោគិនដែលជាសាជីវីកម្មធនាគារដ៏ធំ និងល្បីឈ្មោះដូច SMBC ។ ការវិនិយោគរបស់ SMBC ជាមួយធនាគារ អេស៊ីលីដា ភីអិលស៊ី អាចរួមបញ្ចូលបទពិសោធន៍ធនាគារជាង ១២០ឆ្នាំ លើវិស័យធនាគារ ជាពិសេសបទពិសោធន៍អន្តរជាតិ ។ ដូច្នេះធនាគារ អេស៊ីលីដា ភីអិលស៊ី អាចសម្រេចគោលដៅយុទ្ធសាស្ត្រ ជាធនាគារថ្នាក់តំបន់នៅក្នុងសហគមន៍សេដ្ឋកិច្ចអាស៊ាននាពេលអនាគត ។

លោកក៏បានបន្តទៀតថា ចាប់តាំងពីបើកប្រតិបត្តិការដំបូងរហូតដល់ឆ្នាំ២០១៤ និងឆ្នាំបន្តបន្ទាប់ ធនាគារ អេស៊ីលីដា ភីអិលស៊ី នៅតែបន្តអភិវឌ្ឍជាប់ជាប្រចាំប្រកបដោយនិរន្តរភាពនូវបណ្តាញអគារការិយាល័យ និងហេដ្ឋារចនាសម្ព័ន្ធធនាគារអេឡិចត្រូចនិក ដោយធ្វើការសម្របសម្រួល ជាបន្តបន្ទាប់តាមសភាវពាណិជ្ជកម្ម និងផលិតផល-សេវាកម្មហិរញ្ញវត្ថុ និងធ្វើបច្ចុប្បន្នកម្មផលិតផល-សេវាកម្មធនាគារអេឡិចត្រូនិក ដើម្បីបម្រើសេវាកម្មឱ្យកាន់តែល្អប្រសើរជូនដល់អតិថិជន ឱ្យមានការរីកចម្រើនប្រកបដោយនិរន្តរភាព ។ ហេដ្ឋារចនាសម្ព័ន្ធធនាគារអេឡិចត្រូនិក និងផលិតផល-សេវាកម្មហិរញ្ញវត្ថុទាំងនោះរួមមាន សេវាអេស៊ីលីដាយូនីធី ជាសេវាធនាគារតាមទូរសព្ទដៃ ម៉ាស៊ីនដាក់ប្រាក់ ម៉ាស៊ីនដកប្រាក់ស្វ័យប្រវត្តិ (ATM) ម៉ាស៊ីនឆូតកាតអេស៊ីលីដា ដែលជាឧបករណ៍អេឡិចត្រូនិកសម្រាប់ប្រើជាមួយប័ណ្ណអេស៊ីលីដា និងប័ណ្ណរបស់ធនាគារផ្សេងៗ សម្រាប់ធ្វើការទូទាត់ទំនិញ ឬសេវាកម្ម ប្រកបដោយភាពងាយស្រួល និងមានសុវត្ថិភាពខ្ពស់ ។ ទន្ទឹមនឹងនោះ សេវាអេស៊ីលីដាអ៊ីនធើណែត ដែលជាសេវាលំដាប់ថ្នាក់ពិភពលោក ដែលមានលក្ខណៈងាយស្រួលប្រកបដោយសុវត្ថិភាពខ្ពស់ សម្រាប់អតិថិជនប្រើប្រាស់ស្វ័យប្រតិបត្តិការ ពោលគឺអតិថិជនអាចបម្រើសេវា ឬធ្វើប្រតិបត្តិការដោយខ្លួនឯង (Self Service) តាមតម្រូវការគ្រប់ពេលវេលា គ្រប់ទីកន្លែង រហូតដល់២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ ដោយពុំចាំបាច់ធ្វើដំណើរមកកាន់ការិយាល័យធនាគារ អេស៊ីលីដា ភីអិលស៊ី ឡើយ ។

អំពីធនាគារ អេស៊ីលីដា ភីអិលស៊ី

ធនាគារ អេស៊ីលីដា ភីអិលស៊ី បានបង្កើតឱ្យមានអារ្យភាវូបនីយកម្មទាន់សម័យនូវសេវាកម្មហិរញ្ញវត្ថុ អស់រយៈពេលជាង២២ឆ្នាំមកហើយ ដើម្បីបម្រើសេវាកម្មហិរញ្ញវត្ថុ ជូនដល់អតិថិជនទាំងវិស័យឯកជន និងវិស័យសាធារណៈ តាមរយៈបណ្តាញប្រតិបត្តិការរហូតដល់ ២៥២សាខា និងមានក្រុមហ៊ុនបុត្រសម្ព័ន្ធ ចំនួនបួនគឺ អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ, ធនាគារ អេស៊ីលីដា ឡាវ (មាន ៤១ការិយាល័យ) និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា (មាន ៦ការិយាល័យ) ជាមួយនឹងទ្រព្យសកម្មសរុបចំនួនជិតបីពាន់លានដុល្លារអាមេរិក គិតមកត្រឹមខែកក្កដា ឆ្នាំ២០១៤ នេះ ។

អំពី International Finance Corporation

IFC ជាសមាជិកក្រុមធនាគារពិភពលោក គឺជាស្ថាប័នអភិវឌ្ឍន៍ពិភពលោកធំជាងគេបំផុត ដោយផ្តោតការយកចិត្តទុកដាក់ជាពិសេសលើវិស័យឯកជន ។ តាមរយៈកិច្ចសហប្រតិបត្តិការ ជាមួយសហគ្រាសឯកជនជាង១០០ប្រទេស IFC បានប្រើប្រាស់ដើមទុន ជំនាញបច្ចេកទេស ចូលរួមចំណែកក្នុងការលុបបំបាត់ភាពក្រីក្រ និងធ្វើឱ្យមានការរីកចម្រើន ។ ក្នុងឆ្នាំ២០១៣ ការវិនិយោគរបស់ IFC បានកើនឡើងដល់ជិតម្ភៃប្រាំពាន់លានដុល្លារអាមេរិក ដែលបានគាំទ្រនិងលើកទឹកចិត្តដល់វិស័យឯកជនក្នុងការបង្កើតការងារ និងដំណោះស្រាយបញ្ហាប្រឈមដែលជាឧបសគ្គដល់ការអភិវឌ្ឍនៅលើពិភពលោក ។ សម្រាប់ព័ត៌មានបន្ថែម សូមទស្សនាវេបសាយ ៖ www.ifc.org ។

អំពី Sumitomo Mitsui Banking Corporation

គិតត្រឹមថ្ងៃទី៣១ ខែមីនា ឆ្នាំ២០១៤ SMBC គឺជាធនាគារធំមួយក្នុងចំណោមធនាគារធំជាងគេ ទាំង១០នៅលើពិភពលោក ដោយមានទ្រព្យសកម្មជាងមួយពាន់បីរយពាន់លានដុល្លារអាមេរិក អនុបាតដើមទុនថ្នាក់ទី១ គឺ ១៣,៤៣%, Credit Rating: A+(S&P) និង Aa3 (Moody's) ។ SMBC មានសាខាក្នុងស្រុកចំនួន ៥០៥ (មិនរាប់បញ្ចូលអនុសាខា និងទីភ្នាក់ងារ) និងមានសាខាក្រៅប្រទេស ចំនួន ៤១ (រាប់បញ្ចូលទាំងអនុសាខា និងការិយាល័យតំណាង) នៅលើពិភពលោក ។ ក្រុមហ៊ុនមេ Sumitomo Mitsui Financial Group, Inc. (SMFG) បានចុះបញ្ជីនៅតូក្យូ, Nagoya និង New York Stock Exchange និងមូលធនកម្មទីផ្សារមានប្រហែល ៥៧ពាន់លានដុល្លារអាមេរិក គិតត្រឹមដំណាច់ខែកក្កដា ឆ្នាំ២០១៤ ។

Sumitomo Mitsui Banking Corporation មានផលិតផល-សេវាកម្មយ៉ាងសម្បូរបែប មានដូចជា បា្រក់បញ្ញើ, ឥណទាន, ជំនួញ និងជើងសាមូលបត្រ, ការវិនិយោគមូលបត្រ, ផ្ទេរបា្រក់, ប្តូរប្រាក់, សេវាកម្ម Corporate Bond Trustee និងសេវាកម្មប្រអប់បញ្ញើសុវត្ថិភាព, Financial Futures Underwriting, Investment Trust Sales និងផលិតផល-សេវាកម្មធនាគារពាណិជ្ជផ្សេងៗទៀត ។ SMBC ក៏បានបង្កើតឱ្យមានផងដែរនូវ Investment Banking, ភតិសន្យា, Consumer Finance និងប័ណ្ណឥណទាន ។ SMBC ជាបុត្រសម្ព័ន្ធរបស់ SMFG សហការជាមួយបុត្រសម្ព័ន្ធដទៃទៀតបម្រើសេវាកម្មហិរញ្ញវត្ថុដ៏មានគុណភាពជូនដល់អតិថិជន ។ សម្រាប់ព័ត៌មានបន្ថែម សូមទស្សនាវេបសាយ ៖ www.smfg.co.jp/english ។

សម្រាប់ព័ត៌មានបន្ថែម សូមទាក់ទងតាមរយៈ ៖

បណ្ឌិត សូ ផនណារី
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល : phonnary@acledabank.com.kh

លោក ព្រំ វិសុទ្ធ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល : visoth@acledabank.com.kh

ធនាគារ​ធំ​ជាង​គេ​របស់​ប្រទេស​ជប៉ុន SMBC បាន​វិនិយោគ​ជា​មួយ​ធនាគារ អេស៊ីលីដា ភីអិលស៊ី

អំពី​ធនាគារ អេស៊ីលីដា ភីអិលស៊ី

អំពី International Finance Corporation

អំពី Sumitomo Mitsui Banking Corporation

ធនាគារធំជាងគេរបស់ប្រទេសជប៉ុន SMBC បានវិនិយោគជាមួយធនាគារ អេស៊ីលីដា ភីអិលស៊ី

អំពីធនាគារ អេស៊ីលីដា ភីអិលស៊ី