ព័ត៌មានព័ត៌មានមូលបត្រថ្មីៗក្រុមហ៊ុនធំឈានមុខគេបង្អស់ចំនួនពីររបស់ប្រទេសជប៉ុន បានទិញភាគហ៊ុនបន្ថែមនៅក្នុងធនាគារ អេស៊ីលីដា ភីអិលស៊ី

ក្រុមហ៊ុនធំឈានមុខគេបង្អស់ចំនួនពីររបស់ប្រទេសជប៉ុន បានទិញភាគហ៊ុនបន្ថែមនៅក្នុងធនាគារ អេស៊ីលីដា ភីអិលស៊ី

ថ្ងៃទី២៤ ខែសីហា ឆ្នាំ២០១៥

ភ្នំពេញ, ថ្ងៃទី២៤ ខែសីហា ឆ្នាំ២០១៥ - យោងតាមការអនុម័តរបស់ធនាគារជាតិនៃកម្ពុជា ចុះថ្ងៃទី១៧ ខែសីហា ឆ្នាំ២០១៥, ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យក្នុងព្រះរាជាណាចក្រកម្ពុជា បានប្រកាសក្នុងថ្ងៃនេះថា ក្រុមហ៊ុនធំឈានមុខគេបង្អស់ចំនួនពីររបស់ប្រទេសជប៉ុន បានទិញភាគហ៊ុនពី ជេ អេស អេធ អេ អេធ អិល (JSH Asian Holdings Limited) ដែលជាក្រុមហ៊ុនបុត្រសម្ព័ន្ធរបស់ ចាឌីន (Jardine Strategic Holdings Limited) នៅក្នុងធនាគារ អេស៊ីលីដា ភីអិលស៊ី គឺធនាគារ អេស អ៊ឹម ប៊ី ស៊ី (Sumitomo Mitsui Banking Corporation) បានទិញភាគហ៊ុនបន្ថែមចំនួន ៦% ធ្វើឲ្យភាគហ៊ុនដែលមានស្រាប់កើនឡើងដល់ចំនួន ១៨,២៥% និងក្រុមហ៊ុនសាជីវកម្មហិរញ្ញវត្ថុ អូរិច ខបផូរេហ្សិន (ORIX Corporation) បានទិញភាគហ៊ុនបន្ថែមចំនួន ៦,២៥% ធ្វើឲ្យភាគហ៊ុនដែលមានស្រាប់កើនឡើងដល់ចំនួន ១២,២៥% ។

លោក សូស៊ូគី ម៉ូរី អគ្គនាយកធនាគារ អេស អ៊ឹម ប៊ី ស៊ី ប្រចាំតំបន់អាស៊ីប៉ាស៊ីហ្វីក បានមានប្រសាសន៍ថា "យើងបានចាប់ផ្តើមវិនិយោគក្នុងធនាគារ អេស៊ីលីដា ភីអិលស៊ី តាំងពីខែសីហា ឆ្នាំ២០១២ ហើយយើងបានទទួលជោគជ័យក្រៃលែងពីការវិនិយោគនេះ ហើយជាកិត្តិយសរបស់ធនាគារ អេស អ៊ឹម ប៊ី ស៊ី ដែលបានទិញភាគហ៊ុនបន្ថែមចំនួន ៦% នៅក្នុងធនាគារ អេស៊ីលីដា ភីអិលស៊ី ។ ការវិនិយោគបន្ថែមនេះ ជំរុញការខិតខំប្រឹងប្រែងរបស់ ធនាគារ អេស អ៊ឹម ប៊ី ស៊ី សម្រេចបានយុទ្ធសាស្ត្រកាន់កាប់ទីផ្សារអាស៊ីឆាប់រហ័ស និងផ្តល់លទ្ធភាពដល់ធនាគារ អេស អ៊ឹម ប៊ី ស៊ី បម្រើសេចក្តីត្រូវការចម្រុះរបស់អតិថិជន តាមរយៈការពង្រីកបណ្តាញប្រតិបត្តិការនៅក្នុងប្រទេសដែលមានសេដ្ឋកិច្ចកំពុងរីកចម្រើន យើងចង់ចូលរួមការអភិវឌ្ឍសេដ្ឋកិច្ចកម្ពុជាបន្ថែមទៀត និងគាំទ្រធនាគារ អេស៊ីលីដា ភីអិលស៊ី ដើម្បីសម្រេចបានទស្សនវិស័យក្នុងការផ្តល់សេវាកម្មហិរញ្ញវត្ថុល្អបំផុតជូនសាធារណជនគ្រប់មជ្ឈដ្ឋានក្នុងសហគមន៍ តាមរយៈទំនាក់ទំនងដ៏ជ្រាលជ្រៅនេះ" ។

លោក ស៊ូជី អីរី នាយកប្រតិបត្តិ និងប្រធានខាងវិនិយោគនៃក្រុមហ៊ុន អូរិច ខបផូរេហ្សិន បានមានប្រសាសន៍ថា "យើងជឿជាក់ធនាគារ អេស៊ីលីដា ភីអិលស៊ី ជាធនាគារពាណិជ្ជក្នុងព្រះរាជាណាចក្រកម្ពុជា ដែលទទួលបានជោគជ័យខ្លាំងជាងគេបំផុត ។ យើងមានមោទនភាពណាស់ ដែលក្រុមហ៊ុន អូរិច ខបផូរេហ្សិន បានទិញភាគហ៊ុនបន្ថែមនៅក្នុងធនាគារ អេស៊ីលីដា ភីអិលស៊ី ។ យើងនឹងចូលរួមចំណែកក្នុងការអភិវឌ្ឍ និងពង្រីកប្រតិបត្តិការធនាគារ អេស៊ីលីដា ភីអិលស៊ី នៅក្នុងដំណាក់កាលនៃការរីកចម្រើន និងពង្រីកប្រតិបត្តិការនៅអាស៊ាន" ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី លោកបានមានប្រសាសន៍ថា "បទពិសោធន៍ជាង ២៣ឆ្នាំនេះ ធនាគារ អេស៊ីលីដា ភីអិលស៊ី មានការរីកចម្រើនខ្លាំងជាមួយអតិថិជន និងដៃគូយុទ្ធសាស្ត្រ ។ យើងតែងតែស្តាប់ដំបូន្មានដ៏មានតម្លៃរបស់អតិថិជន និងភាគីពាក់ព័ន្ធ ហើយបានផ្តល់ជូននូវផលិតផល និងសេវាកម្មហិរញ្ញវត្ថុសម្បូរបែបដែលពួកគេមានតម្រូវការ ។ លោកបានលើកឡើងបន្ថែមទៀតថា ការទិញភាគហ៊ុនបន្ថែមរបស់ធនាគារ អេស អ៊ឹម ប៊ី ស៊ី និងក្រុមហ៊ុន អូរិច ខបផូរេហ្សិន ជាសក្ខីភាពដែលឆ្លុះបញ្ចាំងថា វិនិយោគិនរបស់ប្រទេសជប៉ុនដ៏មានសក្តានុពលទាំងពីរនេះ មានការជឿជាក់មកលើធនាគារ អេស៊ីលីដា ភីអិលស៊ី ដែលសម្រេចបាននូវសមទ្ធផលដ៏ធំធេងឈានមុខគេក្នុងទីផ្សារហិរញ្ញវត្ថុ នៃព្រះរាជាណាចក្រកម្ពុជា និងទីផ្សារហិរញ្ញវត្ថុអាស៊ានផងដែរ" ។

លោកបណ្ឌិតបានបន្តទៀតថា "ការទិញភាគហ៊ុនបន្ថែមរបស់ភាគទុនិកទាំងពីរនេះ ធនាគារ អេស អ៊ឹម ប៊ី ស៊ី និងក្រុមហ៊ុន អូរិច ខបផូរេហ្សិន នឹងជួយពង្រឹងដើមទុននិងវិជ្ជាជីវៈធនាគារ បន្ថែមលើសមត្ថភាព ចំណេះជំនាញ បទពិសោធន៍ និងធនធានសម្បូរបែបដែលមានស្រាប់របស់ធនាគារ អេស៊ីលីដា ភីអិលស៊ី ទាំងក្នុងទីផ្សារអាស៊ាន និងទីផ្សារក្នុងតំបន់ ដើម្បីឆ្លើយតបតាមតម្រូវការរបស់អតិថិជន ចំពោះការប្រើប្រាស់សេវាហិរញ្ញវត្ថុដ៏ទូលំទូលាយ ។ ធនាគារ អេស អ៊ឹម ប៊ី ស៊ី និងក្រុមហ៊ុន អូរិច ខបផូរេហ្សិន បានទិញភាគហ៊ុនទាំងអស់ចំនួន ១២,២៥% របស់ក្រុមហ៊ុន ចាឌីន នៅក្នុងធនាគារ អេស៊ីលីដា ភីអិលស៊ី ។ ការផ្ទេរភាគហ៊ុនផ្ទៃក្នុងនេះ ធនាគារ អេស អ៊ឹម ប៊ី ស៊ី នឹងក្លាយជាភាគទុនិកដ៏សំខាន់មួយ ដែលកាន់កាប់ភាគហ៊ុននៅក្នុងធនាគារ អេស៊ីលីដា ភីអិលស៊ី ចំនួន ១៨,២៥% និងក្រុមហ៊ុន អូរិច ខបផូរេហ្សិន កាន់កាប់ចំនួន ១២,២៥%" ។

លោក ភីទ័រ ប៊ីនុន ប្រធានតំបន់សម្ព័ន្ធ ចាឌីន ម៉ាដស៊ុន បានមានប្រសាសន៍ថា "យើងជឿជាក់ចំពោះការវិនិយោគបន្ថែមដោយធនាគារ អេស អ៊ឹម ប៊ី ស៊ី និងក្រុមហ៊ុន អូរិច ខបផូរេហ្សិន គឺជាដំណើរការដ៏វិជ្ជមានសម្រាប់ការរីកចម្រើនទៅមុខរបស់ធនាគារ អេស៊ីលីដា ភីអិលស៊ី ។ យើងមានមោទនភាពណាស់ដែលកន្លងមកធ្លាប់ធ្វើជាភាគទុនិករបស់ធនាគារ អេស៊ីលីដា ភីអិលស៊ី ដែលទទួលបានការអភិវឌ្ឍយ៉ាងជោគជ័យក្នុងរយៈពេលប៉ុន្មានឆ្នាំមកនេះ ។ ចាឌីន នៅតែបន្តគាំទ្រ និងចូលរួមចំណែកក្នុងការអភិវឌ្ឍប្រទេសកម្ពុជានៅពេលអនាគត និងតាំងចិត្តយ៉ាងមុតមាំក្នុងការបន្តការវិនិយោគនៅកម្ពុជា ជាពិសេសក្នុងវិស័យអចលនទ្រព្យ និងការលក់រាយគ្រប់ប្រភេទ" ។

អំពី អេស អ៊ឹម ប៊ី ស៊ី (Sumitomo Mitsui Banking Corporation)

អេស អ៊ឹម ប៊ី ស៊ី គឺជាធនាគារជប៉ុនលំដាប់ពិភពលោក ដែលមានទ្រព្យសកម្មសរុបទាំងអស់ចំនួន ១.២៩០ (មួយពាន់ពីររយកៅសិប) ពាន់លានដុល្លារអាមេរិក អនុបាតដើមទុនថ្នាក់ទីមួយមាន ១២,៦១% និងទទួលបានចំណាត់ថ្នាក់ពីក្រុមហ៊ុនដែលផ្តល់ចំណាត់ថ្នាក់ហិរញ្ញវត្ថុអន្តរជាតិ អេ បូក ពី អេស អេន ភី និង អេ វ័ន ពី ម៉ូឌី នៅខែមីនា ឆ្នាំ២០១៥ ។ តាមរយៈបណ្តាញប្រតិបត្តិការក្នុងប្រទេសជប៉ុនចំនួន ៤៤១សាខា (ដោយមិនរាប់រួមបញ្ចូលអនុសាខា និងភ្នាក់ងារហិរញ្ញវត្ថុរបស់ធនាគារ) និងផ្សារហ៊ុននៅលើពិភពលោកចំនួន ៧០សាខា (រួមទាំងក្រុមហ៊ុនបុត្រសម្ព័ន្ធ អនុសាខា និងការិយាល័យតំណាង) ។ ធនាគារ អេស អ៊ឹម ប៊ី ស៊ី ផ្តល់សេវាហិរញ្ញវត្ថុទូលំទូលាយរួមមាន ៖ សេវាប្រាក់បញ្ញើ, សេវាសាជីវកម្មហិរញ្ញវត្ថុ, សេវារចនាសម្ព័ន្ធហិរញ្ញវត្ថុ, សេវាវិនិយោគមូលបត្រ, សេវាផ្ទេរប្រាក់, សេវាប្តូររូបិយប័ណ្ណបរទេស, សេវាគ្រប់គ្រងប័ណ្ណបំណុលសាជីវកម្ម និងធានាបញ្ញើទ្រព្យសម្បត្តិ, សេវាកិច្ចធានាហិរញ្ញវត្ថុនាពេលអនាគត និងសេវាបរធនបាល ។ ក្រុមហ៊ុនមេរបស់ធនាគារ អេស អ៊ឹម ប៊ី ស៊ី ដែលមានឈ្មោះថា អេស អ៊ឹម ហ្វេស ជី ជាក្រុមហ៊ុនចុះបញ្ជីបោះផ្សាយផ្សារហ៊ុននៅក្នុងទីក្រុងតូក្យូ ទីក្រុងណាហ្គូយ៉ា និងទីក្រុងញូយ៉ក ដែលមានដើមទុននៅក្នុងទីផ្សារប្រហែលចំនួន ៥៤ ពាន់លានដុល្លារអាមេរិក នៅក្នុងខែមីនា ឆ្នាំ២០១៥ ។ សម្រាប់ព័ត៌មានបន្ថែម សូមទស្សនាវេបសាយ www.smfg.co.jp/english ។

អំពី អូរិច ខបផូរេហ្សិន (ORIX Corporation)

អូរិច ខបផូរេហ្សិន ជាក្រុមហ៊ុនសាជីវកម្មហិរញ្ញវត្ថុរបស់ប្រទេសជប៉ុន ចុះបញ្ជីនៅទីក្រុងតូក្យូ (ធី អេស អ៊ី: ៨៥៩១) និងទីក្រុងញូយ៉ក (អ៊ិន វាយ អេស អ៊ី: ប្រាំបួន) ជាសម្ព័ន្ធសេវាហិរញ្ញវត្ថុមួយដែលផ្តល់ជូនអតិថិជននូវផលិតផល និងសេវាកម្មថ្មីៗប្រកបដោយតម្លាភាព ។ ក្រុមហ៊ុន អូរិច ខបផូរេហ្សិន បានបង្កើតឡើងក្នុងឆ្នាំ១៩៦៤ ផ្តើមចេញពីការបម្រើសេវាភតិសន្យា ហើយបច្ចុប្បន្នក្រុមហ៊ុន អូរិច ខបផូរេហ្សិន បានពង្រីកសេវាកម្មរួមមាន ៖ សេវាផ្តល់កម្ចី, សេវាវិនិយោគ, សេវាធានារ៉ាប់រងអាយុជីវិត, សេវាធនាគារ, សេវាគ្រប់គ្រងទ្រព្យសកម្ម, សេវាពាក់ព័ន្ធជាមួយយានយន្តគ្រប់ប្រភេទ, សេវាអចលនទ្រព្យ, និងសេវាសហគ្រាសពាក់ព័ន្ធនឹងថាមពល និងបរិស្ថាន ។ តាំងពីពង្រីកបណ្តាញប្រតិបត្តិការលើកដំបូងនៅបរទេស ផ្តើមចេញពីទីក្រុងហុងកុងនៅឆ្នាំ១៩៧១ ក្រុមហ៊ុន អូរិច ខបផូរេហ្សិន បានពង្រីកអាជីវកម្មលើពិភពលោកដែលមាននិរន្តរភាព ដោយបានបោះទីតាំងធ្វើប្រតិបត្តិការនៅ ៣៦ប្រទេស និងនៅតាមតំបន់មួយចំនួនទូទាំងសកលលោក ។ គោលដៅបន្តទៀតរបស់ក្រុមហ៊ុន អូរិច ខបផូរេហ្សិន គឺមានបំណងចែករំលែកសេវាហិរញ្ញវត្ថុដល់សង្គម និងបន្តការចាប់យកកាលានុវត្តភាពធុរកិច្ចថ្មីៗបន្ថែមទៀត ។ សម្រាប់ព័ត៌មានបន្ថែម សូមទស្សនាវេបសាយរបស់ក្រុមហ៊ុន អូរិច ខបផូរេហ្សិន តាមរយៈ www.orix.co.jp/grp/en ។

អំពី ធនាគារ អេស៊ីលីដា ភីអិលស៊ី

ធនាគារ អេស៊ីលីដា ភីអិលស៊ី "ប្រជាធនាគារដែលលោកអ្នកជឿទុកចិត្ត" បានក្លាយជាធនាគារលំដាប់លេខមួយនៅក្នុងព្រះរាជាណាចក្រកម្ពុជា តាំងពីឆ្នាំ២០១០ ។ ធនាគារ អេស៊ីលីដា ភីអិលស៊ី បានបង្កើតឡើងក្នុងឆ្នាំ១៩៩៣ ជាអង្គការក្រៅរដ្ឋាភិបាលមួយ ដែលមានទិសដៅអភិវឌ្ឍសហគ្រាសខ្នាតតូច និងខ្នាតតូចបំផុតតាមរយៈការផ្តល់ឥណទាន ។ នៅខែតុលា ឆ្នាំ២០០០ ទទួលបានអាជ្ញាប័ណ្ណជាធនាគារឯកទេសពីធនាគារជាតិនៃកម្ពុជា និងនៅឆ្នាំ២០០៣ ទទួលបានអាជ្ញាប័ណ្ណប្រតិបត្តិការជាធនាគារពាណិជ្ជពីធនាគារជាតិនៃកម្ពុជា ។ ធនាគារ អេស៊ីលីដា ភីអិលស៊ី មានបណ្តាញប្រតិបត្តិការរហូតដល់ ២៥៥ការិយាល័យទូទាំងព្រះរាជាណាចក្រកម្ពុជា និង ៤១ការិយាល័យនៅប្រទេសឡាវ និង០៦ការិយាល័យនៅប្រទេសមីយ៉ាន់ម៉ា ដោយមានទ្រព្យសកម្មសរុបចំនួនជាង ៣.៦៤៣ (បីពាន់ប្រាំមួយរយសែសិបបី) លានដុល្លារអាមេរិក, សមតុល្យឥណទានសរុបចំនួនជាង ២.៣០៥ (ពីរពាន់បីរយប្រាំ) លានដុល្លារអាមេរិក និងបា្រក់បញ្ញើសន្សំ សរុប ចំនួនជាង ២.៦៣៧ (ពីរពាន់ប្រាំមួយរយសាមសិបប្រាំពីរ) លានដុល្លារអាមេរិក នៅដំណាច់ខែមិថុនា ឆ្នាំ២០១៥ ។ ធនាគារ អេស៊ីលីដា ភីអិលស៊ី មានក្រុមហ៊ុន បុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ, និងអេស៊ីលីដា មីក្រូហិរញ្ញវត្ថុ មីយ៉ាន់ម៉ា ។

សម្រាប់ព័ត៌មានបន្ថែម សូមទាក់ទងតាមរយៈ ៖

ធនាគារ អេស៊ីលីដា ភីអិលស៊ី
លោក ព្រំ វិសុទ្ធ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល: visoth@acledabank.com.kh