ព័ត៌មានព័ត៌មានមូលបត្រថ្មីៗអេស៊ីលីដា ស៊ីឃ្យួរឹធី ភីអិលស៊ី ទទួលបានអាជ្ញាបណ្ណ ធ្វើអាជីវកម្មជើងសាមូលបត្រដំបូងគេនៅក្នុងព្រះរាជាណាចក្រកម្ពុជា

អេស៊ីលីដា ស៊ីឃ្យួរឹធី ភីអិលស៊ី ទទួលបានអាជ្ញាបណ្ណ ធ្វើអាជីវកម្មជើងសាមូលបត្រដំបូងគេនៅក្នុងព្រះរាជាណាចក្រកម្ពុជា

ឯកឧត្តមឧបនាយករដ្ឋមន្ត្រី គាត ឈន់ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការមូលបត្រកម្ពុជា ប្រគល់អាជ្ញាបណ្ណជូនលោក ឆាយ សឿន ប្រធានក្រុមប្រឹក្សាភិបាលអេស៊ីលីដា ស៊ីឃ្យួរឹធី ភីអិលស៊ី

ថ្ងៃទី០២ ខែវិច្ឆិកា ឆ្នាំ២០១០

រាជធានីភ្នំពេញ ថ្ងៃទី០២ ខែវិច្ឆិកា ឆ្នាំ២០១០ ៖ អេស៊ីលីដា ស៊ីឃ្យួរឹធី ភីអិលស៊ី បានទទួលអាជ្ញាបណ្ណពីគណៈកម្មការមូលបត្រកម្ពុជា ធ្វើអាជីវកម្មជើងសាមូលបត្រដំបូងគេនៅក្នុងព្រះរាជាណាចក្រកម្ពុជា ។

អេស៊ីលីដា ស៊ីឃ្យួរឹធី ភីអិលស៊ី ជាក្រុមហ៊ុនបុត្រសម្ព័ន្ធរបស់ធនាគារអេស៊ីលីដា ភីអិលស៊ី មានដើមទុនចំនួន ៦ពាន់លានរៀល ដែលវិនិយោគ ១០០ភាគរយ ដោយធនាគារអេស៊ីលីដា ភីអិលស៊ី ។

អេស៊ីលីដា ស៊ីឃ្យួរឹធី ភីអិលស៊ី នឹងផ្ដល់នូវសេវាល្អបំផុតលើវិស័យមូលបត្រ និងជម្រើសសម្បូរបែបលើមូលបត្រជូនដល់សាធារណជនគ្រប់មជ្ឈដ្ឋានក្នុងសហគមន៍ ដែលមានការិយាល័យស្ថិតនៅក្នុងអគារការិយាល័យកណ្ដាលរបស់ធនាគារអេស៊ីលីដា អគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ។

លោក ស្វាយ ហៃ អគ្គនាយក អេស៊ីលីដា ស៊ីឃ្យួរឹធី ភីអិលស៊ី បានសំដែងនូវក្ដីសោមនស្សរីករាយ និងថ្លែងអំណរគុណដ៏ជ្រាលជ្រៅចំពោះគណៈកម្មការមូលបត្រកម្ពុជាដែលបានផ្ដល់ទំនុកចិត្ដមកលើ អេស៊ីលីដា ស៊ីឃ្យួរឹធី ភីអិលស៊ី តាមរយៈការផ្ដល់អាជ្ញាបណ្ណនេះ ។

អាជ្ញាបណ្ណក្រុមហ៊ុនមូលបត្រ

លោកបានបន្ថែមទៀតថា ដោយទទួលបានការគាំទ្រពីសំណាក់អតិថិជន និងសាធារណជនទូទៅលើផលិតផល និងសេវាកម្មដែលធនាគារអេស៊ីលីដា កំពុងបម្រើជូនអតិថិជន ធនាគារអេស៊ីលីដា បាននិងកំពុងពង្រីកសក្ដានុពលរបស់ខ្លួនតាមរយៈតួនាទីជាក្រុមហ៊ុនអន្ដរការីនេះរួមទាំង ឱកាសវិនិយោគជាច្រើនទៀតក្នុងវិស័យមូលបត្រ ដែលជាវិស័យមួយដ៏ថ្មីស្រឡាងក្នុងការផ្ដល់សេវាកម្មហិរញ្ញវត្ថុ បំពេញបន្ថែមទៅលើប្រព័ន្ធធនាគារដែលមានស្រាប់ក្នុងការកៀរគរមូលធន និងជាកម្លាំងចលករនៃកំណើនសេដ្ឋកិច្ច ។

លោក ស្វាយ ហៃ បានមានប្រសាសន៍ទៀតថា ក្រៅពីការិយាល័យមានលក្ខណៈទំនើប និងការរៀបចំប្រព័ន្ធបច្ចេកវិជ្ជាព័ត៌មានដ៏សមស្រប អេស៊ីលីដា ស៊ីឃ្យួរឹធី ភីអិលស៊ី មានយន្ដការចែករំលែកព័ត៌មានដ៏ទូលំទូលាយ និងទាន់សម័យតាមរយៈវេបសាយរបស់ខ្លួន ដើម្បីជាមធ្យោបាយផ្សព្វផ្សាយនូវរាល់ព័ត៌មានសំខាន់ៗ ដូចជា របាយការណ៍ហិរញ្ញវត្ថុ តារាងតម្លៃហ៊ុន បទប្បញ្ញត្ដិនានាក្នុងវិស័យមូលបត្រ ជាដើម ជូនដល់សាធារណជនទាំងក្នុង និងក្រៅប្រទេស ។

នៅក្នុងឱកាសដ៏ពិសេសនេះ លោក អ៊ិន ចាន់នី ប្រធាននាយកប្រតិបត្ដិ ធនាគារអេស៊ីលីដា បានមានប្រសាសន៍ថា "ការបង្កើត អេស៊ីលីដា ស៊ីឃ្យួរឹធី ភីអិលស៊ី ជាជម្រើសថ្មីមួយទៀតសម្រាប់អតិថិជន និងសាធារណជន អាចប្រើប្រាស់ធនធានហិរញ្ញវត្ថុសម្រាប់បង្កើនទ្រព្យសម្បត្តិ និងប្រភពចំណូលឱ្យប្រសើរឡើង មានឱកាសរួមចំណែកធ្វើជាម្ចាស់ភាគហ៊ុននៅក្នុងក្រុមហ៊ុនធំៗ និងនិរន្ដរភាពលើការវិនិយោគតាមរយៈ អេស៊ីលីដា ស៊ីឃ្យួរឹធី" ។

សម្រាប់ព័ត៌មានបន្ថែម សូមទំនាក់ទំនងតាមរយៈ ៖

លោក ស្វាយ ហៃ អគ្គនាយក អេស៊ីលីដា ស៊ីឃ្យួរឹធី ភីអិលស៊ី
អ៊ីម៉ែល ៖
វេបសាយ ៖ www.acledasecurities.com.kh

លោក ហោ ស៊ីម៉េត ប្រធានប្រតិបត្ដិការ
អ៊ីម៉ែល ៖

លោក លឹម ច័ន្ទតារា ប្រធានភ្នាក់ងារក្រុមហ៊ុនមូលបត្រ
អ៊ីម៉ែល ៖

« ព័ត៌មានមូលបត្រថ្មីៗ