ព័ត៌មានព័ត៌មានមូលបត្រថ្មីៗធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយ UnionPay International

ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយ UnionPay International

ថ្ងៃទី២២ ខែមេសា ឆ្នាំ២០១៣

ភ្នំពេញ ថ្ងៃទី២២ ខែមេសា ឆ្នាំ២០១៣ ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ និងជាប្រជាធនាគារដែលលោកអ្នកជឿទុកចិត្តបានប្រកាសថ្ងៃនេះថា ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយក្រុមហ៊ុន UnionPay International Co., Ltd. សម្រាប់បម្រើសេវាកម្មទូទាត់ ដ៏ល្អប្រសើរលំដាប់ថ្នាក់ពិភពលោកដែលផ្តល់អត្ថប្រយោជន៍គ្នាទៅវិញទៅមក ។

លោក Xu Laode ប្រធាននាយកប្រតិបត្តិ China UnionPay និងជាអនុប្រធានក្រុមប្រឹក្សាភិបាលក្រុមហ៊ុន UnionPay International បានមានប្រសាសន៍ថា ៖ បច្ចុប្បន្ន UnionPay International មានកាតចំនួនជាង ៣,៥ពាន់លានកាត និងបានពង្រីកវិសាលភាពបណ្តាញប្រតិបត្តិការនៅ ១៤១ប្រទេស ទូទាំងពិភពលោក ដោយរួមបញ្ចូលទាំងប្រទេសវៀតណាម ។ ជាមួយគ្នានេះដែរ មកដល់ចុងឆ្នាំ២០១២ UnionPay បានបញ្ចេញកាតរបស់ខ្លួននៅជាង ៣០ប្រទេស និងក្នុងតំបន់ ។ ទំហំប្រតិបត្តិការកាតធនាគារដែលដំណើរការតាមរយៈបណ្តាញ UnionPay International មានចំនួនជាង ៣៧០០ ពាន់លានដុល្លារអាមេរិក នាំឱ្យជាប់លំដាប់ថ្នាក់លេខ២ ធំជាងគេនៅលើពិភពលោក ហើយនឹងបន្តរក្សាកំណើនយ៉ាងឆាប់រហ័ស ។ លោកក៏បានបន្តទៀតថា លោកនឹងធ្វើកិច្ចសហប្រតិបត្តិការជាមួយធនាគារ អេស៊ីលីដា ភីអិលស៊ី តាមរយៈកិច្ចព្រមព្រៀង ស្តីពីការផ្តល់អាជ្ញាប័ណ្ណលើយីហោ ឬស្លាកសញ្ញាផ្សាយពាណិជ្ជកម្ម និងបង្ហាញពីសារៈសំខាន់ដែលគួរឱ្យកត់សម្គាល់របស់ភាគីទាំងពីរដែលបានបើកទំព័រថ្មីនៃកិច្ចសហប្រតិបត្តិការពាណិជ្ជកម្មជាមួយគ្នា ។ លោកមានក្តីសង្ឃឹមយ៉ាងមុតមាំថា ធនាគារ អេស៊ីលីដា ភីអិលស៊ី នឹងទទួលយកទាំងស្រុងនូវកាតរបស់ UnionPay ដែលមានពាក្យស្លោក "UnionPay" នៅជាមួយអ្នក ។

លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ ធនាគារ អេស៊ីលីដា ភីអិលស៊ី មានមោទនភាពដែលក្រុមហ៊ុន UnionPay International ដែលជាក្រុមហ៊ុនឈានមុខគេលំដាប់ពិភពលោកខាងផ្នែកសេវាកម្មទូទាត់ និងជាក្រុមហ៊ុនទូទាត់លំដាប់ថ្នាក់លេខ១ នៅប្រទេសចិន បានសម្រេចជ្រើសរើសធនាគារ អេស៊ីលីដា ភីអិលស៊ី ជាដៃគូយុទ្ធសាស្ត្រក្នុងការធ្វើសហប្រតិបត្តិការបម្រើសេវាកម្មទូទាត់ សម្រាប់ផ្តល់ជូនអតិថិជនរបស់យើង ក៏ដូចជាប្រជាពលរដ្ឋកម្ពុជាទាំងអស់តាមរយៈសាខាធនាគារ អេស៊ីលីដា ភីអិលស៊ី ជាពិសេសតាមរយៈម៉ាស៊ីនឆូតកាតចំនួន ៩៦២ គ្រឿង ដែលស្ថិតនៅតាមបណ្តាសាខា ធនាគារ អេស៊ីលីដា ភីអិលស៊ី និងហាងលក់ទំនិញ-សេវាកម្ម នៅទូទាំងប្រទេសកម្ពុជា ។

ភាពជាដៃគូ ជាមួយក្រុមហ៊ុន UnionPay International ផ្តល់នូវផលប្រយោជន៍ដ៏ធំសម្បើម រួមមានដូចជា ៖

សម្រាប់អតិថិជន ៖ ផ្តល់ជូនពួកគាត់ជាមួយការទូទាត់លំដាប់ថ្នាក់ពិភពលោកដែលមានភាពងាយស្រួល និងឆាប់រហ័សនៅទូទាំង ១៤១ប្រទេសជុំវិញពិភពលោក និងមានជាង ៣០ប្រទេសដែលចេញកាត UnionPay គិតមកដល់ចុងឆ្នាំ២០១២ ។
សម្រាប់ធនាគារ អេស៊ីលីដា ភីអិលស៊ី ៖ បង្កើតប្រភពចំណូលថ្មី ។
សម្រាប់ UnionPay International ៖ ទទួលបានអត្ថប្រយោជន៍ទៅវិញទៅមកពីភាពជឿជាក់របស់អតិថិជន នៃធនាគារ អេស៊ីលីដា ភីអិលស៊ី ដែលជាប្រជាធនាគារដែលលោកអ្នកជឿទុកចិត្ត ហើយធនាគារ អេស៊ីលីដា ភីអិលស៊ី និង UnionPay International អាចមានការរីកចម្រើន និងទទួលបានជោគជ័យជាមួយគ្នា តាមរយៈបណ្តាញប្រតិបត្តិការការិយាល័យ និងសាខាដ៏ធំរបស់ធនាគារអេស៊ីលីដា ។

ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ ក្នុងការបម្រើសេវា ហិរញ្ញវត្ថុដ៏ល្អបំផុតជូនអតិថិជន និងសាធារណជនគ្រប់មជ្ឈដ្ឋាននៅក្នុងសហគមន៍ ជាមួយនឹងបទពិសោធន៍រយៈពេលជាង២១ឆ្នាំ និងមានបណ្ដាញប្រតិបត្តិការរហូតដល់ ២៣៨ ការិយាល័យគ្របដណ្តប់គ្រប់ខេត្ត-រាជធានី នៃព្រះរាជាណាចក្រកម្ពុជា និង ៣១ ការិយាល័យ នៅប្រទេសឡាវ និង១ ការិយាល័យនៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបជាង ២ពាន់លានដុល្លារអាមេរិក នៅត្រីមាសទី១ ឆ្នាំ២០១៣ ។ បច្ចុប្បន្ន ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនបួន គឺធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។ មិនតែប៉ុណ្ណោះ ធនាគារ អេស៊ីលីដា ភីអិលស៊ី នឹងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសមានសក្តានុពលនៅតាមដងទន្លេមេគង្គ ផ្អែកតាមយុទ្ធសាស្ត្ររបស់ខ្លួន ។

សម្រាប់ព័ត៌មានបន្ថែម សូមទាក់ទងតាមរយៈ

លោកស្រីបណ្ឌិត សូ ផនណារី អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម
អ៊ីម៉ែល ៖

ធនាគារ អេស៊ីលីដា ភីអិលស៊ី ចុះ​ហត្ថលេខា​លើ​អនុស្សរណៈ​នៃ​ការ​យោគយល់​គ្នា​ជាមួយ UnionPay International

ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយ UnionPay International