ENGLISH
navigate_nextព័ត៌មានnavigate_nextព័ត៌មានសេដ្ឋកិច្ចកម្ពុជា និងសកលnavigate_nextCSX នឹងដាក់ឲ្យប្រើប្រាស់កម្មវិធីជួញដូរជាប្លុក
CSX នឹងដាក់ឲ្យប្រើប្រាស់កម្មវិធីជួញដូរជាប្លុក
ថ្ងៃទី២៧ ខែធ្នូ ឆ្នាំ២០១៦ | ប្រភព ៖ ឌឹភ្នំពេញប៉ុស្ត៍
ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានឲ្យដឹងថានឹងអនុវត្តឧបករណ៍ថ្មីមួយដើម្បីជំរុញផ្សារហ៊ុនថ្មី នេះឲ្យមានសម្ទុះ តាមរយៈកម្មវិធីជួញដូរជាប្លុក (ជាការជួញដូរភាគហ៊ុនក្នុងបរិមាណដ៏ច្រើន) ដែលនឹងអនុញ្ញាតឲ្យក្រុមវិនិយោគិននិងបុគ្គលជួញដូរភាគហ៊ុនក្នុង បរិមាណដ៏ច្រើននៅក្រៅប្រតិបតិ្តការទីផ្សារប្រចាំថ្ងៃតាមរយៈ ប្រតិបត្តិការចរចាគ្នា។
លោក ល្មុន សូឡី ប្រធានប្រតិបត្តិការទីផ្សារនៅ CSX បានឲ្យដឹងថា ផ្សារហ៊ុនបានអភិវឌ្ឍកម្មវិធីនេះរួចហើយ ហើយឆាប់ៗនេះនឹងបញ្ជូនទៅឲ្យគណៈកម្មការមូលបត្រកម្ពុជា (SECC) ដើម្បីពិនិត្យ។ លោកលើកឡើងថា៖ "កម្មវិធីជួញដូរជាប្លុក របស់យើងត្រូវបានអភិវឌ្ឍរួចហើយ និងត្រៀមជាស្រេចសម្រាប់ប្រើប្រាស់"។ លោកបន្តថា៖ "ប៉ុន្តែការជួញដូរជាប្លុកនេះនឹងត្រូវបានចាប់ផ្ដើមបន្ទាប់ពី មានការយល់ព្រមពី SECC អំពីបទប្បញ្ញត្តិជាប់ពាក់ព័ន្ធ។ យើងគ្រោងនឹងផ្ញើទៅ SECC នៅក្នុងរយៈពេលពីរបីសប្ដាហ៍ទៀត"។
ខណៈការជួញដូរជាប្លុក ជាធម្មតាធ្វើឡើងក្នុងផ្សារហ៊ុនប្រទេសអភិវឌ្ឍន៍ជាច្រើនដែលកំណត់ ទិសដៅលើវិនិយោគិនជាស្ថាប័នធំៗ ធនាគារអភិវឌ្ឍន៍ និងមូលនិធិការពារហានិភ័យ ដែលចង់ទិញក្នុងបរិមាណច្រើននៅក្នុងទីផ្សារបើកចំហ ដែលអាចបណ្ដាលឲ្យមានការប្រែប្រួលបរិមាណខ្លាំងនោះ លោក សូឡី បានឲ្យដឹងថា ប្រសិនបើវាត្រូវបានទទួលយក វានឹងបន្ថយហានិភ័យ។ លោកបញ្ជាក់ថា៖ "ការជួយសម្រួលដល់ការជួញដូរជាប្លុកនេះមិនមានបំណងជាសំខាន់លើ ក្រុមវិនិយោគិនជាស្ថាប័ននោះទេ ដោយសារតែទីផ្សាររបស់យើងនៅតូចនៅឡើយ"។ លោកបន្តថា៖ "យើងគ្រាន់តែចង់បំពេញតម្រូវការរបស់ក្រុមវិនិយោគិនប៉ុណ្ណោះ បុគ្គល ឬស្ថាប័ន ដែលចង់ជួញដូរចំនួនច្រើនជាមួយសមភាគីតាមរយៈការចរចាក្រៅទីផ្សារនេះ"។ លោកបន្ថែមថា ការលក់ជាប្លុកនេះនឹងទទួលបានតម្លៃពេញចិត្តដែលបានចរចាមុនពេល ការកាន់កាប់ ហើយនឹងមិនប៉ះពាល់ខ្លាំងដល់តម្លៃភាគហ៊ុននោះទេ។
លោក សូឡី បានឲ្យដឹងថា ការជួញដូរជាប្លុក នឹងត្រូវបានស្វាគមន៍ដោយក្រុមវិនិយោគិន ដែលបាននិងកំពុងស្វែងរកជម្រើសទទួលបានតម្លៃចរចា។ លោកឲ្យដឹងថា៖ "មានតម្រូវការជាច្រើនពីក្រុមវិនិយោគិន [ការជួញដូរជាប្លុក] ប៉ុន្តែយើងមិនអាចបម្រើពួកគេបានទេ ដែលតម្រូវឲ្យពួកគេជួញដូរបរិមាណច្រើននៅក្នុងផ្សារលក់ដេញថ្លៃនេះ។ ខ្ញុំជឿថា ក្រុមវិនិយោគិនជួញដូរធំៗនឹងសប្បាយរីករាយជាមួយរបៀបថ្មីនេះ"។
លោក ស្វាយ ហៃ អគ្គនាយកក្រុមហ៊ុនមូលបត្រ អេស៊ីលីដា ស៊ីឃ្យួរឹធី បានឲ្យដឹងថា ការជួញដូរជាប្លុកនេះអាចបើកផ្លូវសម្រាប់ក្រុមវិនិយោគិនជា ស្ថាប័នថ្មីធំៗចូលមកទីផ្សារនេះ ជាអ្វីដែលផ្សារហ៊ុននេះជា រឿយៗមិនអាចទាក់ទាញក្រៅពីនីតិវិធី ការបោះផ្សាយមូលបត្រជាសាធារណៈលើកដំបូង(IPO)នោះទេ។ លោកលើកឡើងថា៖ "ការជួញដូរជាប្លុក នេះគឺជាយន្តការមិនមែនជាការប្រកួតប្រជែង ដែលអនុញ្ញាតឲ្យស្ថាប័ន និងក្រុមវិនិយោគិនធំៗចរចាជាឯកជនសម្រាប់ការជួញដូរចំនួនភាគហ៊ុន ដែលបានកំណត់"។ លោកបញ្ជាក់ថា៖ "ខណៈដែលក្រុមវិនិយោគិនលក់រាយគ្របដណ្ដប់លើទីផ្សារនេះ វាល្អសម្រាប់ក្រុមវិនិយោគិនក្នុងការស្វែងរកការជួញដូរក្នុងបរិមាណច្រើនជាមួយនឹងការជួញដូរជាប្លុកនេះ"។
លោកបន្ថែមថា ការជួញដូរជាប្លុក គឺជាយន្តការទីផ្សារដែលប្រើប្រាស់ជាទូទៅ និងជាតម្រូវការខ្លាំងបំផុតនៅក្នុងប្រទេសកម្ពុជា។ លោកលើកឡើងថា៖ "ទីផ្សារនេះត្រូវការការជួញដូរជាប្លុក ជាពិសេសសម្រាប់ក្រុមវិនិយោគិនមានអាណត្តិ និងក្រុមវិនិយោគិនជាស្ថាប័ន និងក្រុមវិនិយោគិនរកប្រាក់ចំណូលផងដែរ ដែលពិចារណាបរិមាណផលភាគលាភកាន់តែខ្ពស់ ធៀបនឹងតម្លៃប្រាក់ចំណេញធម្មតា"។
លោក សុខ ដារ៉ា អនុប្រធាន SECC បានឲ្យដឹងថា ខណៈដែលលោកមិនអាចអត្ថាធិប្បាយថាតើការជួញដូរភាគហ៊ុនជាប្លុក នេះនឹងទទួលបានការយល់ព្រមពីនិយតករឬអត់នោះ "SECC គាំទ្រយ៉ាងខ្លាំងដល់គំនិតផ្ដួចផ្ដើមគ្រប់ប្រភេទដើម្បីលើកកម្ពស់ ការអភិវឌ្ឍផ្សារមូលបត្រនេះ"៕