នឹកគុណ និង តបគុណ

- បទកាកគតិ -

១-	ផ្គរលាន់ដើមឆ្នាំ	រំឭកបណ្តាំ	ឪពុកអ្នកម្តាយ
	រដូវភ្ជួររាស់	កាប់គាស់ខ្វល់ខ្វាយ	បាត់លោកសែនស្តាយ
		រូបលោកទាំងពីរ ។

២-	ស្រមៃឃើញពុក	ត្រៀមនង្គ័លទុក	ភ្ជួររាស់ថ្នាលទី
	ស្រមៃឃើញម៉ែ	ស្និទ្ធស្នេហ៍មូលមីរ	អ្នកប្រឹងសម្ភី
		ចិញ្ចឹមកូនចៅ ។

៣-	ពាក្យផ្អែមពីរោះ	ទៀងទាត់ឥតលោះ	ទៀបភ្លឺដាស់ហៅ
	មុននឹងទៅស្រែ	ពុកម៉ែប្រដៅ	ក្រែងកូននៅខ្លៅ
		លះខ្ជិលដំអក់ ។

៤-	ពពកអួអាប់	ក្អាត់ស្រែកសៀងសព្ទ	វាយោបោកបក់
	សន្ទូងរេរាំ	លំនាំខ្យល់ឆក់	ភ្លៀងបង្អុរស្រក់
		នឹកអនុសាសន៍ ។

៥-	រលឹមនឹកស្រែ	មួយរោចក្នុងខែ	កូនម៉ែចាំច្បាស់
	ខែភទ្របទ	ប្រាកដពេលណាស់	ខ្មែរទាំងក្មេងចាស់
		ផ្តើមបុណ្យកាន់បិណ្ឌ ។

៦-	បុណ្យឧទ្ទិសផល	លំដាប់រោចដល់	ទាំងខ្មែរទាំងចិន
	តបគុណរាល់ឆ្នាំ	ដប់ប្រាំភ្ជុំបិណ្ឌ	ឧទ្ទិសបុណ្យសិន
		សូមញាតិសុខសាន្ត ។

៧-	ទំនៀមទម្លាប់	គោរពតាមជាប់	ប្រពៃលំអាន
	កេរ្តិ៍គាប់ពុកម៉ែ	កូនថែគង់ថ្កាន	សូមពុកម៉ែក្សាន្ត
		ឋានសុខនិព្វាន ។

ជំនួយស្មារតី : អប់រំបណ្តុះកតញ្ញូ និងចូលរួមគោរពរក្សាទំនៀមទម្លាប់ ។