ស្តែងស្តីលើស ល្មើសសីលក្រម

- បទពាក្យ៩ បែបជាប់ទង -

១-	ការឆ្គាំឆ្គង	រងទើសទាក់	អ្នកជិតខាង
	កោងកាចកាង	សាងទ្រគោះ	ព្រោះគិតខ្លី
	ចិត្តច្រណែន	បែនច្របល់	កលអប្រីយ៍
	មិនគប្បី	ស្តីអាក្រក់	ល្អក់ដល់កាយ ។

២-	តួសម្តែង	ក្លែងតាមខឹង	ប្រឹងដណ្ដប់
	ស្រឡាញ់កប់	ស្អប់រើសយក	រករឿងផ្សាយ
	រឿងប្រឌិត	គិតកាឡៃ	ឆ្នៃក្លែងក្លាយ
	ឯងសប្បាយ	ផ្សាយអាក្រក់	ល្អក់ដល់ការ ។

៣-	ស្តែងស្តីលើស	ល្មើសសីលក្រម	ចំខុសក្រឹត្យ
	បាត់អ្នកស្និទ្ធ	ដ្បិតអាក្រក់	ល្អក់មិនថ្លា
	ប្រាសចាកពិត	មិត្តមិនគាប់	ទ្រព្យអសារ
	ថោកអាត្មា	ការមិនត្រូវ	ផ្លូវខុសគេ ។

៤-	ខុសវែងខ្លី	ស្តីឲ្យពិត	គិតពិចារណ៍
	យកគោលការណ៍	ប្រាកដចំ	អំណាចទ្វេ
	រាយការណ៍ស្តែង	ថ្លែងសច្ចៈ	ដាក់ជូនមេ
	ការគ្នាន់គ្នេរ	រេរិះគិត	ពិតរួមការ ។