កូនអើយស្តាប់ពុក

- បទកាកគតិ -

១-	ស្តាប់ពុកណាកូន	មុនឪពុកសូន្យ	កូនកុំតោះតើយ
	ចូរកូនប្រុងស្តាប់	ពុកប្រាប់ឱ្យហើយ	ការគួរសួរឆ្លើយ
		កុំធុញទ្រាន់អ្វី ។

២-	ចាស់អស់កម្លាំង	ការងារអស់ខ្លាំង	ខ្សោយទាំងស្មារតី
	ភ្លេចជ្រុងភ្លេចជ្រោយ	ថ្លោះធ្លោយសេចក្តី	គាប់ចង់ថាអ្វី
		ភ្លេចប្រយោគឃ្លា ។

៣-	ចាស់ហូបមិនឆ្ងាញ់	ជួនលើសជាតិខ្លាញ់	ឡើងឈាមមិនជា
	លើសខ្វះជាតិស្ករ	ត្រដរវេទនា	គ្មានធ្មេញទំពា
		រាករោគក្រពះ ។

៤-	ភ្នែកចាស់ស្រវាំង	ពព្រៀកចាញ់ចាំង	ស្តាប់ស្តីមិនលះ
	ច្រមុះខូចញាណ	មិនឃ្លានក្លិនជះ	ននៀលននះ
		ធុំទឹកធុំបាយ ។

៥-	យប់ថ្ងៃចុករួយ	រោគចាស់រែងព្រួយ	រួមរឹតពេញកាយ
	ប្រឹងដេកមិនលក់	ស្ទះស្ទក់ក្រហាយ	ទុក្ខមិនរសាយ
		កូនអើយរោគចាស់ ។

៦-	រៀនវាចាល្អ	ល្អចិត្តស្មោះសរ	ស្មោះសរច្បាប់ច្បាស់
	ច្បាស់កាយសុភាព	សុភាពស្គាល់ចាស់	ចាស់ពុកចាំណាស់
		កើតចាស់ឈឺស្លាប់ ។

៧-	កូនអើយលះលោភ	យល់ទោសកុំល្មោភ	យល់មោហ៍កុំចាប់
	លះបាបស្រាលធ្ងន់	សងគុណឱ្យឆាប់	ល្អគួរត្រងត្រាប់
		ថ្កើងយសសក្តា ។

ជំនួយស្មារតី : អប់រំបុត្រ និងបុត្រធីតា កុំឱ្យធុញទ្រាន់នឹងវ័យចាស់ជរា របស់ឳពុកម្តាយ និងឱ្យលះបង់នូវអំពើបាប ។

អប់រំ : ឱ្យកូនយល់អំពី គុណទោស និងដំណើរជីវិត ។