ព្រហ្មវិហារធម៌

- បទពាក្យ៧ -

*	កើតមកជាមនុស្សក្នុងលោកា	ឪម៉ែដូនតាថ្នាក់ដឹកនាំ
	តែងមានកូនចៅមើលថែទាំ	រួមរស់មួនមាំក្នុងគ្រួសារ ។

*	ធាតុជំរុញឱ្យអភិវឌ្ឍន៍	មង្គលប្រាកដមានសក្តា
	គឺពិតជាផុសពីចិន្តា	នាយក-នាយិកា ល្អឥតខ្ចោះ ។

*	ប្រកាន់យកព្រហ្មវិហារធម៌	ប្រតិបត្តិបវរដោយស្ម័គ្រស្មោះ
	មេត្តាអាណិតកូនទាំងអស់	អាសូរស្រណោះសុធម្មា ។

*	ករុណារាប់អានផុសឡើងជាក់	នូវសុឆន្ទៈស្មោះស្ម័គ្រជា
	ស្រលាញ់ស្មោះស្មើរមនា	រក្សាគ្នីគ្នាជាអភិរម្យ ។

*	មុទិតាសន្តោសប្រណី	ត្រូវខុសវែងខ្លីចេះផ្សំផ្គុំ
	ទន់ភ្លន់ត្រជាក់តូចផលធំ	ដោះស្រាយសុខុមសមហេតុការណ៍ ។

*	ឧបេក្ខាតាំងចិត្តកណ្តាល	លម្អៀងអម្បាលគ្មានឡើយណា
	ចៀសអគតិគ្រប់កិច្ចការ	ស្វែងយល់រក្សាភាពសុក្រឹត ។