មនុស្សគំរូ

- បទកាកគតិ -

១-	អ្នកគ្រប់គ្រងល្អ	ស្មោះយុត្តិធម៌	ត្រឹមត្រូវឥតខ្ចោះ
	អត់ឱនមេត្តា	ករុណាដោយស្មោះ	ហេតុផលទាំងអស់
		ច្បាប់ជាមូលដ្ឋាន ។

២-	កាយចិត្តវាចា	សព្វទីឋានណា	ទន់ភ្លន់ថ្កើងថ្កាន
	គោរពគួរគាប់	មានភ័ព្វក្សេមក្សាន្ត	បត់បែនតាមឋាន
		ចូលស្ទឹងតាមបទ ។

៣-	មានសមត្ថភាព	តម្រូវរបៀប	កែច្នៃប្រាកដ
	បត់តាមវេលា	ល្អជាហ្មត់ចត់	ព្យាយាមអំណត់
		បត់ទៅតាមកាល ។

៤-	ចង់ឃើញចង់ដឹង	ចង់យល់ដំណឹង	តូចធំអម្បាល
	ចំណាប់អារម្មណ៍	ភិរម្យត្រកាល	ចិត្តត្រេកត្រអាល
		ចង់ចេះធ្វើល្អ ។

៥-	វិជ្ជាចំណេះ	តោងចងចាំចេះ	ខ្ពង់ខ្ពស់បវរ
	សព្វឋានប្រទេស	ស្គាល់ចេះច្បាស់ល្អ	ទំនៀមតំណ
		ដឹងសព្វទិសទី ។

៦-	ញាតិមិត្តពេញចិត្ត	ស្រឡាញ់អាណិត	រាប់រកមូលមីរ
	អំណត់អង់អាច	អំណាចនាទី	ល្អឯងគ្មានពីរ
		ស័ក្តិយសឡើងធំ ។

៧-	ពេញសមត្ថភាព	រួមការខ្ពស់ទាប	នៅក្នុងសង្គម
	សព្វបរិស្ថាន	ថ្កើងថ្កានជួបជុំ	គេឯងនិយម
		ជាមនុស្សគំរូ ។