ចង់ខ្ពស់បានទាប

- បទកាកគតិ -

១-	ថ្លែងអ្នកបម្រើ	បោសជូតជណ្ដើរ	គឺជ្រក់និងជ្រេញ
	ជ្រក់បម្រើយូរ	រអ៊ូទន្ទេញ	ខ្សឹបខ្សៀវប្រាប់ជ្រេញ
		លួចស្នេហ៍ចៅហ្វាយ ។

២-	ចៅហ្វាយស្រីធាត់	ស័ក្តិសមមុខមាត់	ត្រគាករីកសាយ
	ល្អម្ល៉េះសម្លាញ់	បានអញសប្បាយ	គ្រាន់តែប៉ះកាយ
		ក៏សុខចិត្តដែរ ។

៣-	ជ្រក់ស្នេហ៍រុញច្រាន	ស្នេហ៍ខ្លាំងក្លាហាន	ប្រាប់ជ្រេញហូរហែ
	ជ្រេញយល់ជ្រក់ស្តី	ឃ្មាតខ្មីរកខ្ញែរ	ដ្បិតជ្រក់កាត់ខែ
		សូកជ្រេញតាមថ្លៃ ។

៤-	យកខ្ញែរលាយម្សៅ	ល្បិចជ្រេញល្ងង់ខ្លៅ	យល់មានតម្លៃ
	លបលួចទៅដាក់	ទីស្នាក់អាស្រ័យ	ខុសម្ចាស់បានដៃ
		លោកប្រុសលាបប្រាណ ។

៥-	រមាស់រមែង	អេះញីរាស់រែង	រាលរោលរំខាន
	ជ្រេញទៅហៅពេទ្យ	ភ្លាមភ្លែតតាមបាន	ល្បិចកលដូរដាន
		ពេទ្យបានព្រមព្រៀង ។

៦-	ពេទ្យបានសំណូក	ដ្បិតជ្រេញបានសូក	ត្រាប់តាមទាន់ទៀង
	ថាជ្រក់ស័ក្តិសិទ្ធិ	អាចលិទ្ធដូចលាង	លិទ្ធសព្វល្អជាង
		ប្រើថ្នាំព្យាបាល ។

៧-	ហៅជ្រក់មកអាយ	ជ្រក់សែនសប្បាយ	អរត្រេកត្រអាល
	អរយល់បានលិទ្ធ	នែបនិត្យដល់ក្បាល	សម្រស់ត្រកាល
		លិទ្ធចៅហ្វាយស្រី ។

៨-	ចចើងចង់លាភ	ចង់ខ្ពស់បានទាប	ដូចជន្លេនដី
	បានលិទ្ធអ្នកប្រុស	គិតខុសស្មានស្រី	កម្មផលអប្រីយ៍
		លិទ្ធប្រុសគ្នាឯង ។

ជំនួយស្មារតី : អប់រំឲ្យចៀសរាល់គំនិត និងទង្វើអាក្រក់ ។