មន្តស្នេហ៍ទំនាក់ទំនង

- បទពាក្យ៩ បែបជាប់ទង -

១-	រាល់វាចា	ថាពាក្យពិត	គិតឱ្យចំ
	ប្រភពផ្សំ	ខំបញ្ចូល	ស្នូលសម្តី
	ពាក្យពីរោះ	យសថ្កុំថ្កើង	ឡើងរាសី
	ខុសកុំស្តី	ខ្លីគំនិត	រឹតតែវ៉ែ ។

២-	កាយគាប់គន់	ទន់ភ្លន់សម	ខំហ្វឹកហាត់
	ការម៉ឺងម៉ាត់	បាត់ឆ្គាំឆ្គង	គ្រងមន្តស្នេហ៍
	ឫកសមសួន	ខ្លួនមានយស	រស់ល្ហើយល្ហែ
	ដូចដួងខែ	ថែពន្លឺ	ភ្លឺពេកក្តាត់ ។

៣-	ចិត្តផូរផង់	អង្គកុសល	ផលស្មោះត្រង់
	លះបាបបង់	សង់អំណរ	តសព្វសត្វ
	លោភលន់លះ	ជ្រះកំហឹង	ប្រឹងកម្ចាត់
	ល្ងិតល្ងង់បាត់	ស្កាត់អំពល់	យល់ភប់ភ័ព្វ ។

៤-	ជនប្រុសស្រី	បីបានល្អ	សថ្លៃថ្លា
	គ្រប់ប្រាថ្នា	ការទាក់ទង	រងគុណគាប់
	ល្អរាល់ថ្ងៃ	ថ្លៃមាំមួន	ខ្លួនមានទ្រព្យ
	ប្រកាន់ខ្ជាប់	ធ្លាប់ប្រព្រឹត្ត	ពិតមានស្នេហ៍ ។

ជំនួយស្មារតី : អប់រំរំឭកការអនុវត្តកាយ វាចា និងចិត្ត ឱ្យល្អជានិច្ច ទុកជាទ្រព្យគាប់ប្រសើរ សម្រាប់ខ្លួន ដើម្បីបង្កើនគុណភាពក្នុងទំនាក់ទំនង និងជំនឿទុកចិត្ត