ព័ត៌មានព័ត៌មានថ្មីៗពិធីចុះហត្ថលេខាលើកិច្ចព្រមព្រៀងស្តីពីការទូទាត់...

ពិធីចុះហត្ថលេខាលើកិច្ចព្រមព្រៀងស្តីពីការទូទាត់ និងវិនិយោគឆ្លងព្រំដែនរវាងធនាគារអេស៊ីលីដា និងធនាគារក្រុងថៃ

ថ្ងៃទី២៧ ខែមេសា ឆ្នាំ២០០៩

ការចុះហត្ថលេខាលើកិច្ចព្រមព្រៀងរវាងធនាគារអេស៊ីលីដា និងធនាគារក្រុងថៃ

ថ្ងៃទី២៧ ខែមេសា ឆ្នាំ២០០៩ នេះ ធនាគារអេស៊ីលីដា ភីអិលស៊ី បានចុះហត្ថលេខាលើកិច្ចព្រមព្រៀងស្តីពីការទូទាត់ និងវិនិយោគឆ្លងព្រំដែន ជាមួយធនាគារក្រុងថៃ ភីស៊ីអិល ។ កិច្ចព្រមព្រៀងនេះ បានធ្វើឡើងដើម្បីពង្រឹងកិច្ចសហប្រតិបត្តិការឱ្យកាន់តែខ្លាំងឡើងថែមទៀតនៅក្នុងវិស័យធនាគារ ជាពិសេសការទូទាត់ក្នុងកិច្ចការពាណិជ្ជកម្ម និងកិច្ចការហិរញ្ញប្បទានពាណិជ្ជកម្មអន្តរជាតិនៃធនាគារទាំងពីរ ព្រមទាំងប្រទេសរបស់ខ្លួនផងដែរ ។ កិច្ចព្រមព្រៀងនេះ បានចុះហត្ថលេខាដោយ លោក ឆាយ សឿន ជាអនុប្រធាននាយកប្រតិបត្តិ និងជាប្រធាននាយកប្រតិបត្តិហិរញ្ញវត្ថុ តំណាងឱ្យធនាគារអេស៊ីលីដា ភីអិលស៊ី និងអ្នកស្រី Kittiya Todhanakasem ជាអនុប្រធាននាយកប្រតិបត្តិ និងជានាយិកាប្រតិបត្តិហិរញ្ញវត្ថុ តំណាងឱ្យធនាគារក្រុងថៃ ភីស៊ីអិល ។

ក្រោមកិច្ចព្រមព្រៀងនេះ ធនាគារទាំងពីរ នឹងផ្តល់ការគាំទ្រទៅវិញទៅមក ចំពោះអតិថិជនរបស់ខ្លួន ក៏ដូចជារវាងប្រទេសទាំងពីរ លើសកម្មភាពដូចខាងក្រោម ៖

ជំរុញកិច្ចសហប្រតិបត្តិការអន្តរជាតិ លើប្រព័ន្ធហិរញ្ញវត្ថុ និងធនាគារ
លើកកម្ពស់ប្រតិបត្តិការរូបិយវត្ថុ "រៀល" និងរូបិយប័ណ្ណ "បាត" នៅលើឆាកអន្តរជាតិ
បង្កើននូវប្រសិទ្ធភាព និងសុវត្ថិភាព នៃការទូទាត់ក្នុងកិច្ចការពាណិជ្ជកម្មឆ្លងដែន តាមប្រព័ន្ធធនាគាររវាងប្រទេសកម្ពុជា និងប្រទេសថៃ
ការផ្លាស់ប្តូរព័ត៌មានទាក់ទិននឹងវិធានច្បាប់ផ្ទៃក្នុង បទប្បញ្ញត្តិ គោលការណ៍នានា និងស្ថានភាពផ្សេងៗទៅវិញទៅមក ។

កិច្ចព្រមព្រៀងនេះ ជាការឈានឡើងមួយកម្រិតទៀតសម្រាប់ធនាគារអេស៊ីលីដា ភីអិលស៊ី ក្នុងការជួយសម្រួលប្រតិបត្តិការជូនអតិថិជន លើការទូទាត់ក្នុងកិច្ចការពាណិជ្ជកម្មនៅតាមព្រំដែនកម្ពុជា-ថៃ បន្ទាប់ពីធនាគារអេស៊ីលីដា បានចុះហត្ថលេខាប្រកបដោយជោគជ័យលើកិច្ចព្រមព្រៀងស្រដៀងគ្នាមួយ ជាមួយធនាគារមួយនៅប្រទេសវៀតណាម កាលពីខែកុម្ភៈ ឆ្នាំ២០០៦ ដែលគាំទ្រលើការទូទាត់ឆ្លងព្រំដែនរបស់អតិថិជនរបស់ខ្លួនរវាងប្រទេសកម្ពុជា និងវៀតណាម ហើយនឹងមានអានុភាពកាន់តែខ្លាំងថែមទៀត ចំពោះភាពរឹងមាំរបស់ធនាគារអេស៊ីលីដា ។

ប្រតិភូទស្សនាសាលបម្រើអតិថិជនរបស់ការិយាល័យកណ្តាលធនាគារអេស៊ីលីដា

ធនាគារអេស៊ីលីដា និងធនាគារក្រុងថៃ យល់យ៉ាងច្បាស់ថា សហប្រតិបត្តិការនេះនឹងអភិវឌ្ឍ ព្រមទាំងធ្វើឱ្យប្រសើរឡើងថែមទៀតនូវទំនាក់ទំនងពាណិជ្ជកម្មដ៏យូរអង្វែង ដើម្បីផលប្រយោជន៍របស់ធនាគារទាំងពីរ អតិថិជន និងភាគហ៊ុនិករបស់ខ្លួនផងដែរ ។

ធនាគារអេស៊ីលីដា ភីអិលស៊ី

ធនាគារអេស៊ីលីដា បច្ចុប្បន្នជាធនាគារធំបំផុតលំដាប់ទី២ នៃព្រះរាជាណាចក្រកម្ពុជា ខាងផ្នែកទ្រព្យសកម្មសរុប និងមានបណ្តាញប្រតិបត្តិការធំបំផុតសម្រាប់រយៈពេលជាង ១៦ឆ្នាំ ដែលបានបម្រើនៅក្នុងវិស័យហិរញ្ញវត្ថុនៅកម្ពុជា ។ មកដល់ចុងខែមីនា ឆ្នាំ២០០៩ សមតុល្យឥណទានបានកើនឡើងដល់ជាង ៤៥៦ លានដុល្លារអាមេរិក និងមានអតិថិជនដែលកំពុងទទួលប្រាក់កម្ចីជាង ២២៨.២១០នាក់ ។ សមតុល្យប្រាក់បញ្ញើ-សន្សំបានកើនឡើងដល់ ៥២៧ លានដុល្លារអាមេរិក ដែលមានគណនីប្រមាណ ៤៧០.៦៧៦គណនី ។ ទ្រព្យសកម្មសរុបបានឡើងដល់ជាង ៧៤៧ លានដុល្លារអាមេរិក និងមានបុគ្គលិកចំនួន ៦.៥២៤នាក់ ។ ដោយមានការបន្ថែមដើមទុនជាបន្តបន្ទាប់ ដើមទុនរបស់ធនាគារបានកើនឡើងរហូតដល់ ៦០លានដុល្លារអាមេរិក នៅក្នុងខែមករា ឆ្នាំ២០០៩ ធ្វើឱ្យធនាគារមានលទ្ធភាពក្នុងការពង្រីកសាខា និងកសាងបណ្តាញប្រតិបត្តិការអេធីអឹមខណៈដែលការបន្ថែមចុងក្រោយនេះ នឹងផ្តល់លទ្ធភាពឱ្យធនាគារមានភាពរីកចម្រើនឥតឈប់ឈរ ឈានទៅដល់គោលដៅយុទ្ធសាស្ត្ររបស់ធនាគារ ។

ធនាគារអេស៊ីលីដា ផ្តល់ជូននូវផលិតផលធនាគារ និងសេវាកម្មហិរញ្ញវត្ថុយ៉ាងធំទូលាយចំពោះគ្រប់អតិថិជន ទាំងជាក្រុមហ៊ុន និងជាឯកត្តបុគ្គល តាមរយៈបណ្តាញសេវាកម្មដ៏ធំទូលាយ ។ អេស៊ីលីដា ជាធនាគារឈានមុខគេក្នុងទីផ្សារធនាគារលក់រាយ និងទទួលបម្រើអតិថិជនដ៏ច្រើនរបស់ខ្លួនតាមរយៈបណ្តាញប្រតិបត្តិការមានចំនួន ២២៧ការិយាល័យ ។ ម៉ាស៊ីនអេធីអឹមចំនួន ៦១គ្រឿង ដាក់ឱ្យបម្រើសេវាកម្ម ២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ និងការិយាល័យទំនាក់ទំនងអតិថិជនដែលបម្រើការ ២៤ម៉ោងក្នុងមួយថ្ងៃនោះ បានធានាចំពោះអតិថិជនរបស់ខ្លួន ក្នុងការទទួលបានសេវាបម្រើគ្រប់ពេលវេលា ។

ធនាគារ ជាដៃគូសំខាន់ៗរបស់ធនាគារអេស៊ីលីដា នៅលើឆាកអន្តរជាតិរួមមាន ៖ HSBC Bank USA នៅញូយ៉ក, Standard Chartered Bank នៅញូយ៉ក ឡុងដុង និងហ្រេ្វងហ្វឺត, ING BELGUIM NV/SA នៅប៊្រូសែល, United Overseas Bank (Thai) Public Company Limited នៅបាងកក, Commonwealth Bank of Australia នៅស៊ីដនី, Vietnam Bank for Agriculture and Rural Development នៅហាណូយ, Bank of Nova Scotia នៅតូរ៉ុនតូ, Wachovia Bank N.A នៅញូយ៉កសាខាអន្តរជាតិ, Citibank N.A នៅញូយ៉ក, Sumitomo Mitsu Banking Corporation នៅតូក្យូ, Bank of America នៅញូយ៉ក, JPMorgan Chase N.A នៅញូយ៉ក និងធនាគារដៃគូអន្តរជាតិចំនួន ៤១៤ ផ្សេងទៀត (រាប់បញ្ចូលទាំងសាខាធនាគារដៃគូ) នៅក្នុងប្រទេសចំនួន ៥៤ ។

ធនាគារក្រុងថៃ ភីស៊ីអិល

ធនាគារក្រុងថៃ គឺជាធនាគារធំបំផុតលំដាប់លេខ២ នៅក្នុងប្រទេសថៃ ខាងផ្នែកទ្រព្យសកម្មសរុបដែលមានចំនួន ៣៩.៨៦០ លានដុល្លារអាមេរិក នៅក្នុងឆ្នាំ២០០៩ មានបុគ្គលិកសរុបចំនួន ១៦.៨៧០នាក់ បម្រើការងារនៅតាមការិយាល័យចំនួន ៨៥១ ។ សមតុល្យឥណទានសរុបចំនួន ៣០.៣៨៦ លានដុល្លារអាមេរិក និងមានអតិថិជនគ្រឹះដ៏រឹងមាំនៅក្នុងប្រទេសថៃ ។ ធនាគារក្រុងថៃ គឺជាធនាគារដៃគូសំខាន់ទី១៥ របស់ធនាគារអេស៊ីលីដា សម្រាប់គណនីរូបិយប័ណ្ណ "បាត" និង "ដុល្លារ" និងជាធនាគារដៃគូអន្តរជាតិទី២ របស់ធនាគារអេស៊ីលីដា ដែលធ្វើសហប្រតិបត្តិការលើការទូទាត់ឆ្លងព្រំដែន ដែលមានគណនី Nostro Account Relationship ជារូបិយប័ណ្ណ "ដុល្លារ" និងរូបិយវត្ថុ "រៀល" ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ការិយាល័យស្រុកបវេល ប្តូរទីតាំងថ្មី ព័ត៌មានបន្ទាប់ »
ការិយាល័យថ្មីស្រុកបរសេដ្ឋ ចាប់បើកបម្រើហើយ

ធនាគារ​អេស៊ីលីដា ភីអិលស៊ី

ធនាគារក្រុង​ថៃ ភីស៊ីអិល

ធនាគារអេស៊ីលីដា ភីអិលស៊ី

ធនាគារក្រុងថៃ ភីស៊ីអិល