ព័ត៌មានព័ត៌មានថ្មីៗពិធីសម្ពោធអគារថ្មី ការិយាល័យសាខាក្រុងបាត់ដំបង

ពិធីសម្ពោធអគារថ្មី ការិយាល័យសាខាក្រុងបាត់ដំបង

លោក ញឹក សារ៉ន នាយកធនាគារ អេស៊ីលីដា ភីអិលស៊ី សាខាក្រុងបាត់ដំបង

ថ្ងៃទី៣០ ខែមេសា ឆ្នាំ២០១០

នៅថ្ងៃទី៣០ ខែមេសា ឆ្នាំ២០១០ ធនាគារអេស៊ីលីដា សាខាក្រុងបាត់ដំបង មានទីតាំងស្ថិតនៅផ្ទះលេខ៦០២ ផ្លូវជាតិលេខ៥ ក្រុមទី១៣ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ឯកឧត្តមអភិបាលខេត្តបាត់ដំបង, ឯកឧត្តមក្រុមប្រឹក្សាខេត្ត ឯកឧត្តម-លោកជំទាវអភិបាលរងខេត្ត, ប្រធាននិងគណៈប្រតិភូសភាពាណិជ្ជកម្មអន្តរជាតិ, លោក-លោកស្រីមន្ត្រីអមសាលាខេត្ត និងអាជ្ញាធរមូលដ្ឋានគ្រប់លំដាប់ថ្នាក់, ប្រធាននិងក្រុមប្រឹក្សាភិបាលធនាគារអេស៊ីលីដា ព្រមទាំងភ្ញៀវកិត្តិយសជាតិ និងអន្តរជាតិជាច្រើននាក់ទៀត ។

លោក ញឹក សារ៉ន នាយកធនាគារ អេស៊ីលីដា ភីអិលស៊ី សាខាក្រុងបាត់ដំបង បានថ្លែងថា ៖ សាខាក្រុងបាត់ដំបង មានបណ្តាញប្រតិបត្តិការចំនួន ២ ដែលមានបុគ្គលិកចំនួន ៥៨នាក់ ម៉ាស៊ីនអេធីអឹមចំនួន ១គ្រឿង ទ្រព្យសកម្មសរុបមានចំនួនជាង ១,៥លានដុល្លារអាមេរិក សមតុល្យឥណទានជាង ៥០ម៉ឺនដុល្លារអាមេរិក និងអតិថិជនចំនួន ៣៩០នាក់ កំពុងដាក់ប្រាក់បញ្ញើ-សន្សំចំនួនជិត ១លានដុល្លារអាមេរិក ព្រមទាំងអតិថិជនជាច្រើននាក់ទៀត បាននិងកំពុងប្រើប្រាស់សេវាផ្សេងៗទៀត ។

លោកបានបន្ថែមថា ៖ ពេលនេះ ធនាគារ អេស៊ីលីដា ភីអិលស៊ី សាខាក្រុងបាត់ដំបង បានប្តូរទីតាំងមកអគារការិយាល័យថ្មី ដែលបានសាងសង់ឡើងតាមស្តង់ដារធនាគារពាណិជ្ជ ។ អគារនេះមាន ៣ជាន់ និងមានផ្ទៃក្រឡាសម្រាប់បំពេញការងារទំហំ ២.០៣០ម៉ែត្រការ៉េ ដែលក្នុងនោះរួមមានសាលដ៏ធំមួយ សម្រាប់ទទួលអតិថិជនទូទៅទំហំជាង ២១៦ម៉ែត្រការ៉េ ។ អគារនេះអាចផ្ទុកបុគ្គលិកបម្រើការងារបានរហូតដល់ជាង ១៥០នាក់ និងមានចំណតយានយន្តធំទូលាយសម្រាប់អតិថិជន និងបុគ្គលិក ។ អគារនេះ គឺសាងសង់តាមបទដ្ឋានស្តង់ដាររបស់ធនាគារអេស៊ីលីដា ដោយយកចិត្តទុកដាក់ខ្លាំងលើការរក្សាសន្តិសុខ កំណារពារអគ្គីភ័យ ការបម្រុងថាមពល ផាសុកភាព និងសុវត្ថិភាពការងារ ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា និងឯកឧត្តម ប្រាជ្ញ ចន្ទ អភិបាលខេត្តបាត់ដំបង

នៅក្នុងឱកាសដ៏ពិសេសនោះ លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា បានមានប្រសាសន៍ថា ៖ និរន្តរភាព គឺជាទិសដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមាននិរន្តរភាពសេវាកម្មហិរញ្ញវត្ថុបែបនេះ អស់រយៈពេល១៧ឆ្នាំមកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជន និងវិស័យសាធារណៈ តាមរយៈសាខា និងការិយាល័យទាំង២៤៨ ទូទាំងព្រះរាជាណាចក្រកម្ពុជា និងប្រទេសឡាវ ។

លោកបានបន្តទៀតថា ៖ បច្ចុប្បន្នធនាគារអេស៊ីលីដា មានអគារការិយាល័យស្តង់ដារចំនួន ៧៦ហើយ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនទាក់ទង និងប្រើប្រាស់សេវាហិរញ្ញវត្ថុនានា ជាពិសេសដើម្បីការពារសុវត្ថិភាពទ្រព្យសម្បត្តិរបស់អតិថិជន ដែលបាន និងកំពុងប្រើប្រាស់សេវាធនាគារអេស៊ីលីដាស្របតាមយុទ្ធសាស្ត្រ យូរអង្វែងរបស់យើង ។

លោកក៏បានថ្លែងអំណរគុណយ៉ាងជ្រាលជ្រៅផងដែរចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ និងអតិថិជនវៃឆ្លាតប្រមាណមួយលាននាក់ ដែលតែងតែជួយគាំទ្រធនាគារអេស៊ីលីដាតាំងពីដើមរៀងមក ហើយឆ្លើយតបទៅនឹងការគាំទ្រនេះ ធនាគារអេស៊ីលីដាបាននាំមកនូវសេវាថ្មី ទំនើបទាន់សម័យមុនគេបង្អស់នៅកម្ពុជាគឺ អេស៊ីលីដាយូនីធី ជាសេវាហិរញ្ញវត្ថុបម្រើជូនអតិថិជនរហ័សទាន់ចិត្ត ងាយប្រើប្រាស់ មានសុវត្ថិភាព ធ្វើឱ្យសុខកាយ សប្បាយចិត្ត គ្រប់ពេលវេលា គ្រប់ទីកន្លែង ដោយពុំចាំបាច់ធ្វើដំណើរមកសាខា និងការិយាល័យធនាគារអេស៊ីលីដាឡើយ ។ នេះបង្ហាញឱ្យឃើញថា សម្ព័ន្ធភាពដ៏រឹងមាំរបស់យើងទាំងអស់គ្នាជាឧបករណ៍ និងជាកាតាលីករដ៏សំខាន់បំផុត និងជាមធ្យោបាយដ៏មុតថ្លា ដើម្បីអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា ។

ឯកឧត្តម ប្រាជ្ញ ចន្ទ អភិបាលខេត្តបាត់ដំបង បានកត់សម្គាល់ថា ៖ កាលពីដើមឆ្នាំ២០០៣ ធនាគារអេស៊ីលីដា បានចាប់ផ្តើមប្រតិបត្តិការរបស់ខ្លួន ក្រោមរូបភាពជាការិយាល័យស្រុកពុំទាន់មានវិសាលភាពទូលំទូលាយនៅឡើយ ។ ដោយឡែកនៅដើមឆ្នាំ២០១០នេះ ធនាគារ អេស៊ីលីដា ភីអិលស៊ី សាខាបាត់ដំបង បានពង្រីកប្រតិបត្តិការរបស់ខ្លួនពេញលេញទូទាំងស្រុក-ក្រុងចំនួន ១៤ ក្នុងខេត្តបាត់ដំបង ព្រមទាំងបានរួមចំណែកយ៉ាងធំធេងក្នុងការអភិវឌ្ឍសេដ្ឋកិច្ច-សង្គមនៅក្នុងខេត្ត ក៏ដូចជាផ្តល់អត្ថប្រយោជន៍យ៉ាងច្រើនចំពោះប្រជាពលរដ្ឋ និងអ្នកប្រកបអាជីវកម្មដោយទទួលបាននូវប្រភពធនធានហិរញ្ញវត្ថុ ចូលរួមបង្កើតឱ្យមានការងារ ប្រភពចំណូល និងលើកកម្ពស់កម្រិតជីវភាពរស់នៅរបស់ប្រជាពលរដ្ឋ ។

« ព័ត៌មានមុន
ធនាគារ អេស៊ីលីដា បើកសាខាថ្មីទី២៣៣ នៅផ្សារលើ ព័ត៌មានបន្ទាប់ »
ធនាគារអេស៊ីលីដា ឈ្នះពានរង្វាន់ជើងឯកបាយ័នម្តងទៀត

ពិធី​សម្ពោធ​អគារ​ថ្មី ការិយាល័យ​សាខា​ក្រុង​បាត់ដំបង

ពិធីសម្ពោធអគារថ្មី ការិយាល័យសាខាក្រុងបាត់ដំបង