ព័ត៌មានព័ត៌មានថ្មីៗការចូលរួមបរិច្ចាគឈាមរបស់កម្មករនិយោជិត ធនាគារ អេស៊ីលីដា ភីអិលស៊ី

ការចូលរួមបរិច្ចាគឈាមរបស់កម្មករនិយោជិត ធនាគារ អេស៊ីលីដា ភីអិលស៊ី

ថ្ងៃទី២ ខែកុម្ភៈ ឆ្នាំ២០១៨

រាជធានីភ្នំពេញ, ថ្ងៃទី២ ខែកុម្ភៈ ឆ្នាំ២០១៨ ៖ ធនាគារ អេស៊ីលីដា ភីអិលស៊ី ជា ប្រជាធនាគារដែលលោកអ្នកជឿទុកចិត្ត និងជាធនាគារពាណិជ្ជនាំមុខគេក្នុងព្រះរាជាណាចក្រកម្ពុជា បានប្រកាសព័ត៌មាននៅថ្ងៃនេះថា ថ្នាក់ដឹកនាំ និងកម្មករនិយោជិតធនាគារ អេស៊ីលីដា ភីអិលស៊ី គ្រប់លំដាប់ថ្នាក់នៅការិយាល័យកណ្តាល និងនៅសាខាជុំវិញរាជធានីភ្នំពេញ បានចូលរួមបរិច្ចាគឈាមដោយស្ម័គ្រចិត្ត ដើម្បីជួយសង្គ្រោះជនរងគ្រោះ និងអ្នកជំងឺដែលត្រូវការឈាមពីគ្រប់មជ្ឈដ្ឋាន ។

បណ្ឌិត សូ ផនណារី អនុប្រធាននាយកប្រតិបត្ដិ និងជាគណៈប្រធាននាយិកាប្រតិបត្តិប្រតិបត្តិការ ធនាគារ អេស៊ីលីដា ភីអិលស៊ី

បណ្ឌិត សូ ផនណារី អនុប្រធាននាយកប្រតិបត្ដិ និងជាគណៈប្រធាននាយិកាប្រតិបត្តិប្រតិបត្តិការ ធនាគារ អេស៊ីលីដា ភីអិលស៊ី បានមានប្រសាសន៍ថា កម្មករនិយោជិតធនាគារ អេស៊ីលីដា ភីអិលស៊ី ធ្លាប់បានចូលរួមបរិច្ចាគឈាមដោយស្ម័គ្រចិត្តចំនួនបីដងរួចមកហើយ កាលពីថ្ងៃទី៥ ខែមេសា ឆ្នាំ២០១២, ថ្ងៃទី២៧ ខែមករា ឆ្នាំ២០១៦ និងថ្ងៃទី៣ ខែកុម្ភៈ ឆ្នាំ២០១៧ ។ ដោយឡែកថ្ងៃនេះជាលើកទីបួនហើយ ដែលធនាគារ អេស៊ីលីដា ភីអិលស៊ី បានបន្តចូលរួមចំណែកក្នុងសកម្មភាពសង្គម និងមនុស្សធម៌ ដើម្បីបំពេញតម្រូវការកង្វះឈាមដ៏មានសារៈសំខាន់ មួយនេះបន្ថែមទៀត តាមរយៈការបរិច្ចាគឈាមដោយស្ម័គ្រចិត្ត និងទឹកចិត្តមនុស្សធម៌ពីកម្មករនិយោជិតធនាគារ អេស៊ីលីដា ភីអិលស៊ី រួមទាំងកម្មករនិយោជិតនៃក្រុមហ៊ុនបុត្រសម្ព័ន្ធក្នុងប្រទេសរបស់ធនាគារ អេស៊ីលីដា ភីអិលស៊ី រួមមាន អេស៊ីលីដា ស៊ីឃ្យួរឹធី ភីអិលស៊ី និងវិទ្យាស្ថាន ពាណិជ្ជសាស្ត្រ អេស៊ីលីដា ជូនដល់មជ្ឈមណ្ឌលជាតិផ្តល់ឈាម ដើម្បីជួយសង្គ្រោះជនរងគ្រោះ និងអ្នកជំងឺដែលត្រូវការឈាមជាចាំបាច់ ជាពិសេសសម្រាប់ជួយជីវិតមនុស្សដែលត្រូវការសង្គ្រោះបន្ទាន់ ។

លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្ដល់ឈាម

លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្ដល់ឈាម បានមានប្រសាសន៍ថា សព្វថ្ងៃនេះយើងមិនទាន់មានឈាមដែលមានប្រភពពីអ្នកស្ម័គ្រចិត្ត គ្រប់គ្រាន់សម្រាប់ជួយសង្គ្រោះជីវិតមនុស្ស ដែលត្រូវការឈាមបន្ទាន់នៅឡើយទេ ។ ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការឈាមប្រមាណ ១៥០ ប្លោក សម្រាប់ជួយសង្គ្រោះជនរងគ្រោះ និងអ្នកជម្ងឺ ហើយនៅទូទាំងប្រទេសត្រូវការឈាមប្រមាណ ២០០ ប្លោក ជារៀងរាល់ថ្ងៃ ។ ដូចនេះ យើងត្រូវការឈាមបន្ថែមទៀត ដើម្បីសង្គ្រោះជីវិតមនុស្សបន្ទាន់ ។ លោកវេជ្ជបណ្ឌិត បានជំរុញ និងអំពាវទៅកាន់ប្រជាពលរដ្ឋខ្មែរទូទាំងប្រទេស ជាពិសេសក្រុមយុវជនមេត្តា ចូលរួមបរិច្ចាគឈាម ដើម្បីយកទៅជួយជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះ ពិតជាបានចូលរួមចំណែកយ៉ាងខ្លាំងលើការជួយសង្រ្គោះជីវិតមនុស្ស ។

លោកវេជ្ជបណ្ឌិត បានថ្លែងបញ្ជាក់ថា បើសិនជាគ្មានការចូលរួមចំណែកពីសប្បុរសជនស្ម័គ្រចិត្តទាំងឡាយនោះទេ មជ្ឈមណ្ឌលជាតិផ្តល់ឈាម និងមន្ទីរពេទ្យទាំងអស់ ព្រមទាំងគ្រួសារអ្នកជម្ងឺ ពិតជាមានការលំបាកដោយសារឈាមមានប្រភពពីក្នុងចំណោមប្រជាជនយើង ដូច្នេះការចូលរួមរបស់បងប្អូនពិតជាមានសារសំខាន់យ៉ាងខ្លាំងណាស់ ។ លោកវេជ្ជបណ្ឌិត ក៏បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំ និងកម្មករនិយោជិតធនាគារ អេស៊ីលីដា ភីអិលស៊ី គ្រប់លំដាប់ថ្នាក់ ដែលបានបរិច្ចាគឈាមជូនមជ្ឈមណ្ឌលជាតិផ្តល់ឈាម ដើម្បីជួយសង្រ្គោះដល់ជនរងគ្រោះដែលត្រូវការឈាមជាចាំបាច់នោះ ។

ធនាគារ អេស៊ីលីដា ភីអិលស៊ី បានបង្កើតក្រុមហ៊ុនបុត្រសម្ព័ន្ធចំនួនប្រាំ គឺធនាគារ អេស៊ីលីដា ឡាវ លីមីធីត, អេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ីលីដា, ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា, និងអេស៊ីលីដា ប្រូភើធី អិលធីឌី ព្រមទាំងមានការិយាល័យតំណាងនៅសាធារណរដ្ឋសហភាពមីយ៉ាន់ម៉ា ។ ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង ៥,១៨ ពាន់លានដុល្លារអាមេរិក សមតុល្យឥណទានសរុបចំនួន ៣,០២ ពាន់លានដុល្លារអាមេរិក និងប្រាក់បញ្ញើសន្សំសរុបចំនួន ៣,២៥ ពាន់លានដុល្លារអាមេរិក គិតត្រឹមខែធ្នូ ឆ្នាំ២០១៧ នេះ ។

« ព័ត៌មានមុន
សារប្រសិទ្ធពរ ឆ្នាំថ្មី-ឆ្នាំសកល ២០១៨ របស់ប្រធាននាយកប្រតិបត្តិ ព័ត៌មានបន្ទាប់ »
រូបភាពពិធី អបអរសាទរ បុណ្យចូលឆ្នាំថ្មី ប្រពៃណីជាតិខ្មែរ របស់ការិយាល័យកណ្តាល ធនាគារ អេស៊ីលីដា ភីអិលស៊ី

ការ​ចូល​រួម​បរិច្ចាគ​ឈាម​របស់​កម្មករ​និយោជិត ធនាគារ អេស៊ីលីដា ភីអិលស៊ី

ការចូលរួមបរិច្ចាគឈាមរបស់កម្មករនិយោជិត ធនាគារ អេស៊ីលីដា ភីអិលស៊ី