ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាបំពេញបន្ថែម ស្ដីពីការប្រើប្រាស់ប្រព័ន្ធទូទាត់អេឡិចត្រូនិក (E-Payment) សម្រាប់ប្រតិបត្ដិការទទួលចំណូលគយ និងរដ្ឋាករគ្រប់ប្រភេទ ជាមួយក្រសួងសេដ្ឋកិច្ច និងហិរញ្ញវត្ថុ

ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាបំពេញបន្ថែម ស្ដីពីការប្រើប្រាស់ប្រព័ន្ធទូទាត់អេឡិចត្រូនិក (E-Payment) សម្រាប់ប្រតិបត្ដិការទទួលចំណូលគយ និងរដ្ឋាករគ្រប់ប្រភេទ ជាមួយក្រសួងសេដ្ឋកិច្ច និងហិរញ្ញវត្ថុ

ថ្ងៃទី២១ ខែឧសភា ឆ្នាំ២០១៨

ពិធីចុះហត្ថលេខាលើអនុស្សរណៈនៃការយោគយល់គ្នាបំពេញបន្ថែម ស្ដីពីការប្រើប្រាស់ប្រព័ន្ធទូទាត់អេឡិចត្រូនិក (E-Payment) សម្រាប់ប្រតិបត្ដិការទទួលចំណូលគយ និងរដ្ឋាករគ្រប់ប្រភេទ រវាង ធនាគារ អេស៊ីលីដា ភីអិលស៊ី និង ក្រសួងសេដ្ឋកិច្ច និងហិរញ្ញវត្ថុ

រាជធានីភ្នំពេញ, ថ្ងៃចន្ទ ៧កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែឧសភា ឆ្នាំ២០១៨ ៖ ធនាគារ អេស៊ីលីដា ភីអិលស៊ី ប្រជាធនាគារដែលលោកអ្នកជឿទុកចិត្ត និងជាធនាគារពាណិជ្ជ នាំមុខគេក្នុងព្រះរាជាណាចក្រកម្ពុជា បានប្រកាសព័ត៌មាននៅថ្ងៃនេះថា ធនាគារ អេស៊ីលីដា ភីអិលស៊ី បានចុះអនុស្សរណៈនៃការយោគយល់គ្នាបំពេញបន្ថែម ស្ដីពីការប្រើប្រាស់ប្រព័ន្ធទូទាត់អេឡិចត្រូនិក (E-Payment) សម្រាប់ប្រតិបត្ដិការទទួលចំណូលគយ និងរដ្ឋាករគ្រប់ប្រភេទ ជាមួយក្រសួងសេដ្ឋកិច្ច និងហិរញ្ញវត្ថុ ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា តាមរយៈអនុស្សរណៈនៃការយោគយល់គ្នានេះ ធនាគារ អេស៊ីលីដា ភីអិលស៊ី នឹងបម្រើសេវាកម្មទូទាត់តាមប្រព័ន្ធទូទាត់អេឡិចត្រូនិក សម្រាប់ប្រតិបត្ដិការទទួលចំណូលគយ និងរដ្ឋាករគ្រប់ប្រភេទ របស់អគ្គនាយកដ្ឋានគយ និងរដ្ឋាករកម្ពុជា ។ ចំពោះធនាគារ អេស៊ីលីដា ភីអិលស៊ី អនុស្សរណៈនៃការយោគយល់គ្នានេះមានអត្ថន័យសារៈសំខាន់យ៉ាងជ្រាលជ្រៅ ដូចជា ៖ បើកទូលាយឱ្យធនាគារ អេស៊ីលីដា ភីអិលស៊ី ក្នុងនាមជាស្ថាប័នឯកជន បានចូលរួមចំណែកនៃការអនុវត្តកំណែទម្រង់វិស័យហិរញ្ញវត្ថុសាធារណៈ ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងបម្រើជូនវិស័យសាធារណៈដោយផ្ទាល់ក្នុងទ្រង់ទ្រាយធំ ដោយផ្តល់ឱកាសឱ្យធនាគារ អេស៊ីលីដា ភីអិលស៊ី បានបម្រើសេវាធនាគារពាណិជ្ជ ជូនដល់សាធារណជនគ្រប់មជ្ឈដ្ឋានក្នុងសហគមន៍ ។

លោកបណ្ឌិត បានបន្ថែមទៀតថា ធនាគារ អេស៊ីលីដា ភីអិលស៊ី ជឿជាក់យ៉ាងមុតមាំថា ការបម្រើសេវាកម្មនឹងទទួលបានកាន់តែច្រើន ព្រមទាំងធ្វើឱ្យគុណភាពសេវាកម្មតាមរយៈប្រព័ន្ធទូទាត់អេឡិចត្រូនិកនឹងផ្តល់នូវលក្ខណៈងាយស្រួល រហ័ស និងកាន់តែប្រសើរ ដោយសារធនាគារ អេស៊ីលីដា ភីអិលស៊ី យល់ដឹងច្បាស់ពីតម្រូវការ និងស្តាប់មតិយោបល់របស់អតិថិជន ដៃគូពាណិជ្ជកម្មរបស់ខ្លួន និងសាធារណៈជន ។

ធនាគារ អេស៊ីលីដា ភីអិលស៊ី បានបង្កើតក្រុមហ៊ុនបុត្រសម្ព័ន្ធចំនួនប្រាំ គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ីលីដា, ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា, និង អេស៊ីលីដា ប្រូភើធី អិលធីឌី ព្រមទាំងមានការិយាល័យតំណាងនៅសាធារណរដ្ឋ សហភាពមីយ៉ាន់ម៉ា ។ ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង ៥,៤៩ ប៊ីលានដុល្លារអាមេរិក សមតុល្យឥណទានសរុបចំនួន ៣,១៥ ប៊ីលានដុល្លារអាមេរិក និងប្រាក់បញ្ញើសន្សំសរុបចំនួន ៣,៥៧ ប៊ីលានដុល្លារអាមេរិក គិតត្រឹមខែមេសា ឆ្នាំ២០១៨ នេះ ។

សម្រាប់ព័ត៌មានបន្ថែម សូមទាក់ទង ៖

លោកស្រី ប៊ុត ប៊ុនសីហា
អនុប្រធាននាយកប្រតិបត្តិ និងជាប្រធាននាយិកាប្រតិបត្តិនីតិកម្ម
អ៊ីម៉ែល ៖ buth.bunsayha@acledabank.com.kh

លោក នេត ពិសិដ្ឋ
នាយកប្រតិបត្តិសេវាហិរញ្ញវត្ថុ
អ៊ីម៉ែល ៖ neth.piseth@acledabank.com.kh

« ព័ត៌មានមុន
រូបភាពពិធី អបអរសាទរ បុណ្យចូលឆ្នាំថ្មី ប្រពៃណីជាតិខ្មែរ របស់ការិយាល័យកណ្តាល ធនាគារ អេស៊ីលីដា ភីអិលស៊ី ព័ត៌មានបន្ទាប់ »
ពិធីចម្រើនមង្គលអគារការិយាល័យថ្មី ធនាគារ អេស៊ីលីដា ភីអិលស៊ី សាខាសែនសុខ (ផ្សារអ៊ីអន)