ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី បន្ថែមបណ្តាញប្រតិបត្តិការម៉ាស៊ីនអេធីអឹម ចំនួន ១១៥គ្រឿង ចាប់ពីខែឧសភា ឆ្នាំ២០២០

ធនាគារ អេស៊ីលីដា ភីអិលស៊ី បន្ថែមបណ្តាញប្រតិបត្តិការម៉ាស៊ីនអេធីអឹម ចំនួន១១៥គ្រឿង ចាប់ពីខែឧសភា ឆ្នាំ២០២០

ថ្ងៃទី១៩ ខែឧសភា ឆ្នាំ២០២០

ភ្នំពេញ ថ្ងៃអង្គារ ១៣រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែឧសភា ឆ្នាំ២០២០ ធនាគារ អេស៊ីលីដា ភីអិលស៊ី ជាធនាគារពាណិជ្ជ ដែលមានបណ្តាញប្រតិបត្តិការធំជាងគេនៅក្នុងព្រះរាជាណាចក្រកម្ពុជា មានកិត្តិយសសូមជម្រាបជូនដំណឹងដល់អតិថិជន និងសាធារណជនទាំងអស់មេត្តាទទួលជ្រាបថា ដើម្បីបំពេញនូវតម្រូវការ ស្របតាមយុទ្ធសាស្រ្តឌីជីថល ព្រមទាំងពង្រីកនូវវិសាលភាព គាំទ្រនូវការប្រើប្រាស់ប្រព័ន្ធបច្ចេកវិទ្យាលើសេវាហិរញ្ញវត្ថុជូនអតិថិជន និងសាធារណជន ឲ្យកាន់តែទូលំទូលាយ ធនាគារ អេស៊ីលីដា ភីអិលស៊ី បានបន្ថែមនូវបណ្តាញប្រតិបត្តិការម៉ាស៊ីនអេធីអឹម អេស៊ីលីដា ចំនួន ១១៥ គ្រឿង ចាប់ពីខែឧសភា ឆ្នាំ២០២០ នេះ ដែលសរុបទាំងអស់ចំនួន ៧៥១ គ្រឿង នៅទូទាំងប្រទេស ដើម្បីបម្រើជូនសាធារណជនអាចធ្វើប្រតិបត្តិការសេវាធនាគារ បានគ្រប់ពេលវេលា (២៤ម៉ោងក្នុងមួយថ្ងៃ និង៧ថ្ងៃក្នុងមួយសប្តាហ៍) មានលក្ខណៈងាយស្រួល និងសុវត្ថិភាពខ្ពស់បំផុត ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានបញ្ជាក់ថា "មានរយៈពេល១៣ឆ្នាំ គិតចាប់ពីឆ្នាំ២០០៧ ដែលធនាគារ អេស៊ីលីដា ភីអិលស៊ី បានដាក់ឱ្យដំណើរការ ប្រើប្រាស់ម៉ាស៊ីនអេធីអឹម អេស៊ីលីដា ជូនអតិថិជនធ្វើប្រតិបត្តិការសេវាកម្មធនាគារបានយ៉ាងរហ័ស ដោយអតិថិជនអាចជ្រើសរើសទីតាំងដែលនៅជិតបំផុត ជំនួសឱ្យការធ្វើដំណើរមកកាន់ការិយាល័យធនាគារ ។ បន្ថែមពីនេះទៀត ស្របតាមយុទ្ធសាស្រ្តរបស់ធនាគារ យើងខ្ញុំនឹងអភិវឌ្ឍនូវមុខងាររបស់ ម៉ាស៊ីនអេធីអឹម ឱ្យកាន់តែច្រើនបន្ថែមទៀត ដើម្បីបម្រើនូវសេវាហិរញ្ញវត្ថុយ៉ាងសំបូរបែប ជូនអតិថិជន និងសាធារណជន ស្របតាមយុគសម័យឌីជីថល ។"

សម្រាប់ព័ត៌មានបន្ថែម អំពីការប្រើប្រាស់ម៉ាស៊ីនអេធីអឹម ឬម៉ាស៊ីនដាក់-ដកប្រាក់របស់ធនាគារ អេស៊ីលីដា ភីអិលស៊ី សូមទាក់ទងមកកាន់ទូរស័ព្ទលេខ ៖ ០២៣ ៩៩៤ ៤៤៤ ឬ ០១៥ ៩៩៩ ២៣៣ សម្រាប់សេវាបម្រើអតិថិជន (២៤ម៉ោងក្នុងមួយថ្ងៃ និង៧ថ្ងៃក្នុងមួយសប្តាហ៍)។

« ព័ត៌មានមុន
កិច្ចសហប្រតិបត្តិការស្តីពីការទទួលបម្រើសេវាផ្ទេរប្រាក់ពីក្រៅប្រទេស រវាងធនាគារ អេស៊ីលីដា ភីអិលស៊ី ជាមួយនឹង SBI Remit Co., Ltd. ព័ត៌មានបន្ទាប់ »
ធនាគារ អេស៊ីលីដា ភីអិលស៊ី នឹងចុះបញ្ជីមូលបត្រកម្មសិទ្ធិជាផ្លូវការនៅក្នុងក្រុមហ៊ុនផ្សារមូលបត្រកម្ពុជា នៅថ្ងៃទី២៥ ខែឧសភា ឆ្នាំ២០២០