ទាក់គ្រោះថ្នាក់ ដាក់រាសី

- បទពាក្យ៩ បែបជាប់ទង -

១-	យប់ថ្ងៃចរ	ល្អប្រយ័ត្ន	ស្កាត់គ្រោះថ្នាក់
	រាសីដាក់	បាក់ឆ្អឹងឆ្អែង	តែងខាតបង់
	គោរពច្បាប់	ចាប់ចេញចរ	ល្អផ្ចិតផ្ចង់
	ផ្លូវកោងត្រង់	កង់ស៊ីក្លូ	ម៉ូតូឡាន ។

២-	វិន័យផ្លូវ	ត្រូវគោរព	ឈប់បំពាន
	ឡើងចុះស្ពាន	យានចេះចរ	ល្អសុខសាន្ត
	វ៉ាទើសទាក់	វាក់ជង្ហុក	ទុក្ខដល់ប្រាណ
	បាត់ក្សេមក្សាន្ត	ខានជួបជុំ	រុំដោយគ្រោះ ។

៣-	បត់ឆ្វេងស្តាំ	ចាំរលឹក	នឹកប្រយ័ត្ន
	ភ្លេចយល់ស្ងាត់	បាត់ម្ចាស់ការ	ឆ្លាជ្រុលជ្រួស
	បុករនាំង	ពាំងពុះផ្លូវ	ត្រូវរបួស
	ផ្លូវទាបខ្ពស់	ជ្រោះជ្រៅជ្រាល	រាលថ្លោះធ្លាក់ ។

៤-	បើកក្អេងក្អាង	តាងស្រវឹង	ដឹងកុំបរ
	គួរកុំចរ	ល្អរលឹក	នឹកជ្រៅរាក់
	ស្លុតស្លុងស្លាប់	យ៉ាប់ទ្រមក់	លក់មិនភ្ញាក់
	ប៉ះវ័ណ្ឌវាក់	ទាក់គ្រោះថ្នាក់	ដាក់រាសី ។