ព័ត៌មានព័ត៌មានថ្មីៗធនាគារអេស៊ីលីដា បើកសាខានៅក្នុងប្រទេសឡាវ

ធនាគារ អេស៊ីលីដា បើកសាខានៅក្នុងប្រទេសឡាវ

ថ្ងៃទី២៦ ខែធ្នូ ឆ្នាំ២០០៧

ភ្នំពេញ ថ្ងៃទី២៦ ខែធ្នូ ឆ្នាំ២០០៧ ៖ ធនាគារអេស៊ីលីដា ភីអិលស៊ី បានប្រកាសជាសាធារណៈនៅក្នុងថ្ងៃនេះថា ធនាគារបានទទួលអាជ្ញាប័ណ្ណពីរដ្ឋាភិបាលនៃសាធារណរដ្ឋប្រជាធិបតេយ្យប្រជាជនឡាវ ដើម្បីបង្កើតសាខាបុត្រសម្ព័ន្ធធនាគារពាណិជ្ជនៅក្នុងប្រទេសឡាវ ។ នេះជាលើកទី១ហើយដែលត្រូវបានគេដឹងថា ក្រុមហ៊ុននៃព្រះរាជាណាចក្រកម្ពុជា បានធ្វើការវិនិយោគជាផ្លូវការទៅក្រៅប្រទេស ។

ធនាគារថ្មីដែលមានឈ្មោះថា ធនាគារ អេស៊ីលីដា ឡាវ "ACLEDA Bank Lao Ltd. (ABL)" ត្រូវបានរំពឹងថានឹងចាប់ផ្តើមបើកទ្វារដំណើរការនៅទីក្រុងវៀងច័ន្ទ នាពាក់កណ្តាលឆ្នាំ២០០៨ នេះ ។ ហើយធនាគារមានបំណងពង្រីកអាជីវកម្មរបស់ខ្លួន តាមរយៈការបង្កើតឱ្យមានបណ្តាញសាខាប្រតិបត្តិការថ្មីជាច្រើនកន្លែងបន្ថែមទៀត នៅតាមបណ្តាខេត្តនៃប្រទេសឡាវ ដោយចាប់ផ្តើមពីខេត្តសុវណ្ណខេត និងប៉ាកសេ ។ ធនាគារនេះត្រូវបានបង្កើតឡើងក្នុងទម្រង់ជាក្រុមហ៊ុនសាជីវកម្មដាច់ដោយឡែកមួយ ដែលបានបង្កើតនិងចុះបញ្ជីតាមច្បាប់របស់សាធារណរដ្ឋប្រជាធិបតេយ្យប្រជាមានិតឡាវ ដោយមានភាគហ៊ុនិកសំខាន់ៗចូលរួមដូចជា ធនាគារអេស៊ីលីដា ភីអិលស៊ី កាន់កាប់ភាគហ៊ុនចំនួន ៤៧,៥% និងភាគហ៊ុនដែលនៅសល់កាន់កាប់ដោយស្ថាប័នធំៗ៣របស់ប្រទេសហូល្លង់គឺ ធនាគារអភិវឌ្ឍន៍ហូល្លង់ (FMO) មានភាគហ៊ុនចំនួន ៣០% និងភាគហ៊ុនចំនួន ២២,៥% ដែលនៅសល់ កាន់កាប់តាមចំណែកភាគហ៊ុនស្មើៗគ្នាដោយក្រុមធនាគារឯកជនហូល្លង់ (Triodos Group) រួមមាន Stichting Triodos Doen និង Triodos Fair Share Fund ។ ដើមទុនដែលបានចុះបញ្ជីមានចំនួន ១០០ពាន់លានគីប (Kip) (ប្រហែល១០,៥លានដុល្លារអាមេរិក) ដោយធ្វើការទូទាត់តាមតម្លៃ ១០.០០០គីប (Kip) ក្នុងមួយភាគហ៊ុន សមាមាត្រទៅនឹងភាគហ៊ុនរបស់ភាគហ៊ុនិកនីមួយៗ ។ ស្ថាប័នវិនិយោគផ្សេងទៀត ដែលបានគាំទ្រចំពោះធនាគារអេស៊ីលីដា នៅក្នុងប្រទេសកម្ពុជា ក៏សង្ឃឹមថានឹងចូលរួមនៅក្នុងសកម្មភាពវិនិយោគនេះផងដែរ ។

លោក ជា សុខ ប្រធានក្រុមប្រឹក្សាភិបាលរបស់ធនាគារអេស៊ីលីដា ភីអិលស៊ី ដែលជាអតីតធនាគារិកនៅធនាគារកណ្តាល និងជាអ្នកសេដ្ឋកិច្ច បានមានប្រសាសន៍ថា នេះគឺជាជំហានដំបូងនៃយុទ្ធសាស្ត្ររបស់ធនាគារអេស៊ីលីដា ដើម្បីកម្លាយខ្លួនពីស្ថាប័នដែលធ្លាប់មានជំនាញផ្តល់សេវាកម្មហិរញ្ញវត្ថុចំពោះសហគ្រិនខ្នាតតូច ចំណែកទីផ្សារលក់រាយ និងចំណែកទីផ្សារក្នុងស្រុកនោះ ។ លោកបានបញ្ជាក់បន្ថែមទៀតថា ធនាគារបានពិចារណាលើប្រទេសមួយចំនួននៅក្នុងតំបន់ ប៉ុន្តែការពង្រីកអាជីវកម្ម ត្រូវធ្វើដោយប្រុងប្រយ័ត្ន ពោលគឺអេស៊ីលីដាត្រូវការពេលវេលា ដើម្បីគិតពិចារណាឱ្យបានល្អិតល្អន់អំពីជំហានបន្ទាប់ដែលត្រូវធ្វើការវិនិយោគនៅក្នុងតំបន់ថ្មីនោះ ។ ក៏ប៉ុន្តែលោកមានជំនឿថាបន្ទាប់ពីចំណាយពេលវេលាអស់ជាងមួយឆ្នាំ ក្នុងការស្រាវជ្រាវយ៉ាងប្រុងប្រយ័ត្ន ទៅលើបរិស្ថានអាជីវកម្មនៅក្នុងប្រទេសឡាវដោយក្រុមការងារអេស៊ីលីដា ធនាគារថ្មីបានធ្វើឱ្យភាគហ៊ុនិកកាន់តែមានទំនុកចិត្តឡើង ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានបន្ថែមថា នេះជាចំណុចកំពូលនៃផែនការយុទ្ធសាស្ត្ររយៈពេល៣ឆ្នាំ ដែលបានបង្ហាញដល់ក្រុមប្រឹក្សាភិបាលនៅក្នុងឆ្នាំ២០០៥ ដើម្បីធ្វើឱ្យធនាគារអេស៊ីលីដាជាធនាគារថ្នាក់តំបន់ ។ ជាដំបូង ធនាគារអេស៊ីលីដាឡាវ នឹងកំណត់ជាសំខាន់ទៅលើជំនាញនៃការគ្រប់គ្រង ព្រមទាំងប្រព័ន្ធគ្រប់គ្រងនៃធនាគារដែលជាអាណាព្យាបាលនៅក្នុងប្រទេសកម្ពុជា ហើយក្រុមការងារជំនាញបានរៀបចំការងារអស់ជាច្រើនខែ ក្នុងការត្រៀមខ្លួនមកកាន់ប្រទេសឡាវនេះ ។ ប៉ុន្តែសម្រាប់គោលដៅរយៈពេលវែង ក្រុមការងារទាំងនោះនឹងត្រូវជំនួសដោយប្រជាជនឡាវ ដែលទទួលបានការហ្វឹកហ្វឺននៅក្នុងការិយាល័យធនាគារអេស៊ីលីដា នៅក្នុងប្រទេសកម្ពុជា ។ លោកបានបញ្ជាក់បន្ថែមថា យើងនឹងបំពាក់នូវសេវាកម្មធនាគារអេឡិចត្រូនិច និងប្រព័ន្ធគ្រប់គ្រងបច្ចេកវិជ្ជាព័ត៌មានវិជ្ជា ដែលបានប្រើប្រាស់សម្រាប់ប្រតិបត្តិការនៅក្នុងប្រទេសកម្ពុជា នៅធនាគារថ្មីនោះផងដែរ ហើយយើងនឹងរង់ចាំចូលរួមចែករំលែកនូវបទពិសោធន៍ដ៏ជោគជ័យនៃធនាគារលក់រាយ ជាមួយនឹងសាធារណរដ្ឋប្រជាធិបតេយ្យប្រជាមានិតឡាវ ។

លោក វ៉ាន់ សារឿន ត្រូវបានតែងតាំងជាអគ្គនាយក ធនាគារអេស៊ីលីដាឡាវ មានបទពិសោធន៍១៥ឆ្នាំ ជានាយកសាខាធនាគារប្រចាំនៅខេត្តដ៏ធំមួយក្នុងចំណោមបណ្តាញសាខាប្រតិបត្តិការរបស់ធនាគារអេស៊ីលីដា បានមានប្រសាសន៍ថា រួបគាត់និងក្រុមការងារ បានសិក្សាភាសាឡាវ ដែលការសិក្សានេះមានសារៈសំខាន់ណាស់ក្នុងការស្វែងយល់អំពីប្រពៃណី ទំនៀមទំលាប់ និងវប្បធម៌ នៃប្រទេសជិតខាងភាគឥសាន្តរបស់យើងនេះ ។ បន្ទាប់ពីបានចំណាយពេលយ៉ាងយូរក្នុងការរៀបចំរួចមក លោកមានបំណងចាប់ផ្តើមដំណើរការប្រតិបត្តិការក្នុងពេលឆាប់ៗនេះ ហើយលោកក៏បានអះអាងផងដែរថា បទពិសោធន៍របស់ធនាគារអេស៊ីលីដា មានទំនាក់ទំនងទៅនឹងប្រទេសជិតខាងនោះ ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី នាយិកាប្រតិបត្តិទីផ្សារ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ធនាគារអេស៊ីលីដា ទទួលវិញ្ញាបនបត្រសរសើរពីធនាគារជាតិនៃកម្ពុជា ព័ត៌មានបន្ទាប់ »
ធនាគារអេស៊ីលីដា ភីអិលស៊ី បង្កើនដើមទុនរហូតដល់ ៥០.០០០.០០០ដុល្លារអាមេរិក

ធនាគារ អេស៊ីលីដា បើក​សាខា​នៅ​ក្នុង​ប្រទេស​ឡាវ

ធនាគារ អេស៊ីលីដា បើកសាខានៅក្នុងប្រទេសឡាវ