ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី បង្កើនដើមទុនរហូតដល់ ៥០.០០០.០០០ដុល្លារអាមេរិក

ធនាគារអេស៊ីលីដា ភីអិលស៊ី បង្កើនដើមទុនរហូតដល់ ៥០.០០០.០០០ដុល្លារអាមេរិក

ថ្ងៃទី០៤ ខែមករា ឆ្នាំ២០០៨

ភ្នំពេញ ថ្ងៃទី០៤ ខែមករា ឆ្នាំ២០០៨ ៖ ធនាគារអេស៊ីលីដា ភីអិលស៊ី ជាធនាគារលក់រាយឈានមុខគេនៅប្រទេសកម្ពុជា ដែលបានប្រារព្ធពិធីគម្រប់ខួបទី១៥ឆ្នាំនៃការធ្វើប្រតិបត្តិការរបស់ខ្លួននៅឆ្នាំនេះ បានប្រកាសបង្កើនដើមទុនរបស់ខ្លួនពី ៣០.០០០.០០០ដុល្លារអាមេរិក ទៅ ៥០.០០០.០០០ដុល្លារអាមេរិកនៅថ្ងៃនេះ ។

ធនាគារអេស៊ីលីដា ភីអិលស៊ី មានដើមទុន ៥១% កាន់កាប់ដោយភាគហ៊ុនិកកម្ពុជា ក្នុងនោះរួមមានបុគ្គលិករបស់ខ្លួន និង ៤៩% ទៀតដែលនៅសល់ កាន់កាប់តាមចំណែកស្មើៗគ្នាដោយស្ថាប័នអន្តរជាតិឈានមុខគេ រួមមានសាជីវកម្មហិរញ្ញវត្ថុអន្តរជាតិ (IFC) ធនាគារអភិវឌ្ឍន៍អាល្លឺម៉ង់ (DEG) ធនាគារអភិវឌ្ឍន៍ហូល្លង់ (FMO) និងធនាគារឯកជនហូល្លង់ Stichting Triodos Doen និង Triodos Cusdody B.V ។ ដូចកាលពីមុនផងដែរ ការបន្ថែមដើមទុន ត្រូវបានធ្វើឡើងតាមរយៈការចេញសិទ្ធិចំនួន ២០លានភាគហ៊ុនថ្មីបន្ថែមទៀត ដែលមានតម្លៃ ១ដុល្លារក្នុងមួយសិទ្ធិ ហើយត្រូវបានបន្ថែមដោយភាគហ៊ុនិកបច្ចុប្បន្នរបស់ខ្លួន ។

នេះជាលើកទី៤ហើយ ដែលធនាគារអេស៊ីលីដា ភីអិលស៊ី បានបង្កើនដើមទុនរបស់ខ្លួន ចាប់តាំងពីបានចុះបញ្ជីជាធនាគារមក ។ នៅក្នុងឆ្នាំ២០០០ ធនាគារអេស៊ីលីដា ភីអិលស៊ី បានបង្កើនដើមទុនចំនួន ៤លានដុល្លារអាមេរិក ដើម្បីក្លាយខ្លួនជាធនាគារឯកទេស ។ នៅក្នុងឆ្នាំ២០០៣ ដើម្បីគាំទ្រចំពោះកំណើនប្រតិបត្តិការ ធនាគារអេស៊ីលីដា ភីអិលស៊ី បានបង្កើនដើមទុនរបស់ខ្លួនរហូតដល់ទៅ ១៣លានដុល្លារអាមេរិក តាមរយៈការចេញសិទ្ធិ និងបានចុះបញ្ជីសារជាថ្មី ជាធនាគារពាណិជ្ជ ដែលមានឈ្មោះថា ធនាគារ អេស៊ីលីដា ភីអិលស៊ី ។ នៅក្នុងឆ្នាំ២០០៦ ធនាគារបានបង្កើនដើមទុនរបស់ខ្លួនជាថ្មីម្តងទៀត រហូតដល់ទៅ ៣០លានដុល្លារអាមេរិក តាមរយៈការចេញសិទ្ធិ ដើម្បីគាំទ្រចំពោះការពង្រីកសាខារបស់ខ្លួន និងការសាងសង់បណ្តាញសេវាកម្មធនាគារតាមប្រព័ន្ធអេឡិចត្រូនិច ខណៈដែលការបន្ថែមចុងក្រោយនេះ អាចធ្វើឱ្យធនាគារបន្តការរីកលូតលាស់របស់ខ្លួន ដើម្បីសម្រេចនូវគោលដៅយុទ្ធសាស្ត្ររបស់ធនាគារ ។ ធនាគារអេស៊ីលីដា មានបទពិសោធន៍ក្នុងការបង្កើនប្រាក់ចំណេញសុទ្ធក្រោយពេលបង់ពន្ធរួច ពី ៤៧៥.០០០ដុល្លារអាមេរិកក្នុងឆ្នាំ២០០១ ទៅដល់ ៦,៧លានដុល្លារអាមេរិកនៅក្នុងឆ្នាំ២០០៦ និងត្រូវបានប៉ាន់ស្មានថា នឹងមានការកើនឡើងបន្ថែមទៀត នៅពេលដែលរបាយការណ៍ហិរញ្ញវត្ថុសម្រាប់ឆ្នាំ២០០៧ ត្រូវបានធ្វើសវនកម្មរួច និងប្រកាសជាសាធារណៈ ។ បន្ថែមពីលើការបន្ថែមដើមទុនរបស់ភាគហ៊ុនិក ធនាគារបានបង្កើតទុនបម្រុងទូទៅរបស់ខ្លួន ដោយរក្សាទុក ៦០%នៃប្រាក់ចំណេញក្រោយបង់ពន្ធរួច ។ ធនាគារក៏បានរាយការណ៍បញ្ជាក់ផងដែរថា ដើមទុនបច្ចុប្បន្ន (Tier 1 និង Tier 2) នឹងមានរហូតដល់ទៅ ៨៣,៥លានដុល្លារអាមេរិក ។

លោក ជា សុខ ប្រធានក្រុមប្រឹក្សាភិបាលរបស់ធនាគារអេស៊ីលីដា ភីអិលស៊ី ដែលជាអតីតធនាគារិកនៅធនាគារកណ្តាល និងជាអ្នកសេដ្ឋកិច្ច បានរៀបរាប់ពីមូលហេតុ ៣សំខាន់ដែលធ្វើឱ្យធនាគារតែងតែបង្កើននូវដើមទុនរបស់ខ្លួន ។ លោកបានលើកឡើងថា មូលហេតុទី១ គឺដោយសារធនាគាររីកលូតលាស់យ៉ាងខ្លាំងជាបន្តបន្ទាប់នៅក្នុងអាជីវកម្មក្នុងស្រុករបស់ខ្លួន តាមរយៈការផ្តល់ឥណទាន ហើយទ្រព្យសកម្មសរុបរបស់ធនាគារកំពុងតែកើនឡើងប្រចាំឆ្នាំប្រមាណ ៥០% ។ មូលហេតុទី២ គឺដោយសារបរិស្ថានហិរញ្ញវត្ថុពុំមានការវិវត្តិ គោលការណ៍របស់ធនាគារ គឺរក្សាមូលដ្ឋានដើមទុននៅក្នុងកម្រិតមួយខ្ពស់ជាងបញ្ញត្តិអនុបាតសំខាន់ៗ ។ ប៉ុន្តែមូលហេតុចម្បងដែលសំខាន់ជាងគេបំផុតនោះ គឺដោយសារធនាគារត្រូវការកសាងនូវទំនុកចិត្តពីសំណាក់សាធារណជន ។ យើងមានភាគហ៊ុនិកដ៏រឹងមាំ និងមានបំណងគាំទ្រធនាគារ ដូច្នេះយើងកំពុងបង្កើតនូវជំនឿទុកចិត្ត និងបង្កើនសមត្ថភាពការពារប្រាក់បញ្ញើសន្សំរបស់អតិថិជនរបស់យើង ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានបន្ថែមថា ដូចដែលយើងបានប្រកាសផ្សព្វផ្សាយកាលពីសប្តាហ៍មុនថា ធនាគារអេស៊ីលីដា នឹងធ្វើការវិនិយោគនៅធនាគារថ្មី ក្នុងប្រទេសឡាវ ដែលមានឈ្មោះថា ធនាគារ អេស៊ីលីដា ឡាវ "ACLEDA Bank Lao Ltd." នៅក្នុងឆ្នាំនេះ ហើយធនាគារមានគម្រោងបើកបណ្តាញសាខាចំនួន ៣កន្លែងទៀតនៅមុនចុងឆ្នាំ២០០៨នេះ ។ នៅក្នុងប្រទេសកម្ពុជា ធនាគារអេស៊ីលីដា នឹងបង្កើននូវបណ្តាញសេវាកម្មដកប្រាក់ស្វ័យប្រវត្តិ អេធីអឹម (ATMs) រហូតដល់ទៅ៦២ និងដាក់ពង្រាយប្រព័ន្ធទូទាត់ប្រាក់ស្វ័យប្រវត្តិ POS ចំនួន ២.០០០គ្រឿងបន្ថែមទៀត ។ បន្ថែមទៀតនោះ លោកក៏បានលើកឡើងផងដែរថា យើងមានគម្រោងបើក ២៤សាខា និងការិយាល័យថ្មីបន្ថែមនៅក្នុងឆ្នាំនេះ ដែលធ្វើឱ្យបណ្តាញប្រតិបត្តិការរបស់យើងកើនឡើងរហូតដល់ ២២៨សាខានិងការិយាល័យ ហើយដែលអាចផ្តល់ការងារឱ្យកម្មករនិយោជិតលើសពី ៥.៦០០នាក់ ។ យើងក៏នាំមកនូវប្រព័ន្ធគ្រប់គ្រងបច្ចេកវិជ្ជាព័ត៌មានបែបទំនើប ទាន់សម័យ ដើម្បីបំពេញទៅតាមការរីកចម្រើន និងគាំទ្រចំពោះការពង្រីកប្រតិបត្តិការនៅក្នុងតំបន់ផងដែរ ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី នាយិកាប្រតិបត្តិទីផ្សារ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ធនាគារ អេស៊ីលីដា បើកសាខានៅក្នុងប្រទេសឡាវ ព័ត៌មានបន្ទាប់ »
វិញ្ញាបនបត្រសរសើរសម្រាប់ការអនុវត្តល្អឥតខ្ចោះពីធនាគារ HSBC

ធនាគារ​អេស៊ីលីដា ភីអិលស៊ី បង្កើន​ដើម​ទុន​រហូត​ដល់ ៥០.០០០.០០០​ដុល្លារ​អាមេរិក

ធនាគារអេស៊ីលីដា ភីអិលស៊ី បង្កើនដើមទុនរហូតដល់ ៥០.០០០.០០០ដុល្លារអាមេរិក