ព័ត៌មានព័ត៌មានថ្មីៗការដាក់ឱ្យប្រើប្រាស់ជាផ្លូវការនូវសេវាអេស៊ីលីដាយូនីធី

ការដាក់ឱ្យប្រើប្រាស់ជាផ្លូវការនូវសេវា "អេស៊ីលីដាយូនីធី"

ថ្ងៃទី១៦ ខែកក្កដា ឆ្នាំ២០១០

លោក អ៊ិន ចាន់នី កំពុងសំណេះសំណាលជាមួយភ្ញៀវកិត្តិយស

រាជធានីភ្នំពេញ, ថ្ងៃទី១៦ ខែកក្កដា ឆ្នាំ២០១០ ៖ ធនាគារអេស៊ីលីដា បានប្រកាសព័ត៌មាននៅថ្ងៃនេះថា ធនាគារនឹងចាប់ផ្តើមបម្រើជូនអតិថិជន និងសាធារណជននូវសេវាធនាគារតាមរយៈទូរស័ព្ទចល័តថ្មីរបស់ខ្លួនគឺ "អេស៊ីលីដាយូនីធី" ។ អេស៊ីលីដាយូនីធី គឺជាធនាគារពិតជាក់ស្តែងនៅក្នុងហោប៉ៅរបស់លោកអ្នក ផ្តល់ជូននូវមធ្យោបាយងាយបំផុត និងសុវត្ថិភាពសម្រាប់ការគ្រប់គ្រងចាត់ចែងលើប្រតិបត្តិការធនាគារប្រចាំថ្ងៃ គ្រប់ពេលវេលា និងគ្រប់ទីកន្លែង ។ សេវានេះប្រើប្រាស់បានទាំងពីរភាសា គឺភាសាខ្មែរ និងអង់គ្លេស អាចធ្វើប្រតិបត្តិការជាប្រាក់រៀល ប្រាក់ដុល្លារអាមេរិក ប្រាក់បាតថៃ និង រូបិយប័ណ្ណដទៃទៀត ។

លោក អ៊ិន ចាន់នី ប្រធាននាយកប្រតិបត្តិ បានមានប្រសាសន៍ថា "គោលបំណងរបស់យើងគឺផ្តល់មធ្យោបាយថ្មី និងទំនើបទាន់សម័យបំផុតសម្រាប់ប្រើប្រាស់សេវាហិរញ្ញវត្ថុទៅដល់សហគមន៍ទាំងមូល"។ លោកបានបញ្ជាក់ថា "អេស៊ីលីដាយូនីធី អាចប្រើប្រាស់ជាមួយគ្រប់បណ្តាញប្រព័ន្ធទូរស័ព្ទចល័ត និងម៉ាស៊ីនទូរស័ព្ទគ្រប់ប្រភេទ ។ អេស៊ីលីដាយូនីធី ប្រមូលផ្តុំសេវាហិរញ្ញវត្ថុទាំងមូលនៅក្រោមប្រព័ន្ធតែមួយ សម្រួលក្នុងការធ្វើប្រតិបត្តិសេវាធនាគារប្រចាំថ្ងៃ តាមរយៈទូស័ព្ទចល័តគ្រប់ប្រភេទ គ្រប់ទីកន្លែង គ្រប់ពេលវេលានៅក្នុងប្រទេស និងអាចប្រើប្រាស់បានទូទាំងពិភពលោក សម្រាប់អតិថិជនទាំងឡាយដែលបានភ្ជាប់ប្រព័ន្ធ Global Roaming" ។

លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

អេស៊ីលីដាយូនីធី ជាប្រព័ន្ធដែលមានសុវត្ថិភាពខ្ពស់ អតិថិជនអាចធ្វើប្រតិបត្តិការ ២៤ម៉ោងក្នុងមួយថ្ងៃ និង៧ថ្ងៃ ក្នុងមួយសប្តាហ៍ ។ អេស៊ីលីដាយូនីធី ផ្តល់ជូននូវជម្រើសក្នុងការប្រើប្រាស់តាមរយៈការផ្ញើសារ (SMS), Mobile Browser/WAP ឬ Application ទៅតាមតម្រូវការរបស់អតិថិជន ។ អតិថិជនអាចពិនិត្យមើលសមតុល្យគណនី ពិនិត្យរបាយការណ៍សង្ខេបរបស់ខ្លួន ផ្ទេរប្រាក់រវាងគណនីរបស់ខ្លួន ផ្ទេរប្រាក់ទៅអតិថិជនផ្សេងទៀត បង់ប្រាក់តាមវិក្កយបត្រ (បង់ប្រាក់ចំពោះការប្រើប្រាស់ផ្សេងៗតាមវិក្កយបត្រ និងគណនីផ្សេងទៀត) និងការបញ្ចូលទឹកប្រាក់ក្នុងទូរស័ព្ទ ។ សេវាកម្មផ្សេងៗនឹងបំពាក់បន្ថែមទៀតនៅពេលអនាគត នៅពេលដែលមានតម្រូវការពីអតិថិជន ។

អេស៊ីលីដា ជាធនាគារដែលមានការលូតលាស់រហ័ស នៅក្នុងប្រទេសដែលកំពុងអភិវឌ្ឍសេដ្ឋកិច្ចលឿនទៅមុខ យើងបន្តផ្តល់នូវមធ្យោបាយទាន់សម័យ ដើម្បីបម្រើសេវាធនាគារតាមរយៈទូរស័ព្ទចល័តដែលមានលក្ខណៈរួមពេញលេញមួយ ។ លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា បានមានប្រសាសន៍ថា "សេវាធនាគារតាមរយៈទូរស័ព្ទចល័តរបស់យើង ធានាសុវត្ថិភាពខ្ពស់សម្រាប់អតិថិជនទូទៅ សមដូចឈ្មោះ ធនាគារអេស៊ីលីដា ដែលលោកអ្នកជឿទុកចិត្ត" ។ សូមបញ្ជាក់ថា សេវាអេស៊ីលីដាយូនីធី គឺជាសេវាដែលផ្លោះជំហានទៅមុខ មុនសេវាទំនើបនានារបស់ធនាគារបច្ចុប្បន្ន ។

អំពីធនាគារអេស៊ីលីដា

ធនាគារអេស៊ីលីដា គឺជាធនាគារខ្មែរឈានមុខគេ ដែលមានបណ្តាញសាខា និងការិយាល័យធំជាងគេបំផុត ។ ធនាគារអេស៊ីលីដា បានបម្រើសេវាហិរញ្ញវត្ថុក្នុងស្រុកអស់រយៈពេលជាង ១៧ឆ្នាំកន្លងមកហើយ ។ នៅដំណាច់ខែមិថុនា ឆ្នាំ២០១០ ធនាគារអេស៊ីលីដា មានសមតុល្យឥណទានសរុបចំនួន ៦១៥លានដុល្លារ ដែលមានអតិថិជនសកម្មសរុបចំនួន ២៥៨,០៦៤នាក់ និងមានសមតុល្យប្រាក់បញ្ញើ-សន្សំសរុបចំនួន ៧៩៣លានដុល្លារ ដែលមានចំនួន ៦៧០,៣៨៣គណនី ។ ទ្រព្យសកម្មធនាគារសរុប បានកើនលើស ១ពាន់លានដុល្លារ ហើយមានបុគ្គលិកចំនួន ៧,១០៥នាក់ កំពុងបម្រើសេវាជូនអតិថិជន និងសាធារណជន ។

ធនាគារអេស៊ីលីដា បម្រើសេវាធនាគារ និងហិរញ្ញវត្ថុយ៉ាងទូលំទូលាយដល់អតិថិជន សហគ្រិន សាជីវកម្ម និងសាធារណជនគ្រប់លំដាប់នៅតាមបណ្តាញប្រតិបត្តិការរបស់ខ្លួន ។ ធនាគារអេស៊ីលីដា គឺជាធនាគារឈានមុខគេនៅក្នុងទីផ្សារលក់រាយ ព្រមទាំងមានអតិថិជនគ្រឹះច្រើនបំផុតនៅតាមបណ្តាញប្រតិបត្តិការទាំង ២៣៣សាខា និងការិយាល័យ ។ ធនាគារអេស៊ីលីដា មានម៉ាស៊ីនអេធីអឹមចំនួន ១០២គ្រឿង បម្រើសេវា ២៤ម៉ោង ក្នុងមួយថ្ងៃ និង៧ថ្ងៃ ក្នុងមួយសប្តាហ៏ ព្រមទាំងមានការិយាល័យទំនាក់ទំនងអតិថិជន ២៤ម៉ោង លើ២៤ម៉ោង ដែលអាចឱ្យអតិថិជនប្រើប្រាស់សេវាបានគ្រប់ពេល ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
បទសម្ភាសន៍វិទ្យុ វីអូអេ ជាមួយប្រធាននាយកប្រតិបត្តិ ធនាគារអេស៊ីលីដា ព័ត៌មានបន្ទាប់ »
ធនាគារអេស៊ីលីដា សាខាដង្កោ និងសាខាស្រុកស្អាង ប្តូរទីតាំងការិយាល័យ

ការ​ដាក់ឱ្យ​ប្រើ​ប្រាស់​ជា​ផ្លូវការ​នូវ​សេវា "អេស៊ីលីដា​យូនីធី"

អំពី​ធនាគារ​អេស៊ីលីដា

ការដាក់ឱ្យប្រើប្រាស់ជាផ្លូវការនូវសេវា "អេស៊ីលីដាយូនីធី"

អំពីធនាគារអេស៊ីលីដា