USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextពិធីសម្ពោធអគារការិយាល័យថ្មី សាខាខេត្តរតនគិរី
ពិធីសម្ពោធអគារការិយាល័យថ្មី សាខាខេត្តរតនគិរី
ថ្ងៃទី០៩ ខែកញ្ញា ឆ្នាំ២០១១
ធនាគារអេស៊ីលីដា សាខាខេត្តរតនគិរី មានទីតាំងស្ថិតនៅភូមិ២ សង្កាត់ឡាបានសៀក ក្រុងបានលុង ខេត្តរតនគិរី បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលខេត្ត និងអាជ្ញាធរមូលដ្ឋានគ្រប់លំដាប់ថ្នាក់នៃខេត្តរតនគិរី ប្រធាន-អនុប្រធានក្រុមប្រឹក្សាភិបាល ប្រធាននាយកប្រតិបត្តិ និងថ្នាក់ដឹកនាំធនាគារអេស៊ីលីដា ព្រមទាំងភ្ញៀវកិត្តិយសជាតិ និងអន្តរជាតិជាច្រើននាក់ទៀត ។
លោក ញឹម កុសល នាយកធនាគារអេស៊ីលីដា សាខាខេត្តរតនគិរី បានមានប្រសាសន៍ថា ៖ សាខាខេត្តរតនគិរី បានបង្កើតឡើងនៅដើមខែមិថុនា ឆ្នាំ២០០៦ និងបច្ចុប្បន្ន មានបណ្តាញប្រតិបត្តិការចំនួន ២ បុគ្គលិកចំនួន ៧១នាក់ ទ្រព្យសកម្មចំនួនជាង ១០,២លានដុល្លារអាមេរិក អតិថិជនចំនួន ១.៩២៣នាក់ កំពុងប្រើប្រាស់សេវាឥណទានចំនួនជាង ៨,៥លានដុល្លារអាមេរិក និងអតិថិជនចំនួន ៦.៥៤៣នាក់ កំពុងដាក់ប្រាក់បញ្ញើសន្សំចំនួនជិត ៨,៥លានដុល្លារអាមេរិក និងអតិថិជនជាច្រើននាក់ទៀត បាននិងកំពុងប្រើប្រាស់សេវាផ្សេងៗទៀត រួមទាំងសេវាអេស៊ីលីដាយូនីធីផងដែរ ។ ជាពិសេស យើងមានម៉ាស៊ីនដកប្រាក់ស្វ័យប្រវត្តិអេធីអឹមចំនួន ២គ្រឿងសម្រាប់បម្រើសេវាជូនដល់អតិថិជន តាមរយៈប័ណ្ណអេស៊ីលីដា ប័ណ្ណឥណពន្ធវីសាអេស៊ីលីដា និងប័ណ្ណវីសាធនាគារផ្សេងទៀតនៅទូទាំងពិភពលោក ។
លោកបានបន្តថា ៖ អគារការិយាល័យថ្មីនេះ បានសាងសង់ឡើងតាមស្តង់ដារធនាគារពាណិជ្ជ ដោយយកចិត្តទុកដាក់ខ្លាំងលើ ការរក្សាសន្តិសុខ កំណារពារអគ្គីភ័យ ការបម្រុងថាមពល ផាសុកភាព និងសុវត្ថិភាពខ្ពស់ ព្រមទាំងមានទីកន្លែងសម្រាប់ទទួលអតិថិជន និងសម្រាប់បំពេញការងារធំទូលាយ ។ នេះជាព្រឹត្តិការណ៍ដ៏ពិសេសមួយនៅក្នុងឆ្នាំនេះរបស់សាខាខេត្តរតនគិរី ដែលបានបង្ហាញអំពីភាពរឹងមាំជាមួយការអភិវឌ្ឍឥតឈប់ឈរ ក្នុងការបម្រើសេវាកម្មហិរញ្ញវត្ថុ កាន់តែលឿន រហ័សទាន់ចិត្ត អាចជឿជាក់បាន និងមានសុវត្ថិភាពខ្ពស់ សម្រាប់បំពេញតម្រូវការរបស់អតិថិជននៅក្នុងខេត្តរតនគិរីទាំងមូល ។
ឆ្លៀតក្នុងឱកាសដ៏វិសេសវិសាលនេះ លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានថ្លែងថា ៖ អារ្យភាពទាន់សម័យជានិរន្តរ៍ គឺជាទិសដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមានអារ្យភាពទាន់សម័យជានិរន្តរ៍សម្រាប់សេវាកម្មហិរញ្ញវត្ថុបែបនេះ អស់រយៈពេល ១៨ឆ្នាំ មកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជន និងវិស័យសាធារណៈ តាមរយៈសាខា និងការិយាល័យទាំង ២៥០ ទូទាំងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ។
លោកបានសំដែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក កម្មករនិយោជិតគ្រប់លំដាប់ថ្នាក់ទាំង ៧.៤៧៤នាក់ និងអតិថិជនវៃឆ្លាត ជាងមួយលាននាក់ ដែលតែងតែជួយគាំទ្រទាំងមធ្យោបាយ កំលាំងកាយ កំលាំងចិត្ដ និងសហការយ៉ាងពេញទំហឹង តាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនពីចំនួនជាង ២២,៣លានដុល្លារអាមេរិក ក្នុងខែធ្នូ ឆ្នាំ២០០០ រហូតដល់ មួយពាន់បួនរយលានដុល្លារអាមេរិក (១.៤០០លាន) នៅដំណាច់ខែកក្កដា ឆ្នាំ២០១១ ដោយរួមបញ្ចូលទាំងសមិទ្ធផលរបស់សាខាខេត្តរតនគិរីនេះផងដែរ ។ យុទ្ធសាស្ត្រមួយក្នុងចំណោមយុទ្ធសាស្ត្រចម្បង គឺបង្កើតឱ្យមានប្រព័ន្ធធនាគារអេឡិចត្រូនិកឈានមុខគេ ដោយបំពាក់នូវប្រព័ន្ធ Online និងដាក់ពង្រាយម៉ាស៊ីនដកប្រាក់ស្វ័យប្រវត្តិអេធីអឹម ពាសពេញផ្ទៃប្រទេស ជាពិសេសនៅតាមបណ្តាសាខា និងការិយាល័យនៅខេត្តដែលជាប់ព្រំដែន ។
លោកបានបន្ថែមទៀតថា ៖ ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធមួយចំនួនដូចជា អេស៊ីលីដា ស៊ីឃ្យួរឹធី ភីអិលស៊ី និងភ្នាក់ងារចំនួនបួនទៀតដូចជា ភ្នាក់ងារបញ្ជិកាមូលបត្រ ភ្នាក់ងារទូទាត់ ភ្នាក់ងារចុះបញ្ជីផ្ទេរមូលបត្រ និងភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ ដើម្បីធ្វើជាកម្លាំងចលករសម្រាប់ទ្រទ្រង់ការអភិវឌ្ឍវិស័យមូលបត្រ និងជំរុញឱ្យមានកំណើនសេដ្ឋកិច្ច ។ ទន្ទឹមនឹងនេះដែរ ធនាគារអេស៊ីលីដាក៏បានបង្កើតឱ្យមានអេស៊ីលីដា ត្រេននីង សេនធ័រ ដើម្បីអភិវឌ្ឍធនធានមនុស្ស និងចូលរួមចែករំលែកបទពិសោធន៍ និងភាពជោគជ័យលើវិស័យមីក្រូហិរញ្ញវត្ថុដល់ប្រតិបត្តិករ និងស្ថាប័នមីក្រូហិរញ្ញវត្ថុនៅក្នុងតំបន់ ។
ជាមួយគ្នានេះដែរ ឯកឧត្តម ប៉ាវ ហមផាន អភិបាលខេត្តរតនគិរី បានកត់សម្គាល់ថា ៖ ធនាគារអេស៊ីលីដា សាខាខេត្តរតនគិរី បានរៀបចំឡើងស្របពេលដែលសេដ្ឋកិច្ចនៃព្រះរាជាណាចក្រកម្ពុជា ជាពិសេសខេត្តរតនគិរី កំពុងមានការរីកចម្រើន មានស្ថិរភាព និងមានកំណើនលើសពីការរំពឹងទុក ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ច ក្នុងប្រទេស ជាពិសេសនៅក្នុងខេត្តរតនគិរី ។ នេះពិតជាបានផ្តល់អត្ថប្រយោជន៍យ៉ាងច្រើន ចំពោះប្រជាពលរដ្ឋ និងអ្នកជំនួញនៅក្នុងស្រុកទាំងមូល ឱ្យទទួលបាននូវប្រភពធនធានហិរញ្ញវត្ថុ និងសេវាកម្មហិរញ្ញវត្ថុផ្សេងៗទៀត ដែលជាគន្លឹះក្នុងការចូលរួមបង្កើតឱ្យមានការងារ ប្រភពចំណូល អភិវឌ្ឍសេដ្ឋកិច្ច និងលើកកម្ពស់កម្រិតជីវភាពរបស់ប្រជាពលរដ្ឋនៅក្នុងខេត្តរតនគិរីទាំងមូល ៕
