ព័ត៌មានព័ត៌មានថ្មីៗធនាគារអេស៊ីលីដាចុះហត្ថលេខា លើកិច្ចព្រមព្រៀង...

ធនាគារអេស៊ីលីដាចុះហត្ថលេខា លើកិច្ចព្រមព្រៀងធ្វើជាដៃគូសហប្រតិបត្តិការជាមួយ ប.ជ.ស

ថ្ងៃទី២១ ខែកញ្ញា ឆ្នាំ២០១១

ធនាគារអេស៊ីលីដា ជាធនាគារពាណិជ្ជឈានមុខគេលើគ្រប់ផ្នែកនៃសេវាធនាគារ បានប្រកាសនៅថ្ងៃនេះថា ធនាគារបានចុះហត្ថលេខាជាមួយបេឡាជាតិសន្ដិសុខសង្គមសម្រាប់មន្ត្រីរាជការស៊ីវិល (ប.ជ.ស) ក្នុងការថែរក្សា និងការពារសុវត្ថិភាពលើការបើកផ្តល់ប្រាក់របបសោធន និងប្រាក់ឧបត្ថម្ភគោលនយោបាយ ដល់មន្ត្រីរាជការស៊ីវិលចូលនិវត្តន៍ ឬអ្នកទទួលសិទ្ធិ នៅខេត្តទាំង ២៣ ដែលមានសិទ្ធិទទួលពីរាជរដ្ឋាភិបាលនៃព្រះរាជាណាចក្រកម្ពុជា ក្រោមអធិបតីដ៏ខ្ពង់ខ្ពស់របស់ ឯកឧត្តម បណ្ឌិត អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ។

បន្ទាប់ពីរាជរដ្ឋាភិបាលនៃព្រះរាជាណាចក្រកម្ពុជា បានចេញអនុក្រឹត្យស្ដីពីការបង្កើតប.ជ.ស នាថ្ងៃទី០៥ ខែកុម្ភៈ ឆ្នាំ២០០៨ មក កាលពីថ្ងៃទី២៩ ខែមេសា ឆ្នាំ២០១១ រាជរដ្ឋាភិបាលបានចេញអនុក្រឹត្យស្ដីពីការកំណត់អត្រាភាគទាន សម្រាប់ទ្រទ្រង់ប.ជ.ស ។ ភាគទាននេះគឺជាកាតព្វកិច្ចរបស់រាជរដ្ឋាភិបាល និងមន្ត្រីរាជការស៊ីវិល ព្រមទាំងចៅក្រមនិងព្រះរាជអាជ្ញា សម្រាប់ទ្រទ្រង់ប.ជ.ស ដើម្បីបង្កើតឱ្យមានប្រភពធនធានផ្ទាល់មួយច្បាស់លាស់ សម្រាប់អនុវត្តគោលនយោបាយរបស់សន្តិសុខសង្គមឱ្យមានប្រសិទ្ធភាព ។

លោក ជួរ រតនៈ នាយកបេឡាជាតិសន្ដិសុខសង្គមសម្រាប់មន្ត្រីរាជការស៊ីវិល មានប្រសាសន៍ថា ៖ មូលនិធិដែលទទួលបានពីភាគទានខាងលើ នឹងរក្សាទុកជាមួយធនាគារអេស៊ីលីដា សម្រាប់ធ្វើការបើកផ្តល់ប្រាក់របបសោធន និងប្រាក់ឧបត្ថម្ភគោលនយោបាយ ដល់មន្ត្រីរាជការស៊ីវិលចូលនិវត្តន៍ ឬអ្នកទទួលសិទ្ធិ នៅខេត្តទាំង ២៣ ដែលមានសិទ្ធិទទួលពីរាជរដ្ឋាភិបាលនៃព្រះរាជាណាចក្រកម្ពុជា ។

លោក អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ អេស៊ីលីដា មានមោទនភាព ដែលតែងតែទទួលបានការផ្តល់ទំនុកចិត្ត និងជ្រើសរើសធ្វើជាដៃគូជាបន្តបន្ទាប់ពីគ្រឹះស្ថានសាធារណៈរបស់រាជរដ្ឋាភិបាលក្នុងការបម្រើសេវាកម្មធនាគារ ហើយថ្ងៃនេះធនាគារអេស៊ីលីដា កាន់តែមានមោទនភាពថែមទៀតដែលត្រូវបាន ប.ជ.ស ជ្រើសរើសធ្វើជាដៃគូក្នុងការផ្តល់សេវាកម្មធនាគារ សម្រាប់ថែរក្សា និងការពារសុវត្ថិភាពលើការបើកផ្តល់ប្រាក់របបសោធន និងប្រាក់ឧបត្ថម្ភគោលនយោបាយដល់មន្ត្រីរាជការស៊ីវិល នៅខេត្តទាំង ២៣ ។ នៅក្នុងឱកាសនោះ លោក អ៊ិន ចាន់នី បានជម្រាបជូនផងដែរថា ធនាគារអេស៊ីលីដា ក៏បាននិងកំពុងធ្វើជាដៃគូដ៏ល្អជាមួយ បេឡាជាតិរបបសន្តិសុខសង្គម (ប.ស.ស) ក្រោមកិច្ចព្រមព្រៀងចុះពីថ្ងៃទី២៣ ខែតុលា ឆ្នាំ២០០៨ ស្តីពីការផ្តល់សេវាកម្មធនាគារជូនប.ស.ស ដែលមានលក្ខណៈប្រហាក់ប្រហែលនឹងសេវាកម្មដែលនឹងផ្តល់ជូនប.ជ.ស ដែរ ។

ឆ្លៀតក្នុងឱកាសដ៏មានសារៈសំខាន់នេះ លោកក៏បានសំដែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល ក្រសួងសង្គមកិច្ច អតីតយុទ្ធជននិងយុវនីតិសម្បទា និង ប.ជ.ស ដែលបានសម្រេចចិត្តជ្រើសរើសធនាគារអេស៊ីលីដា ធ្វើជាដៃគូក្នុងការផ្តល់សេវាកម្មធនាគារ សម្រាប់ថែរក្សា និងការពារសុវត្ថិភាពលើការបើកផ្តល់ប្រាក់របបសោធន និងប្រាក់ឧបត្ថម្ភគោលនយោបាយដល់មន្ត្រីរាជការស៊ីវិល នៅខេត្តទាំង ២៣ ៕

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ពិធីសម្ពោធអគារការិយាល័យថ្មី សាខាខេត្តរតនគិរី ព័ត៌មានបន្ទាប់ »
កិច្ចសហប្រតិបត្តិការរវាងធនាគារអេស៊ីលីដា និងអេស៊ីលីដាស៊ីឃ្យួរឹធី ជាមួយក្រុមហ៊ុនតុងយ៉ាង ស៊ីឃ្យួរឹធី

ធនាគារ​អេស៊ីលីដា​ចុះ​ហត្ថលេខា លើ​កិច្ចព្រមព្រៀង​ធ្វើ​ជា​ដៃ​គូ​សហប្រតិបត្តិការ​ជា​មួយ ប.ជ.ស

ធនាគារអេស៊ីលីដាចុះហត្ថលេខា លើកិច្ចព្រមព្រៀងធ្វើជាដៃគូសហប្រតិបត្តិការជាមួយ ប.ជ.ស