ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយអគ្គនាយកដ្ឋានពន្ធដារ

ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ

ថ្ងៃទី២១ ខែសីហា ឆ្នាំ២០១២

ភ្នំពេញ, ថ្ងៃទី២១ ខែសីហា ឆ្នាំ២០១២ ៖ ធនាគារអេស៊ីលីដា ជាធនាគារពាណិជ្ជឈានមុខគេលើគ្រប់វិស័យ បានប្រកាសនៅថ្ងៃនេះថា ធនាគារអេស៊ីលីដា ចុះហត្ថលេខាលើអនុស្សរណៈនៃការយោគយល់គ្នាជាមួយអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ក្នុងការផ្តល់សេវាកម្មធនាគារ សម្រាប់ប្រតិបត្តិការលក់លតាបត្រពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំពោះទោចក្រយានយន្ត និងត្រីចក្រយានយន្ត ដោយអនុវត្តសាកល្បងលើ ២៣ខេត្ត និងរាជធានីភ្នំពេញ ។

ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំពោះទោចក្រយានយន្ត និងត្រីចក្រយានយន្ត ត្រូវបានបង្កើតតាមរយៈព្រះរាជក្រឹត្យលេខ ២៤ ក្រ ចុះថ្ងៃទី១៥ ខែកុម្ភៈ ឆ្នាំ១៩៩១ របស់ក្រុមប្រឹក្សារដ្ឋ នៃ រដ្ឋកម្ពុជា ។

ឯកឧត្តម ស៊ឹម អៀង ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានមានប្រសាសន៍ថា ៖ នេះជាលើកទី១ហើយ ដែលអគ្គនាយកដ្ឋានពន្ធដារ បានជ្រើសរើសយកធនាគារអេស៊ីលីដា ធ្វើជាដៃគូ ក្នុងការលក់លតាបត្រពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំពោះទោចក្រយានយន្ត និងត្រីចក្រយានយន្ត ។ ការជ្រើសរើសយកធនាគារអេស៊ីលីដា ធ្វើជាដៃគូ គឺដោយសារធនាគារនេះមានបណ្តាញប្រតិបត្តិការច្រើន និងភ្ជាប់ទំនាក់ទំនងគ្នាដោយប្រព័ន្ធទំនើបជឿនលឿន និងរៀបចំបានល្អនៅក្នុងប្រទេស ។ ម៉្យាងវិញទៀត ការលក់លតាបត្រពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំពោះទោចក្រយានយន្ត និងត្រីចក្រយានយន្ត តាមរយៈធនាគារពាណិជ្ជ គឺធ្វើឡើងដើម្បីគ្រប់គ្រងទិន្នន័យព័ត៌មានលើការប្រមូលប្រាក់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ឱ្យកាន់តែមានប្រសិទ្ធភាពខ្ពស់ថែមទៀត ។

អគ្គនាយកដ្ឋានពន្ធដារ នឹងត្រូវធ្វើការបែងចែកលតាបត្រពន្ធ ទៅគ្រប់ការិយាល័យរបស់ធនាគារ អេស៊ីលីដា ភីអិលស៊ី ទូទាំងប្រទេសកម្ពុជា ដើម្បីលក់លតាបត្រពន្ធលើមធ្យោបាយដឹកជញ្ជូន និងយានជំនិះ ជូនម្ចាស់ទោចក្រយានយន្ត និងត្រីចក្រយានយន្ត គ្រប់ប្រភេទ ។

លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ ធនាគារអេស៊ីលីដា មានមោទនភាព ដែលតែងតែទទួលបានការផ្តល់ទំនុកចិត្ត និងជ្រើសរើសធ្វើជាដៃគូជាបន្តបន្ទាប់ពីគ្រឹះស្ថានសាធារណៈ របស់រាជរដ្ឋាភិបាលនៃព្រះរាជាណាចក្រកម្ពុជា លើសេវាហិរញ្ញវត្ថុរបស់ធនាគារអេស៊ីលីដា ។ នេះជាកត្តាជំរុញលើកទឹកចិត្តឱ្យធនាគារអេស៊ីលីដា បន្តធ្វើការពង្រីកបណ្តាញប្រតិបត្តិការ ពង្រឹងគុណភាព និងបង្កើតឱ្យមានប្រព័ន្ធធនាគារអេឡិចត្រូនិកឈានមុខគេ ដោយបំពាក់នូវប្រព័ន្ធ Online និងប្រព័ន្ធទំនើបធ្វើប្រតិបត្តិការធនាគារតាមប្រព័ន្ធទូរស័ព្ទចល័ត ដាក់ពង្រាយម៉ាស៊ីនដកប្រាក់ស្វ័យប្រវត្តិអេធីអឹម ពាសពេញប្រទេស ដើម្បីអាចបម្រើអតិថិជនបាន ២៤ម៉ោង ក្នុង១ថ្ងៃ និង៧ថ្ងៃ ក្នុង១សប្តាហ៍ ។

លោកបានបន្តទៀតថា ៖ ថ្ងៃនេះធនាគារអេស៊ីលីដា កាន់តែមានមោទនភាពថែមទៀតដែលត្រូវបានអគ្គនាយកដ្ឋានពន្ធដារជ្រើសរើសធ្វើជាដៃគូក្នុងការប្រើប្រាស់សេវាកម្មធនាគារ សម្រាប់ប្រតិបត្តិការលក់លតាបត្រពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំពោះទោចក្រយានយន្ត និងត្រីចក្រយានយន្ត ទូទាំងប្រទេស ។

លោកបានបន្ថែមទៀតថា ៖ ធនាគារអេស៊ីលីដា មានបណ្តាញប្រតិបត្តិការចំនួន ២៣៧ ការិយាល័យ ទូទាំងព្រះរាជាណាចក្រកម្ពុជា និង ២៥ការិយាល័យ នៅប្រទេសឡាវ ជាមួយនឹងទ្រព្យសកម្មសរុបចំនួន ១,៧៦ ពាន់លានដុល្លារអាមេរិក នៅដំណាច់ខែកក្កដា ឆ្នាំ២០១២ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបីគឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី និង អេស៊ីលីដា ត្រេននីង សេនធ័រ ហើយបន្តពង្រីកវិសាលភាពប្រតិបត្តិការទៅប្រទេសមីយ៉ាន់ម៉ា និងបណ្តាប្រទេសក្នុងតំបន់អាស៊ានដទៃទៀត ។

សម្រាប់ព័ត៌មានបន្ថែម សូមទំនាក់ទំនងតាមរយៈ

តំណាងអគ្គនាយកដ្ឋានពន្ធដារ

លោក សែម សាខន អនុប្រធាននាយកដ្ឋានច្បាប់ វិវាទ និងស្ថិតិ
ទូរស័ព្ទ ៖ ០៩៧ ៩១១ ៦២ ២២, ០១២ ៦១២ ១២០
អ៊ីម៉ែល ៖

តំណាងធនាគារ អេស៊ីលីដា ភីអិលស៊ី

លោក លី ថៃ នាយកប្រតិបត្តិប្រតិបត្តិការ
ទូរស័ព្ទ ៖ ០១៥ ៩០០ ១៧៧
អ៊ីម៉ែល ៖

លោក សុខ សុវត្ថឌី នាយកប្រតិបត្តិរងប្រតិបត្តិការ
ទូរស័ព្ទ ៖ ០១៥ ៩០០ ១៧៨
អ៊ីម៉ែល ៖

លោក នេត ពិសិដ្ឋ នាយកប្រតិបត្តិរងប្រតិបត្តិការ
ទូរស័ព្ទ ៖ ០១៥ ៧០០ ១១១
អ៊ីម៉ែល ៖

« ព័ត៌មានមុន
ពានរង្វាន់ និងវិញ្ញាបនបត្រ ពីវ៉េសស្ទឺន យូញៀន ព័ត៌មានបន្ទាប់ »
ធនាគារ អេស៊ីលីដា ភីអិលស៊ី ចុះហត្ថលេខាលើអនុស្សរណៈនៃការយោគយល់គ្នាជាមួយ ធនាគារ SMBC