ព័ត៌មានព័ត៌មានថ្មីៗពិធីសម្ពោធអគារការិយាល័យថ្មី សាខាខេត្តមណ្ឌលគិរី

ពិធីសម្ពោធអគារការិយាល័យថ្មី សាខាខេត្តមណ្ឌលគិរី

សាខាខេត្តមណ្ឌលគិរី

ថ្ងៃទី២៥ ខែមករា ឆ្នាំ២០១៣

នៅរសៀលថ្ងៃទី២៥ ខែមករា ឆ្នាំ២០១៣ ធនាគារអេស៊ីលីដា សាខាខេត្តមណ្ឌលគិរី ដែលមានទីតាំងស្ថិតនៅ ភូមិកណ្តាល សង្កាត់ស្ពានមានជ័យ ក្រុងសែនមនោរម្យ បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ នាយករដ្ឋបាលសាលាខេត្តមណ្ឌលគិរី អាជ្ញាធរមូលដ្ឋានគ្រប់លំដាប់ថ្នាក់ និងក្រុមប្រឹក្សាភិបាល ប្រធាននាយកប្រតិបត្តិ អនុប្រធាននាយកប្រតិបត្តិនិងជាប្រធាននាយក-នាយិកាប្រតិបត្តិ និងថ្នាក់ដឹកនាំធនាគារអេស៊ីលីដា ព្រមទាំងភ្ញៀវកិត្តិយសជាច្រើននាក់ទៀត ។

លោក ងួន រស្មី នាយកធនាគារអេស៊ីលីដា សាខាខេត្ដមណ្ឌលគិរី បានមានប្រសាសន៍ថា ៖ អគារការិយាល័យថ្មីនេះបានសាងសង់តាមបទដ្ឋានរបស់ធនាគារអេស៊ីលីដា ដោយយកចិត្ដទុកដាក់ខ្លាំងលើការរក្សាសន្ដិសុខ កំណារពារអគ្គិភ័យ ការបម្រុងថាមពល ផាសុកភាព និងសុវត្ថិភាពការងារ ព្រមទាំងមានទីកន្លែងសម្រាប់បម្រើអតិថិជន និងសម្រាប់បំពេញការងារធំទូលាយ ។ នេះជាព្រឹត្ដិការណ៍ដ៏ពិសេសមួយនៅក្នុងឆ្នាំនេះ របស់សាខាខេត្ដមណ្ឌលគិរី ដែលបានបង្ហាញអំពីភាពរឹងមាំ ជាមួយការអភិវឌ្ឍឥតឈប់ឈរ ក្នុងការបម្រើសេវាកម្មហិរញ្ញវត្ថុកាន់តែលឿន រហ័សទាន់ចិត្ដ អាចជឿជាក់បាន និងមានសុវត្ថិភាពខ្ពស់ ដើម្បីបំពេញតម្រូវការរបស់អតិថិជននៅក្នុងខេត្ដមណ្ឌលគិរី ទាំងមូល ។

លោក ងួន រស្មី នាយកធនាគារអេស៊ីលីដា សាខាខេត្ដមណ្ឌលគិរី

ឆ្លៀតក្នុងឱកាសដ៏មានសារៈសំខាន់នេះ បណ្ឌិត អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ អារ្យភាពទាន់សម័យជានិរន្តរ៍ គឺជាគោលដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមានអារ្យភាពទាន់សម័យជានិរន្តរ៍ សម្រាប់សេវាកម្មហិរញ្ញវត្ថុបែបនេះ អស់រយៈពេលជាង ២១ឆ្នាំ មកហើយ ដើម្បីបម្រើសេវាកម្មហិរញ្ញវត្ថុ ជូនដល់អតិថិជនទាំងវិស័យឯកជន និងវិស័យសាធារណៈ តាមរយៈបណ្តាញប្រតិបត្តិការរហូតដល់ ២៣៨ ការិយាល័យ គ្របដណ្តប់គ្រប់ខេត្តរាជធានីនៃព្រះរាជាណាចក្រកម្ពុជា, ២៨ ការិយាល័យ នៅប្រទេសឡាវ និង ០១ ការិយាល័យ នៅប្រទេសមីយ៉ាន់ម៉ា ។ បច្ចុប្បន្ន ធនាគារអេស៊ីលីដា មានអគារការិយាល័យស្ដង់ដារបែបនេះ ចំនួន ១០៨ និងកំពុងសាងសង់បន្ថែមជាបន្ដបន្ទាប់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនក្នុងការទាក់ទង សម្រាប់ប្រើប្រាស់សេវាហិរញ្ញវត្ថុនានារបស់ធនាគារអេស៊ីលីដា ជាពិសេសដើម្បីការពារសុវត្ថិភាពទ្រព្យសម្បត្ដិរបស់អតិថិជនដែលបាននឹងកំពុងប្រើប្រាស់សេវាធនាគារអេស៊ីលីដា ព្រមទាំងផ្តល់នូវផាសុកភាព និងសុវត្ថិភាពការងារ ដល់បុគ្គលិកដែលបាននឹងកំពុងបម្រើការងារជាមួយធនាគារអេស៊ីលីដា ។ ថ្ងៃនេះខ្ញុំបាទ មានមោទនភាពយ៉ាងខ្លាំង ចំពោះសំណង់អគារការិយាល័យនេះ ដែលបានសាងសង់តាមស្ដង់ដារ របស់ធនាគារអេស៊ីលីដា ស្របតាមយុទ្ធសាស្ដ្រយូរអង្វែងរបស់យើង ។

បណ្ឌិតបានសំដែងនូវអំណរគុណយ៉ាងជ្រាលជ្រៅ ចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក ក្រុមប្រឹក្សាភិបាល កម្មករនិយោជិតគ្រប់លំដាប់ថ្នាក់ទាំង ៨.៣១១នាក់ និងអតិថិជនដ៏វៃឆ្លាតជាងមួយលាននាក់ ដែលតែងតែជួយគាំទ្រ ទាំងមធ្យោបាយ កំលាំងកាយ កំលាំងចិត្ដ និងសហការយ៉ាងពេញទំហឹង តាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនពីចំនួន ២២,៣លានដុល្លារអាមេរិក ក្នុងខែធ្នូ ឆ្នាំ២០០០ រហូតដល់ចំនួន ២ពាន់លានដុល្លារអាមេរិក នៅដំណាច់ខែធ្នូ ឆ្នាំ២០១២ ដោយរួមបញ្ចូលទាំងសមិទ្ធិផល របស់សាខាខេត្តមណ្ឌលគិរី ។ យុទ្ធសាស្ត្រមួយក្នុងចំណោមយុទ្ធសាស្ត្រចម្បងរបស់ធនាគារអេស៊ីលីដា គឺបង្កើតឱ្យមានហេដ្ឋារចនាសម្ព័ន្ធប្រព័ន្ធធនាគារអេឡិចត្រូនិកទំនើបលើសគេ មានតែមួយគត់ សម្រាប់បម្រើសេវាជូនអតិថិជន និងសាធារណជនឱ្យបាន ២៤ម៉ោង ក្នុង ១ថ្ងៃ និង ៧ថ្ងៃ ក្នុង ១សប្តាហ៍ តាមរយៈប្រព័ន្ធទូរស័ព្ទចល័ត ម៉ាស៊ីនដាក់ប្រាក់និងម៉ាស៊ីនដកប្រាក់ស្វ័យប្រវត្តិអេធីអឹម និងម៉ាស៊ីនឆូតកាតអេស៊ីលីដា ដែលមានលក្ខណៈងាយស្រួល និងសុវត្ថិភាពខ្ពស់បំផុត ។

លោក ចឹង សុចន្ថា នាយករដ្ឋបាលសាលាខេត្តមណ្ឌលគិរី និង បណ្ឌិត អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី

លោកបណ្ឌិតបានបន្ថែមថា ៖ ធនាគារអេស៊ីលីដា បានធ្វើឱ្យកាន់តែប្រសើរឡើងនូវសេវាអេស៊ីលីដាយូនីធី ដែលជាសេវាធនាគារទំនើប តាមរយៈប្រព័ន្ធទូរស័ព្ទចល័តគ្រប់ប្រភេទ ប្រកបដោយបច្ចេកវិជ្ជាខ្ពស់ ដាក់បម្រើជូនដល់អតិថិជនក្នុងសហគមន៍ ចាប់ពីឆ្នាំ២០១៣ នេះតទៅ ។ ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធចំនួនបួន គឺធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ ACLEDA MFI Myanmar ហើយតាមយុទ្ធសាស្ត្រ យើងនឹងបន្តពង្រីកវិសាលភាព ប្រតិបត្តិការទៅក្នុងតំបន់អាស៊ាន និងបណ្ដាប្រទេសនៅតាមដងទន្លេមេគង្គដទៃទៀត ។

ជាមួយគ្នានេះដែរ លោក ចឹង សុចន្ថា នាយករដ្ឋបាលសាលាខេត្ត និងជាតំណាងដ៏ខ្ពង់ខ្ពស់របស់ឯកឧត្តមអភិបាលនៃគណៈអភិបាលខេត្ដមណ្ឌលគិរី បានកត់សម្គាល់ថា ៖ ការវិវឌ្ឍរបស់ធនាគារអេស៊ីលីដា សាខាខេត្ដមណ្ឌលគិរី ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជា ជាពិសេសនៅក្នុងខេត្ដមណ្ឌលគិរី ។ ថ្ងៃនេះក៏ជាពេលវេលាដ៏វិសេសវិសាល ក្នុងការបើកឱ្យដំណើរការនូវអគារការិយាល័យថ្មីនេះ ដែលមានលក្ខណៈធំទូលាយ និងប្រណិតជាងមុន ។ ទាំងនេះជាភស្ដុតាងដែលបង្ហាញឱ្យឃើញថា សាខាខេត្ដមណ្ឌលគិរី បានកើតឡើង និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្ដិការ ទាំងផ្នែកហេដ្ឋារចនាសម្ព័ន្ធ និងទាំងផ្នែកប្រសិទ្ធភាពអាជីវកម្ម ។ ក្នុងរយៈពេលកន្លងទៅ សាខានេះពិតជាបានផ្ដល់អត្ថប្រយោជន៍យ៉ាងច្រើន ចំពោះប្រជាពលរដ្ឋ និងអ្នកជំនួញនៅក្នុងស្រុកទាំងមូល ទទួលបាននូវប្រភពធនធានហិរញ្ញវត្ថុ និងសេវាកម្មហិរញ្ញវត្ថុផ្សេងៗទៀត ដែលជាគន្លឹះក្នុងការចូលរួមបង្កើតឱ្យមានការងារ ប្រភពចំណូល អភិវឌ្ឍន៍សេដ្ឋកិច្ច និងលើកកម្ពស់កម្រិតជីវភាពរបស់ប្រជាពលរដ្ឋនៅក្នុងខេត្ដមណ្ឌលគិរីទាំងមូល ។

គណៈអធិបតី និងភ្ញៀវកិត្តិយសចូលរួមក្នុងពិធីសម្ពោធអគារថ្មី ធនាគារអេស៊ីលីដា ភីអិលស៊ី សាខាខេត្តមណ្ឌលគិរី

« ព័ត៌មានមុន
ពានរង្វាន់ដៃគូឆ្នើម និងអភិវឌ្ឍន៍ផលិតផលទាន់សម័យឆ្នាំ២០១២ ពី J.P. Morgan ព័ត៌មានបន្ទាប់ »
លិខិតថ្លែងអំណរគុណពីក្រសួងសុខាភិបាល

ពិធី​សម្ពោធ​អគារ​ការិយាល័យ​ថ្មី សាខា​ខេត្តមណ្ឌលគិរី

ពិធីសម្ពោធអគារការិយាល័យថ្មី សាខាខេត្តមណ្ឌលគិរី