ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី បន្ថែមដើមទុនចំនួន ៣៩.៨៦៣.៧៤៨ ដុល្លារអាមេរិក

ធនាគារ អេស៊ីលីដា ភីអិលស៊ី បន្ថែមដើមទុនចំនួន ៣៩.៨៦៣.៧៤៨ ដុល្លារអាមេរិក

ថ្ងៃទី១២ ខែមិថុនា ឆ្នាំ២០១៤

ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ បានប្រកាសថ្ងៃនេះថាធនាគារបានបន្ថែមដើមទុនរបស់ខ្លួនចំនួន ៣៩.៨៦៣.៧៤៨ ដុល្លារអាមេរិក លើដើមទុនដែលមានបច្ចុប្បន្នចំនួន ១៨៥.៦៧១.៨៥៧ ដុល្លារអាមេរិក ។ ដូច្នេះដើមទុនសរុបរបស់ធនាគារ អេស៊ីលីដា ភីអិលស៊ី កើនដល់ ២២៥.៥៣៥.៦០៥ ដុល្លារអាមេរិក ។

ធនាគារ អេស៊ីលីដា ភីអិលស៊ី មានការរួមចំណែកភាគហ៊ុនចំនួន ៥១% ដោយភាគហ៊ុនិកកម្ពុជាក្នុងនោះមាន អង្គការអេស៊ីលីដា និងក្រុមហ៊ុន អេ អេស អេ ភីអិលស៊ី និង ៤៩% ទៀតដែលនៅសល់កាន់កាប់ដោយស្ថាប័នអន្តរជាតិឈានមុខគេរួមមាន ៖ សាជីវកម្មហិរញ្ញវត្ថុអន្តរជាតិ (IFC), Triodos Sustainable Finance Foundation, Triodos Fair Share Fund, Triodos Microfinance Fund, JSH Asia Holding Limited, COFIBRED S.A និង ORIX Corporation ។ ការបន្ថែមដើមទុននេះមានចំនួនសរុប ៣៩.៨៦៣.៧៤៨ ដុល្លារអាមេរិក ត្រូវបានធ្វើឡើងតាមរយៈការបែងចែកភាគលាភប្រចាំឆ្នាំ២០១៣ ។ នេះជាលើកទី១១ហើយដែលធនាគារ អេស៊ីលីដា ភីអិលស៊ី បានបន្ថែមដើមទុនចាប់តាំងពីបានចុះបញ្ជីជាធនាគារ ។ សូមចុចទីនេះ សម្រាប់ព័ត៌មានបន្ថែមអំពីភាគហ៊ុនិករបស់ធនាគារ អេស៊ីលីដា ភីអិលស៊ី ។

លោក ជា សុខ ប្រធានក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី ដែលជាអតីតធនាគារិកនៅធនាគារកណ្តាល និងជាអ្នកសេដ្ឋកិច្ច បានរៀបរាប់ពីមូលហេតុ ៣ សំខាន់ៗដែលធ្វើឱ្យធនាគារតែងតែបង្កើនដើមទុនរបស់ខ្លួន ។ លោកបានលើកឡើងថាមូលហេតុទី១ ដោយសារអាជីវកម្មរបស់ធនាគាររីកលូតលាស់យ៉ាងខ្លាំងជាបន្តបន្ទាប់ទាំងនៅក្នុងប្រទេស និងក្រៅប្រទេស តាមរយៈការផ្តល់ឥណទាន និងសេវាហិរញ្ញវត្ថុដទៃទៀត ហើយទ្រព្យសកម្មសរុបរបស់ធនាគារកំពុងតែកើនឡើងលើស ២៦% ជារៀងរាល់ឆ្នាំ ។ មូលហេតុទី២ គឺដើម្បីរក្សាមូលដ្ឋានដើមទុននៅក្នុងកម្រិតមួយខ្ពស់ជាងបញ្ញត្តិអនុបាតប្រុងប្រយ័ត្នសំខាន់ៗ ។ ប៉ុន្តែមូលហេតុដែលសំខាន់ជាងគេបំផុតនោះ គឺដោយសារធនាគារត្រូវការកសាងនូវទំនុកចិត្តពីសំណាក់សាធារណជន ។ យើងមានភាគហ៊ុនិកដ៏រឹងមាំ និងមានបំណងគាំទ្រធនាគារ ដូច្នេះយើងកំពុងបង្កើតនូវជំនឿទុកចិត្តនិងបង្កើនសមត្ថភាពការពារប្រាក់បញ្ញើ-សន្សំរបស់អតិថិជនរបស់យើង ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ការបន្ថែមដើមទុនជាបន្តបន្ទាប់នេះ គឺដើម្បីគាំទ្រការពង្រីកសាខាទាំងក្នុងប្រទេស និងក្រៅប្រទេស អភិវឌ្ឍន៍ និងធ្វើឱ្យបណ្តាញសេវាកម្មធនាគារតាមប្រព័ន្ធអេឡិចត្រូនិកកាន់តែមានភាពជឿនលឿន ដើម្បីសម្រេចបាននូវគោលដៅយុទ្ធសាស្ត្ររបស់ធនាគារ ។ ធនាគារ អេស៊ីលីដា ភីអិលស៊ី មានបទពិសោធន៍ក្នុងការបង្កើនប្រាក់ចំណេញសុទ្ធក្រោយពេលបង់ពន្ធរួច ពី ៤៧៥.១៦៨ ដុល្លារអាមេរិកក្នុងឆ្នាំ២០០១ រហូតដល់ ៧៧.៧៦១.៤២៨ ដុល្លារអាមេរិកនៅក្នុងឆ្នាំ២០១៣ ។ បន្ថែមពីលើការបន្ថែមដើមទុនរបស់ភាគហ៊ុនិក ធនាគារបានបង្កើតទុនបម្រុងទូទៅរបស់ខ្លួនដោយរក្សាទុកចន្លោះពី ៥០% ទៅ ៦០% នៃប្រាក់ចំណេញក្រោយបង់ពន្ធរួច ហើយធនាគារសូមបញ្ជាក់ថាមូលនិធិផ្ទាល់សុទ្ធបច្ចុប្បន្នបានកើនរហូតដល់ ៣៨៦.៣០៩.៨៨៧ ដុល្លារអាមេរិកនៅក្នុងដំណាច់ខែឧសភា ឆ្នាំ២០១៤ ។

លោកបណ្ឌិតបានបន្តទៀតថា ក្នុងនាមជាធនាគារពាណិជ្ជឈានមុខគេលើគ្រប់វិស័យក្នុងការបម្រើសេវាហិរញ្ញវត្ថុ ធនាគារ អេស៊ីលីដា ភីអិលស៊ី តែងតែយកចិត្តទុកដាក់ក្នុងការបំពេញតាមតម្រូវការរបស់អតិថិជន និងសាធារណជនគ្រប់មជ្ឈដ្ឋាន ជាមួយនឹងបទពិសោធន៍រយៈពេលជាង ២២ឆ្នាំ និងបណ្តាញប្រតិបត្តិការរហូតដល់ ២៥១ សាខាទូទាំងព្រះរាជាណាចក្រកម្ពុជា និង ៤១ ការិយាល័យនៅប្រទេសឡាវ និង ៦ ការិយាល័យ នៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបចំនួនជាង ២.៦៤ ពាន់លានដុល្លារអាមេរិកនៅដំណាច់ខែឧសភា ឆ្នាំ២០១៤ ។

នៅដំណាច់ឆ្នាំ២០១៤ នៅក្នុងប្រទេសកម្ពុជា ធនាគារ អេស៊ីលីដា ភីអិលស៊ី នឹងបង្កើននូវបណ្តាញសេវាកម្មដកប្រាក់ និងដាក់ប្រាក់ស្វ័យប្រវត្តិអេធីអឹម (ATM) រហូតដល់ទៅ ២៥០គ្រឿង និងដាក់ពង្រាយម៉ាស៊ីនឆូតកាត (POS) ចំនួន ២.៥០០គ្រឿង ។ លើសពីនេះទៀតលោកបណ្ឌិតក៏បានលើកឡើងផងដែរថាយើងមានគម្រោងបើកសាខាថ្មីចំនួន ២១ សាខាបន្ថែមទៀតនៅក្នុងអំឡុងឆ្នាំនេះដែរ ធ្វើឱ្យបណ្តាញប្រតិបត្តិការរបស់យើងកើនឡើងរហូតដល់ ២៧២ សាខានៅទូទាំងប្រទេស ដែលអាចផ្តល់ការងារឱ្យកម្មករនិយោជិតប្រមាណជាង ១១.២១៩នាក់ ។ ធនាគារអេស៊ីលីដាក៏នាំមកនូវប្រព័ន្ធគ្រប់គ្រងបច្ចេកវិជ្ជាព័ត៌មានបែបទំនើបទាន់សម័យដើម្បីបំពេញតាមការរីកចម្រើននៃវិស័យធនាគារនិងហិរញ្ញវត្ថុ និងជាពិសេសគាំទ្រចំពោះការពង្រីកប្រតិបត្តិការនៅក្នុងតំបន់ផងដែរ ។

បច្ចុប្បន្នធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។

សម្រាប់ព័ត៌មានបន្ថែម សូមទាក់ទងតាមរយៈ ៖

បណ្ឌិត សូ ផនណារី
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល : phonnary@acledabank.com.kh

លោក ព្រំ វិសុទ្ធ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល : visoth@acledabank.com.kh

« ព័ត៌មានមុន
ធនាគារអេស៊ីលីដាទទួលបានពានរង្វាន់ជាស្ថាប័នរីកចម្រើនលំដាប់ថ្នាក់ពិភពលោក ព័ត៌មានបន្ទាប់ »
ពិធីចម្រើនមង្គលអគារការិយាល័យថ្មីទី២៥២ សាខាសុធារស (ផ្សារអ៊ីអន)

ធនាគារ អេស៊ីលីដា ភីអិលស៊ី បន្ថែម​ដើមទុន​ចំនួន ៣៩.៨៦៣.៧៤៨ ដុល្លារ​អាមេរិក

ធនាគារ អេស៊ីលីដា ភីអិលស៊ី បន្ថែមដើមទុនចំនួន ៣៩.៨៦៣.៧៤៨ ដុល្លារអាមេរិក