ព័ត៌មានព័ត៌មានថ្មីៗពិធីអបអរសាទរខួបពីរឆ្នាំ ក្នុងការបង្កើតភាពជាដៃគូជាមួយក្រុមហ៊ុនព្រូដិនសលកម្ពុជា

ពិធីអបអរសាទរខួបពីរឆ្នាំ ក្នុងការបង្កើតភាពជាដៃគូជាមួយក្រុមហ៊ុនព្រូដិនសលកម្ពុជា

ថ្ងៃទី១៣ ខែមករា ឆ្នាំ២០១៥

កាលពីល្ងាចថ្ងៃទី១២ ខែមករា ឆ្នាំ២០១៥ ធនាគារអេស៊ីលីដា និងក្រុមហ៊ុនព្រូដិនសលកម្ពុជា បានប្រារព្ធពិធីអបអរសាទរខួបពីរឆ្នាំ ក្នុងការបង្កើតភាពជាដៃគូជាមួយគ្នា ។

នៅក្នុងពិធីនេះ បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថ្លែងអំណរគុណដល់អតិថិជនដែលទិញសេវាធានារ៉ាប់រងអាយុជីវិតពីក្រុមហ៊ុនព្រូដិនសល និងអបអរសាទរចំពោះសមិទ្ធផលសម្រេចបានយ៉ាងធំធេងក្នុងការបម្រើសេវាកម្មហិរញ្ញវត្ថុដ៏មានគុណភាព ឆ្លើយតបទៅនឹងតម្រូវការរបស់អតិថិជន ។

គម្រប់ខួបពីរឆ្នាំ ធនាគារ អេស៊ីលីដា ភីអិលស៊ី និងក្រុមហ៊ុនព្រូដិនសលកម្ពុជា ក៏ដូចជាអតិថិជន បានយល់ដឹងពីតម្លៃនិងអត្ថប្រយោជន៍ពិតនៃសេវាកម្មធានារ៉ាប់រងជីវិតដែលផ្តល់ដោយក្រុមហ៊ុនព្រូដិនសលជូនចំពោះសាធារណជន ។ យើងបានយល់ដឹងយ៉ាងច្បាស់ថា ផលិតផល-សេវាកម្មធានារ៉ាប់រងជីវិតមានអត្ថប្រយោជន៍លើសពីការរំពឹងទុក ។ តួយ៉ាងក្នុងឆ្នាំ២០១៤ ក្រុមហ៊ុនព្រូដិនសល បានបង់ប្រាក់ធានារ៉ាប់រងជីវិតត្រឹមត្រូវ និងទាន់ពេលវេលាដល់អតិថិជន ដែលបានទិញសេវាធានារ៉ាប់រងជីវិត រួមមានការទូទាត់ប្រាក់ធានារ៉ាប់រងជីវិតជូនក្រុមគ្រួសារបុគ្គលិករបស់ធនាគារអេស៊ីលីដា ដែលបានទទួលមរណៈភាព ។

ការទូទាត់ប្រាក់ធានារ៉ាប់រងជីវិតនេះមានតម្លៃយ៉ាងធំធេងចំពោះការធានារ៉ាប់រងជីវិតដល់យើងទាំងអស់គ្នា ។ ទន្ទឹមនឹងនេះ ស្ថាប័នយើងទាំងពីរតែងតែធ្វើតាមសំណូមពររបស់គ្រួសារមរណជន និង/ឬសាមីជនជាអត្ថិភាព ។ ពួកគាត់បានពេញចិត្តជាមួយយើង និងថ្លែងអំណរគុណចំពោះសេវាកម្មដែលពួកគាត់រង់ចាំជាយូរមកហើយ ។

ពួកយើងចាប់ផ្តើមលក់សេវាធានារ៉ាប់រងអាយុជីវិតក្នុង ៣៣ទីតាំង និងមាន ៦សាខាដែលទទួលបានសមិទ្ធិផលល្អជាងគេក្នុងឆ្នាំទី១ ។ សម្រាប់ខួបឆ្នាំទី២ ដែលយើងកំពុងប្រារព្ធនៅថ្ងៃនេះ យើងបានពង្រីកការបម្រើសេវាកម្មសេវាធានារ៉ាប់រងជិវិតរហូតដល់ ៨០ទីតាំង និងមាន ១៧សាខា ទទួលបានសមិទ្ធិផលល្អជាងគេ ។ សម្រាប់ឆ្នាំទី៣ យើងនឹងពង្រីកសេវាធានារ៉ាប់រងជិវិតរហូតដល់ ៩៦ទីតាំង ។

តម្រូវការរបស់អតិថិជនបានកើនឡើងខ្ពស់ ដោយសារយើងបម្រើអតិថិជនបានល្អ និងយកចិត្តទុកដាក់ស្តាប់អតិថិជន ។ ធនាគារ អេស៊ីលីដា ភីអិលស៊ី យល់ឃើញថា យើងគម្បីបម្រើដល់សាធារណជនដែលមានតម្រូវការសេវាកម្មធានារ៉ាប់រងជីវិតនេះទូទាំងប្រទេស នៅតាមគ្រប់សាខារបស់ធនាគារ អេស៊ីលីដា ភីអិលស៊ី ឆ្នាំបន្ទាប់ ជាលក្ខណៈទ្រង់ទ្រាយធំ ។

ថ្ងៃនេះយើងមិនត្រឹមតែប្រារព្ធខួបនៃភាពជោគជ័យ នៃភាពជាដៃគូប៉ុណ្ណោះទេ យើងថែមទាំងប្រារព្ធភាពជោគជ័យដែលស្ថាប័នយើងទាំងពីរ ទទួលបានសមិទ្ធិផលយ៉ាងធំធេង តាមរយៈកិច្ចសហប្រតិបត្តិការល្អជាមួយគ្នា ។ ភាពជោគជ័យនេះរួមចំណែកយ៉ាងធំធេងដល់ការរីកចម្រើនរបស់ធនាគារ អេស៊ីលីដា ភីអិលស៊ី ដែលធ្វើឲ្យប្រាក់ចំណេញកើនដល់ ៨២,១៤លានដុល្លារអាមេរិក និងទ្រព្យសកម្មសរុបមានចំនួន ៣,០៨ពាន់លានដុល្លារអាមេរិក នៅដំណាច់ខែធ្នូ ឆ្នាំ២០១៤ ។

ធនាគារ អេស៊ីលីដា ភីអិលស៊ី មានការិយាល័យប្រតិបត្តិការ ចំនួន២៥៣សាខា គ្របដណ្តប់គ្រប់ខេត្ត-ក្រុងនៃព្រះរាជាណាចក្រកម្ពុជា និង ៤១ ការិយាល័យ នៅប្រទេសឡាវ និង ៦ ការិយាល័យនៅប្រទេសមីយ៉ាន់ម៉ា ។ បច្ចុប្បន្ន ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ និងមានក្រុមហ៊ុនបុត្រសម្ព័ន្ធចំនួនបួន គឺធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ, និងស្ថាប័នមីក្រូហិរញ្ញវត្ថុ អេស៊ីលីដា មីយ៉ានម៉ា ។

« ព័ត៌មានមុន
ប័ណ្ណសរសើរចំពោះស្នាដៃល្អក្នុងការទប់ស្កាត់ការរីករាលដាលមេរោគអេដស៍ និងជំងឺអេដស៍នៅកន្លែងធ្វើការ ឆ្នាំ២០១៤ ព័ត៌មានបន្ទាប់ »
ធនាគារអេស៊ីលីដា បើកសាខាថ្មីទី២៥៤ នៅតំបន់សេដ្ឋកិច្ចពិសេសភ្នំពេញ

ពិធី​អបអរសាទរ​ខួប​ពីរ​ឆ្នាំ ក្នុង​ការ​បង្កើត​ភាព​ជា​ដៃគូ​ជា​មួយ​ក្រុមហ៊ុន​ព្រូដិនសល​កម្ពុជា

ពិធីអបអរសាទរខួបពីរឆ្នាំ ក្នុងការបង្កើតភាពជាដៃគូជាមួយក្រុមហ៊ុនព្រូដិនសលកម្ពុជា