ព័ត៌មានព័ត៌មានថ្មីៗពិធីសម្ពោធអគារថ្មីការិយាល័យកណ្តាលរបស់ធនាគារ អេស៊ីលីដា ភីអិលស៊ី

ពិធីសម្ពោធអគារថ្មីការិយាល័យកណ្តាលរបស់ធនាគារ អេស៊ីលីដា ភីអិលស៊ី

ថ្ងៃទី១១ ខែធ្នូ ឆ្នាំ២០១៥

ភ្នំពេញ ថ្ងៃទី១១ ខែធ្នូ ឆ្នាំ២០១៥ ៖ ធនាគារ អេស៊ីលីដា ភីអិលស៊ី ប្រជាធនាគារដែលលោកអ្នកជឿទុកចិត្ត បានប្រកាសនៅថ្ងៃនេះថា ធនាគារ អេស៊ីលីដា ភីអិលស៊ី បានបើកសម្ពោធជាផ្លូវការនូវអគារថ្មីការិយាល័យកណ្តាល ដែលមានទីតាំងនៅអគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ បានត្រៀមខ្លួនរួចជាស្រេចក្នុងការចូលសមាគមសេដ្ឋកិច្ចអាស៊ាន នាចុងឆ្នាំ២០១៥នេះ ។ ពិធីសម្ពោធដាក់ឲ្យប្រើប្រាស់ជាផ្លូវការនេះ ប្រព្រឹត្តឡើងក្រោមអធិបតីភាពដ៏ខ្ពង់ខ្ពស់របស់ កិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការនៃព្រះរាជាណាចក្រកម្ពុជា ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា និងឯកឧត្តម ឯកអគ្គរដ្ឋទូត និងរាជទូត ព្រមទាំងអង្គទូត និងឯកឧត្តម លោកជំទាវ អ្នកឧកញ៉ា លោកឧកញ៉ា ព្រមទាំងភ្ញៀវជាតិ និងអន្តរជាតិយ៉ាងច្រើនកុះករ ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា នៅពេលអេស៊ីលីដា ទទួលបានអាជ្ញាប័ណ្ណជាធនាគារឯកទេស ក្នុងឆ្នាំ២០០០ អគារការិយាល័យអេស៊ីលីដា មានទីតាំងនៅតាមបណ្តោយមហាវិថីម៉ៅសេទុង មានផ្ទៃក្រឡាបម្រើការងារចំនួន ២.២២០ ម៉ែត្រការ៉េតែប៉ុណ្ណោះ ។ ចាប់ពីពេលដែលអេស៊ីលីដា ទទួលបានអាជ្ញាប័ណ្ណជាធនាគារពាណិជ្ជក្នុងឆ្នាំ២០០៣ អគារការិយាល័យកណ្តាលត្រូវបានបង្កើនផ្ទៃក្រឡាបម្រើការងារដល់ទំហំ ៦.០៨៣ ម៉ែត្រការ៉េ មានចំណតយានយន្តចំនួន ១៦៨គ្រឿង ។ អគារនេះបានសាងសង់នៅក្នុងឆ្នាំ២០០៥ លើដីកម្មសិទ្ធិរបស់ធនាគារទីតាំងនៅតាមបណ្តោយមហាវិថីព្រះមុនីវង្ស ហើយបញ្ចប់ការសាងសង់ក្នុងឆ្នាំ២០០៧ ដោយប្រើប្រាស់ថវិកាចំនួន ៧.៦៨៥.៦៩៤ ដុល្លារអាមេរិក ។ អគារការិយាល័យបច្ចុប្បន្ននេះ បានដំណើរការអស់រយៈពេល ០៨ឆ្នាំកន្លងមកហើយ ។ ដោយសារតែសក្តានុពលកំណើនអតិថិជនពីចំនួន ៦០.៨៦០នាក់ ដល់ចំនួនជាង ២លាននាក់ បានធ្វើឲ្យទ្រព្យសកម្មរបស់អេស៊ីលីដាកើនពីចំនួន ២២.៣ លានដុល្លារអាមេរិករហូតដល់ចំនួន ៣.៩០១ លានដុល្លារអាមេរិក ហើយបុគ្គលិកកើនដល់ចំនួន ១១.៩១៣នាក់ ដែលក្នុងនោះបុគ្គលិកការិយាល័យកណ្តាលកើនពីចំនួន ៧២នាក់ នៅឆ្នាំ២០០០ ដល់ចំនួន ១.៥៥០នាក់ រួមទាំងបុគ្គលិកក្រុមហ៊ុនបុត្រសម្ព័ន្ធនាដំណាច់ខែវិច្ឆិកា ឆ្នាំ២០១៥ ហើយអាចនឹងបន្តកើនឡើងជាលំដាប់នាឆ្នាំក្រោយៗទៀត ។

បណ្ឌិត អ៊ិន ចាន់នី បានមានប្រសាសន៍បន្តទៀតថា ដោយសារតែអភិវឌ្ឍនារ្យភាពរបស់ខ្លួន និងសេចក្តីត្រូវការរបស់អតិថិជន អេស៊ីលីដា បាននិងកំពុងបន្តធ្វើនវូបនីយកម្មទាន់សម័យបច្ចេកវិជ្ជាធនាគារ នៃបណ្តាញប្រតិបត្តិការទាំងហេដ្ឋារចនាសម្ព័ន្ធអគារការិយាល័យចំនួន ៣០៤ ទាំងក្នុងប្រទេស និងក្រៅប្រទេស និងប្រព័ន្ធបច្ចេកវិជ្ជាព័ត៌មានលំដាប់ថ្នាក់អន្តរជាតិ ក្នុងនោះរួមមានសេវាអេស៊ីលីដាយូនីធីជាសេវាធនាគារតាមទូរស័ព្ទដៃ ម៉ាស៊ីនដាក់-ដកប្រាក់ស្វ័យប្រវត្តិ ម៉ាស៊ីនឆូតកាតអេស៊ីលីដាដែលជាឧបករណ៍អេឡិចត្រូនិកសម្រាប់ប្រើជាមួយប័ណ្ណអេស៊ីលីដា និងប័ណ្ណរបស់បណ្តាធនាគារក្នុងស្រុក និងអន្តរជាតិសម្រាប់ធ្វើការទូទាត់ទំនិញ ឬសេវាកម្ម ។ សេវាអេស៊ីលីដាអ៊ីនធើណែត និងសេវាអេស៊ីលីដា អ៊ីខុមមើសដែលជាសេវាលំដាប់ថ្នាក់ពិភពលោកដែលមានលក្ខណៈងាយស្រួលប្រកបដោយសុវត្ថិភាពខ្ពស់សម្រាប់អតិថិជនប្រើប្រាស់ស្វ័យប្រតិបត្តិការធ្វើឱ្យអតិថិជនអាចបម្រើសេវា ឬធ្វើប្រតិបត្តិការដោយខ្លួនឯងតាមតម្រូវការគ្រប់ពេលវេលា គ្រប់ទីកន្លែងរហូតដល់២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ដោយពុំចាំបាច់ធ្វើដំណើរមកកាន់ការិយាល័យអេស៊ីលីដាឡើយ ។

អេស៊ីលីដា បាន និងកំពុងបម្រើអតិថិជនជាសកលប្រកបដោយគុណភាព ផាសុកភាព និងសុវត្ថិភាពស្របពេលជាមួយសមាហរណកម្មសេដ្ឋកិច្ចអាស៊ាននាចុងឆ្នាំ២០១៥ នេះ ដោយបានសាងសង់អគារថ្មីការិយាល័យកណ្តាលតាមស្តង់ដារអន្តរជាតិក្នុងខែមករា ឆ្នាំ២០១៣ ដែលមានកម្ពស់ ២០ជាន់ និងអគារក្រោមដីចំនួន ០៤ជាន់មានផ្ទៃក្រឡាបម្រើការងារសរុបចំនួន ៤៣.០០០ ម៉ែត្រការ៉េសម្រាប់ប្រើប្រាស់រយៈពេល ២០ឆ្នាំទៅមុខទៀត រីឯអគារការិយាល័យកណ្តាលបច្ចុប្បន្នទុកសម្រាប់ធ្វើជាសាលបម្រើអតិថិជន ។

អគារថ្មីការិយាល័យកណ្តាលនេះគូសប្លង់ដោយក្រុមហ៊ុន Aedas មានការិយាល័យនៅទីក្រុងហុងកុងដែលជាស្ថាបត្យករល្បីល្បាញ និងទទួលស្គាល់ជាលំដាប់ថ្នាក់អន្តរជាតិរួមជាមួយនិងក្រុមហ៊ុន iLi Consulting Engineers Mekong Ltd. ជាទីប្រឹក្សាបច្ចេកទេសផ្នែកវិស្វកម្ម, Optima Consultant Ltd. ជាទីប្រឹក្សាបច្ចេកទេសផ្នែកមេកានិកអគ្គិសនី និងប្រព័ន្ធបណ្តាញទឹក និង BK Asia Pacific ជាទីប្រឹក្សាផ្នែកគ្រប់គ្រងចំណាយ ។ អគារថ្មីនេះ ត្រូវបានសាងសង់ដោយក្រុមហ៊ុន HYUNDAI Engineering Co., Ltd. ដែលជាក្រុមហ៊ុនជំនាញ និងមានឈ្មោះល្បីល្បាញលើការសាងសង់អគារជាច្រើននៅប្រទេសកូរ៉េខាងត្បូង និងនៅបរទេសព្រមទាំងទទួលបានជោគជ័យនៅក្នុងប្រទេសកម្ពុជាដោយប្រើប្រាស់រយៈពេលសាងសង់ចំនួន ៣៤ខែ និងថវិកាចំនួន ៧៦.៦៩៥.២២៤ ដុល្លារអាមេរិក បំពាក់ទៅដោយឧបករណ៍សម្ភារការិយាល័យទំនើប និងទាន់សម័យព្រមទាំងមានប្រព័ន្ធការពារសន្តិសុខ ការសន្សំសំចៃថាមពលប្រើប្រាស់ ការបង្ការអគ្គិភ័យ បណ្តាញត្រួតពិនិត្យ និងប្រព័ន្ធទូរគមនាគមន៍ ហើយនិងប្រព័ន្ធគាំទ្របច្ចេកវិជ្ជាព័ត៌មានរួមទាំងមានកន្លែងសម្រាប់ចតយានយន្តគ្រប់ប្រភេទចំនួន ១.២៣៩ គ្រឿង និងមានអាហារដ្ឋានសម្រាប់បុគ្គលិកដែលប្រកបដោយផាសុកភាពខ្ពស់ ។

លោក សូស៊ុកិ ម៉ូរី នាយកប្រតិបត្តិ និងជាប្រធានអាស៊ីបាស៊ីហ្វិចទទួលបន្ទុកជាប្រធានធុរកិច្ចទីផ្សារនៃធនាគារ Sumitomo Mitsui Banking Corporation បានមានប្រសាសន៍ថា ពីរ-បី ឆ្នាំកន្លងមកនេះធនាគារ Sumitomo Mitsui Banking Corporation បានចាប់ផ្តើមស្វែងរកដៃគូអាជីវកម្មដ៏ល្អ និងគួរឱ្យទុកចិត្តបំផុតក្នុងព្រះរាជាណាចក្រកម្ពុជាក្នុងការធ្វើកិច្ចសហការជាមួយគ្នាមិនត្រឹមតែដើម្បីជួយគាំទ្រដល់អតិថិជនសាជីវកម្មរបស់ប្រទេសជប៉ុនប៉ុណ្ណោះទេ គឺថែមទាំងជួយគាំទ្រ និងជំរុញជីវភាពរស់នៅរបស់ប្រជាជនកម្ពុជាឱ្យមានលក្ខណៈកាន់តែល្អប្រសើរផងដែរ ។ ជាជោគជ័យយើងបានសហការជាមួយធនាគារ អេស៊ីលីដា ភីអិលស៊ី និងកម្មករនិយោជិតរបស់ធនាគារ អេស៊ីលីដា ភីអិលស៊ី ដែលជាអ្នកផ្តល់សេវាធនាគារដ៏ល្អបំផុតជូនដល់អតិថិជនដូចនឹងគតិពេចន៍របស់ធនាគារ អេស៊ីលីដា ភីអិលស៊ី "ប្រជាធនាគារដែលលោកអ្នកជឿទុកចិត្ត" ពិតប្រាកដមែន ។

លោក សូស៊ុកិ ម៉ូរី បានបញ្ជាក់បន្ថែមទៀតថាការអភិវឌ្ឍដ៏ឆាប់រហ័សរបស់ធនាគារ អេស៊ីលីដា ភីអិលស៊ី ក្នុងរយៈពេល ២៣ឆ្នាំកន្លងមកនេះគឺពិតជាព្រឹត្តិការណ៍ដ៏មានសារៈសំខាន់បំផុត ។ ហើយថ្ងៃនេះផងដែរមុនការមកដល់នៃសហគមន៍សេដ្ឋកិច្ចអាស៊ាន "AEC" យើងទាំងអស់គ្នាមានវត្តមាននៅទីនេះធ្វើការប្រារព្ធឡើងនូវព្រឹត្តិការណ៍ដ៏មានសារៈសំខាន់ថ្មីមួយទៀតដើម្បីចាប់ផ្តើមប្រតិបត្តិការលើដំណើរការឆ្ពោះទៅរកចំណុចកំពូលថ្មី ។ ទោះបីជាយ៉ាងណាក៏ដោយដំណើរឆ្ពោះទៅមុខគឺវាមិនងាយស្រួលនោះទេប្រសិនបើយើងបង្កើនភាពមិនប្រាកដប្រជាក្នុងសេដ្ឋកិច្ចសកលលោក ។ ការប្រកួតប្រជែងឆ្លងប្រទេសដើម្បីផ្តល់ការបម្រើដ៏ល្អប្រសើរជូនដល់អតិថិជន នឹងបង្កើនភាពច្បាស់លាស់ជាមួយនឹងសមាហរណកម្មហិរញ្ញវត្ថុដ៏ធំក្នុងតំបន់អាស៊ាននៅឆ្នាំ២០២០ ។ ធនាគារ អេស៊ីលីដា ភីអិលស៊ី អាចប្រឈរមុខនឹងបញ្ហាប្រឈមគ្រប់ប្រភេទដែលនឹងកើតមានតាមរយៈបច្ចេកវិជ្ជាហិរញ្ញវត្ថុថ្មីៗ "Fin Tech" ដែលបណ្តាស្ថាប័នប្រកួតប្រជែងទាំងនោះគេនឹងបង្កើតសេវាហិរញ្ញវត្ថុតាមរយៈប្រព័ន្ធអ៊ីនធើណែត ។ ជាមួយគ្នានេះដែរ ធនាគារ អេស៊ីលីដា ភីអិលស៊ី ប្រាកដជាអាចតស៊ូជម្នះនឹងបញ្ហាប្រឈមដែលនឹងកើតមានឡើងនេះក្នុងនាមជាស្ថាប័នដែលមានឥទ្ធិពលហើយក៏ជាធនាគារដែលមានការរីកចម្រើនខ្ពស់ជាងគេក្នុងតំបន់ ។ ដោយសារហេតុអ្វី ? ពីព្រោះសមិទ្ធផលរបស់អេស៊ីលីដា រយៈពេលជាង ២៣ឆ្នាំកន្លងមកនេះបានបង្ហាញឱ្យយើងដឹងបែបនោះ ។ ហើយព្រមទាំងអគារស្តង់ដារថ្មីស្រឡាងនេះហើយគឺជានិមិត្តរូបមិនត្រឹមតែជាចក្ខុវិស័យប៉ុណ្ណោះទេប៉ុន្តែជាទំនុកចិត្តរបស់ធនាគារដែលបានដើរតួនាទីដ៏ធំក្នុងឆ្នាំបន្តបន្ទាប់ទៀត ។

លោក សូស៊ុកិ ម៉ូរី ក៏បានបន្តទៀតថា ធនាគារ Sumitomo Mitsui Banking Corporation មានមោទនភាពដែលបានចូលរួមចំណែកក្នុងព្រឹត្តិការណ៍នេះជាមួយធនាគារ អេស៊ីលីដា ភីអិលស៊ី ហើយមិនត្រឹមតែជាភាគហ៊ុនិកប៉ុណ្ណោះទេ ប៉ុន្តែក៏ជាដៃគូ និងជាក្រុមដែលរួមសហប្រតិបត្តិការដ៏ល្អជាមួយគ្នាផងដែរ ។

ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានវាយតម្លៃខ្ពស់ចំពោះថ្នាក់ដឹកនាំ ធនាគារ អេស៊ីលីដា ជាពិសេស បណ្ឌិត អ៊ិន ចាន់នី ដែលបានរាយការណ៍ជូនអង្គពិធីយ៉ាងក្បោះក្បាយដោយឆ្លុះបញ្ចាំងពីវឌ្ឍនភាព និងការរីកចម្រើននៃប្រតិបត្តិការរបស់ធនាគារ ក៏ដូចជាការពង្រីកបណ្តាញប្រតិបត្តិការទាំងក្នុងនិងក្រៅប្រទេស ។ ក្នុងការរួមចំណែករក្សាស្ថិរភាពម៉ាក្រូសេដ្ឋកិច្ច និងគាំទ្រគោលនយោបាយរបស់រាជរដ្ឋាភិបាលធនាគារជាតិនៃកម្ពុជាបានបន្តអនុវត្តគោលនយោបាយរូបិយវត្ថុប្រកបដោយភាពទន់ភ្លន់ និងប្រុងប្រយ័ត្នផ្អែកលើការរីកចម្រើននៃសេដ្ឋកិច្ចជាតិ និងនិន្នាការនៃស្ថានភាពសេដ្ឋកិច្ចតំបន់និងសកលដោយរក្សាបាននូវស្ថិរភាពថ្លៃនិងអត្រាប្តូរប្រាក់រៀល ។ អត្រាអតិផរណាបន្តមានស្ថិរភាពដោយត្រូវបានប៉ាន់ស្មានក្នុងកម្រិតក្រោម ៣% ដែលជាកម្រិតទាបអាចគ្រប់គ្រងបាន ។ ធនាគារជាតិនៃកម្ពុជាក៏បានពង្រឹងជាបន្តបន្ទាប់ជាមួយភាគីពាក់ព័ន្ធដើម្បីបង្កើនការយល់ដឹងរបស់សាធារណជនអំពីវិស័យធនាគារនិងហិរញ្ញវត្ថុ និងការប្រើប្រាស់សេវាហិរញ្ញវត្ថុដែលកំពុងរីកចម្រើននិងគ្របដណ្តប់រហូតដល់តំបន់ជនបទ និងដើម្បីពង្រឹងបរិយាប័ន្នហិរញ្ញវត្ថុ និងជំនឿទុកចិត្តរបស់សាធារណជនមកលើប្រព័ន្ធធនាគារនិងហិរញ្ញវត្ថុនៅកម្ពុជា ។

ឯកឧត្តម ជា ចាន់តូ បានមានប្រសាសន៍បន្តទៀតថាអត្រាកំណើនសេដ្ឋកិច្ចកម្ពុជាត្រូវបានព្យាករណ៍ថានឹងបន្តមានភាពរឹងមាំក្នុងកម្រិតជាមធ្យមប្រមាណ ៦,៩% ដែលគាំទ្រដោយកំណើនដ៏រឹងមាំនៃការនាំចេញផលិតផល វាយនភណ្ឌ ការរីកចម្រើននៃវិស័យកសិកម្ម ទេសចរណ៍ និងសំណង់ ។ សមិទ្ធផលដ៏គួរឱ្យកត់សម្គាល់នេះអាចសម្រេចទៅបានដោយសារកិច្ចខិតខំប្រឹងប្រែង របស់រាជរដ្ឋាភិបាលក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការរក្សាបាននូវស្ថិរភាពនយោបាយ សន្តិសុខសង្គម និងស្ថិរភាពម៉ាក្រូសេដ្ឋកិច្ច តាមរយៈការបន្តអនុវត្តកម្មវិធីកំណែទម្រង់ និងអភិវឌ្ឍនានាព្រមទាំងការអនុវត្តគោលនយោបាយរូបិយវត្ថុប្រកបដោយភាពប្រុងប្រយ័ត្នដើម្បីគាំទ្រដល់កំណើនសេដ្ឋកិច្ចប្រកបដោយចិរភាព ។

កិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការនៃព្រះរាជាណាចក្រកម្ពុជា បានមានប្រសាសន៍កោតសរសើរចំពោះភាគហ៊ុនិក ក្រុមប្រឹក្សាភិបាល ថ្នាក់ដឹកនាំ និងនិយោជិតទាំងអស់ដែលបានខិតខំប្រឹងប្រែងពង្រឹង និងពង្រីកសកម្មភាពធនាគាររបស់ខ្លួន ហើយបានប្រតិស្នឡើងនូវអគារថ្មីដ៏ទំនើប និងរឹងមាំព្រមទាំងបំពាក់ដោយប្រព័ន្ធសុវត្ថិភាពទាន់សម័យស្របតាមបទដ្ឋានអន្តរជាតិ ។ រូបរាង និងទីតាំងអគារថ្មីនេះនឹងសម្រួលដល់ការបម្រើសេវាកម្មជូនអតិថិជនឱ្យកាន់តែល្អប្រសើរដោយមានទីកន្លែង និងបរិស្ថានល្អ ដែលធ្វើឱ្យធនាគារបង្កើនបាននូវភាពជឿទុកចិត្តចំពោះសាធារណជនទាំងក្នុង និងក្រៅប្រទេស ។ ធនាគារ អេស៊ីលីដា ភីអិលស៊ី បានរួមចំណែកក្នុងការអភិវឌ្ឍវិស័យហិរញ្ញវត្ថុនៅកម្ពុជាដោយបានទាក់ទាញវិនិយោគិនក្នុង និងក្រៅប្រទេស កៀរគរប្រាក់សន្សំ ផ្តល់ហិរញ្ញប្បទាន និងផ្តល់សេវាហិរញ្ញវត្ថុជាច្រើនទៀតដល់អាជីវករ ពាណិជ្ជករ វិនិយោគិន និងប្រជាពលរដ្ឋ ជាពិសេសបានពង្រីកសកម្មភាពបណ្តាញប្រតិបត្តិការទាំងហេដ្ឋារចនាសម្ព័ន្ធការិយាល័យចំនួន ៣០៤ ទាំងក្នុងប្រទេស និងក្រៅប្រទេស ។ សកម្មភាពទាំងនេះជាមោទនភាពដ៏ខ្ពង់ខ្ពស់របស់ព្រះរាជាណាចក្រកម្ពុជាដែលមានធនាគារ អេស៊ីលីដា ភីអិលស៊ី ជាធនាគារខ្មែរដំបូងគេបង្អស់បានពង្រីកវិសាលភាពប្រតិបត្តិការទៅក្នុងតំបន់អាស៊ាន ។ ជាងនេះទៅទៀតការវិវឌ្ឍរបស់ធនាគារ អេស៊ីលីដា ភីអិលស៊ី ការិយាល័យកណ្តាល ជាសក្ខីកម្មដែលបញ្ជាក់ពីការរីកចម្រើនភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជាជាពិសេសការត្រៀមខ្លួនសម្រាប់សមាហរណកម្មសហគមន៍សេដ្ឋកិច្ចអាស៊ាននៅចុងខែធ្នូ ឆ្នាំ២០១៥ នេះ ។

កិត្តិសេដ្ឋាបណ្ឌិត គាត ឈន់ ក៏បានជម្រាបពីសកម្មភាពរបស់វិស័យធនាគារ និងហិរញ្ញវត្ថុមានការរីកចម្រើនជាខ្លាំងព្រមទាំងបន្តរក្សាបាននូវភាពរឹងមាំ និងស្ថិរភាពក្នុងកាលៈទេសៈលំបាកនានាកន្លងមក ។ ជាក់ស្ដែងគិតត្រឹមដំណាច់ត្រីមាសទី៣ ឆ្នាំ២០១៥ ទាំងធនាគារពាណិជ្ជ ទាំងធនាគារឯកទេសបានបើកសាខាសរុបចំនួន ៥៨៦ កន្លែងនៅទូទាំងប្រទេស ។ ទ្រព្យសកម្មក្នុងវិស័យធនាគារដោយរាប់បញ្ចូលទាំងស្ថាប័នមីក្រូហិរញ្ញវត្ថុស្របច្បាប់កើនឡើងដល់ប្រមាណជាង ២២ ពាន់លានដុល្លារអាមេរិក ខណៈដែលប្រាក់បញ្ញើអតិថិជនបានកើនឡើងដល់ប្រមាណជាង ១២ ពាន់លានដុល្លារអាមេរិក និងឥណទានសរុបកើនឡើងដល់ប្រមាណជាង ១៤ ពាន់លានដុល្លារអាមេរិក ។ តួលេខនេះបង្ហាញពីទំនុកចិត្តកាន់តែខ្ពស់មកលើប្រព័ន្ធធនាគារ និងហិរញ្ញវត្ថុរបស់កម្ពុជា ។ គោលដៅជាយុទ្ធសាស្ត្ររបស់រាជរដ្ឋាភិបាលក្នុងការអភិវឌ្ឍវិស័យធនាគារ និងហិរញ្ញវត្ថុគឺបន្តប្រឹងប្រែងធ្វើឱ្យវិស័យនេះកាន់តែមានវិសាលភាពទូលំទូលាយ ពិពិធភាព ស៊ីជម្រៅ និងរឹងមាំដោយផ្អែកលើគោលការណ៍ទីផ្សារដើម្បីរួមចំណែកទ្រទ្រង់កំណើនសេដ្ឋកិច្ច និងកាត់បន្ថយភាពក្រីក្រ ។ ដើម្បីសម្រេចបាននូវគោលដៅនេះរាជរដ្ឋាភិបាលបានដាក់ចេញនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១១-២០២០ ដោយផ្ដោតលើអាទិភាពមួយចំនួនដូចជា៖ ការអភិវឌ្ឍនិងសម្របសម្រួលក្របខ័ណ្ឌគោលនយោបាយ, ការអភិវឌ្ឍសមត្ថភាពស្ថាប័ននិងធនធានមនុស្ស, ការអភិវឌ្ឍយន្តការបង្ការ និងដោះស្រាយវិបត្តិ និងយន្តការផ្ដល់សញ្ញាជាមុនអំពីវិបត្តិនានា, ការអភិវឌ្ឍហេដ្ឋារចនាសម្ព័ន្ធ និងប្រសិទ្ធភាពប្រតិបត្តិការនៃវិស័យហិរញ្ញវត្ថុ, ការពង្រីកសេវាមីក្រូហិរញ្ញវត្ថុដែលមានការប្រាក់សមរម្យសម្រាប់ប្រជាជនក្រីក្រជាដើម ។ ភាពរឹងមាំ ស្ថិរភាព និងការរីកចម្រើននៃវិស័យធនាគារនិងហិរញ្ញវត្ថុនិយាយដោយឡែក និងការអភិវឌ្ឍសង្គមសេដ្ឋកិច្ចយ៉ាងខ្លាំងក្លាមកទល់បច្ចុប្បន្ននិយាយជារួមគឺជាមនុញ្ញកុសលនៃការដឹកនាំដ៏វៃឈ្លាសពោរពេញទៅដោយបញ្ញាញាណ និងគតិបណ្ឌិតដ៏ខ្ពង់ខ្ពស់ប្រកបដោយភាពប្រាកដនិយមរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទោះបីទទួលរងនូវបញ្ហាប្រឈមនានាជាពិសេសគ្រោះធម្មជាតិ និងឥទ្ធិពលអាក្រក់ពីវិបត្តិកលិយុគហិរញ្ញវត្ថុអន្តរជាតិ ព្រមទាំងការធ្លាក់ចុះនៃសេដ្ឋកិច្ចសាកលលោកក្តីក៏កម្ពុជាសម្រេចបានកំណើនសេដ្ឋកិច្ចខ្ពស់ប្រកបដោយចីរភាព និងបរិយាប័ន្នជាមធ្យមជាង ៨% ក្នុងមួយឆ្នាំក្នុងរយៈពេលជាងមួយទស្សវត្សរ៍កន្លះតាំងពីឆ្នាំ ១៩៩៩ មក ។ ភាពធននៃសេដ្ឋកិច្ចកម្ពុជាខាងលើនេះក៏ដោយសារតែគុណបុណ្យនៃនយោបាយ ឈ្នះ-ឈ្នះ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលបានដាក់ចេញ និងដឹកនាំអនុវត្តផ្ទាល់ហើយសម្រេចបានជោគជ័យដ៏ត្រចះត្រចង់កាលពីចុងឆ្នាំ១៩៩៨ ដែលបាននាំមកជូនកម្ពុជានូវសុខសន្តិភាពពេញលេញឯកភាពទឹកដី ឯកភាពជាតិដែលជាបុរេល័ក្ខខ័ណ្ឌក្នុងការរក្សានូវស្ថិរភាពនយោបាយ ស្ថិរភាពម៉ាក្រូសេដ្ឋកិច្ច ស្ថិរភាពហិរញ្ញវត្ថុ សណ្ដាប់ធ្នាប់សង្គម លទ្ធិប្រជាធិបតេយ្យ និងការគោរពសិទ្ធិមនុស្ស ។ ទន្ទឹមនឹងនេះ កិត្តិសេដ្ឋាបណ្ឌិត គាត ឈន់ ក៏បានបញ្ជាក់ជូនសាធារណជនទាំងអស់ជាពិសេសបងប្អូននៅជនបទឱ្យបានជ្រាបថាស្ថាប័នមីក្រូហិរញ្ញវត្ថុមួយចំនួនដែលកំពុងធ្វើប្រតិបត្តិការនៅជនបទពុំបានចុះបញ្ជីត្រឹមត្រូវតាមច្បាប់ និងឆ្លៀតឱកាសផ្ដល់ឥណទានដោយយកការប្រាក់ខ្ពស់ហួសហេតុ ។ ជាមួយគ្នានេះក៏មានស្ថាប័នឬអង្គការមួយចំនួនទៀតធ្វើសកម្មភាពមីក្រូហិរញ្ញវត្ថុដោយខុសច្បាប់ និងបម្រើសកម្មភាពនយោបាយទៅវិញដោយពុំមានបញ្ជាក់អំពីប្រភពហិរញ្ញប្បទាន និងអត្តសញ្ញាណច្បាស់លាស់ ។ ចំពោះមុខ ក្រសួង ស្ថាប័ន និងអាជ្ញាធរមានសមត្ថកិច្ចពាក់ព័ន្ធនឹងចាត់វិធានការផ្លូវច្បាប់ម៉ឺងម៉ាត់បំផុតចំពោះស្ថាប័នឬអង្គការដែលខុសច្បាប់ទាំងនោះ ។ កិត្តិសេដ្ឋាបណ្ឌិត បានស្នើឱ្យធនាគារ អេស៊ីលីដា ភីអិលស៊ី បន្តពង្រីកតំបន់គ្របដណ្ដប់សេវារបស់ខ្លួន ក្នុងន័យរួមចំណែកជាមួយរាជរដ្ឋាភិបាលក្នុងការលុបបំបាត់ស្ថាប័នមីក្រូហិរញ្ញវត្ថុខុសច្បាប់នៅទូទាំងប្រទេស ។

កិត្តិសេដ្ឋាបណ្ឌិត គាត ឈន់ ក៏បានរម្លឹកអំពីសារអំពាវនាវរបស់សម្ដេចតេជោនាយករដ្ឋមន្ត្រីកាលពីថ្ងៃទី៧ ខែធ្នូ ឆ្នាំ២០១៥ ដែលបានស្នើដល់ស្ថាប័នហិរញ្ញវត្ថុ និងធនាគារត្រូវធ្វើការជាមួយស្ថាប័នមីក្រូហិរញ្ញវត្ថុរិះរកមធ្យោបាយជួយប្រជាជនដែលរងគ្រោះដូចជាពន្យារពេលសង ឬពន្យារពេលសងដោយមិនយកការប្រាក់ ឬបន្ថយការប្រាក់ និងទប់ស្កាត់ការរឹបអូសដីធ្លីផ្ទះសម្បែង ទ្រព្យសម្បត្តិពីម្ចាស់បំណុលចំពោះកូនបំណុលដែលកំពុងជួបការលំបាកដោយគ្រោះធម្មជាតិនៅឆ្នាំនេះ ។ នេះជាសក្ខីភាពបញ្ជាក់ពីការយកចិត្តទុកដាក់ខ្លាំងបំផុតរបស់សម្ដេចនាយករដ្ឋមន្ត្រីចំពោះជីវភាពរស់នៅ និងសុខុមាលភាពរបស់បងប្អូនប្រជាកសិករដែលកំពុងប្រឈមនឹងបញ្ហាធ្លាក់ចុះនៃតម្លៃកសិផល និងកង្វះទឹកសម្រាប់បង្ករបង្កើនផល ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី កំពុងកាត់ខ្សែបូ
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា កំពុងកាត់ខ្សែបូ
កិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការនៃព្រះរាជាណាចក្រកម្ពុជា កំពុងកាត់ខ្សែបូ
ការអញ្ជើញមកដល់របស់គណៈអធិបតី
របាំជូនពរ (បម្តែងដោយបុគ្គលិកធនាគារអេស៊ីលីដា)
របាំជូនពរ (បម្តែងដោយបុគ្គលិកធនាគារអេស៊ីលីដា)
របាំហង្សមាសអេស៊ីលីដា (បម្តែងដោយបុគ្គលិកធនាគារអេស៊ីលីដា)
គណៈអធិបតីអង្គុយលើវេទិកា
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី ឡើងថ្លែងសន្ទរកថា
លោក សូស៊ុកិ ម៉ូរី នាយកប្រតិបត្តិ និងជាប្រធានអាស៊ីបាស៊ីហ្វិច ទទួលបន្ទុកជាប្រធានធុរកិច្ចទីផ្សារ SMBC ឡើងថ្លែងសន្ទរកថា
ឯកឧត្តម ជា ចាន់តូ ទេសាភិបាលធនាគារជាតិ នៃ កម្ពុជា ឡើងថ្លែងសន្ទរកថា
កិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការនៃព្រះរាជាណាចក្រកម្ពុជា ឡើងថ្លែងសន្ទរកថា
ភ្ញៀវកិត្តិយសជាតិ និងអន្តរជាតិ

សម្រាប់ព័ត៌មានបន្ថែម សូមទំនាក់ទំនងតាមរយៈ

បណ្ឌិត សូ ផនណារី
អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល ៖ phonnary@acledabank.com.kh

លោក ព្រំ វិសុទ្ធ
អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល ៖ visoth@acledabank.com.kh

« ព័ត៌មានមុន
ពិធីចម្រើនមង្គលអគារការិយាល័យថ្មី សាខាចំការដូង ព័ត៌មានបន្ទាប់ »
អេស៊ីលីដា ស៊ីឃ្យួរឹធី ភីអិលស៊ី ប្តូរទីតាំងការិយាល័យថ្មី

ពិធី​សម្ពោធ​អគារ​ថ្មី​ការិយាល័យ​កណ្តាល​របស់​ធនាគារ អេស៊ីលីដា ភីអិលស៊ី

ពិធីសម្ពោធអគារថ្មីការិយាល័យកណ្តាលរបស់ធនាគារ អេស៊ីលីដា ភីអិលស៊ី