ព័ត៌មានព័ត៌មានថ្មីៗការទូទាត់ប្រាក់រៀលឆ្លងដែនតាមឃ្យូអរកូត (QR Code) កាន់តែទូលំទូលាយក្នុងតំបន់អាស៊ាន

ការទូទាត់ប្រាក់រៀលឆ្លងដែនតាមឃ្យូអរកូត (QR Code) កាន់តែទូលំទូលាយក្នុងតំបន់អាស៊ាន

ថ្ងៃទី១ ខែកញ្ញា ឆ្នាំ២០២២

ថ្ងៃពុធ ៦កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១ ខែកញ្ញា ឆ្នាំ២០២២ ធនាគារ អេស៊ីលីដា ភីអិលស៊ី (ប្រជាធនាគារដែលលោកអ្នកជឿទុកចិត្ត) បានប្រកាសជាសាធារណៈថា ធនាគារ អេស៊ីលីដា ភីអិលស៊ី ត្រូវបានជ្រើសរើសជា ធនាគារទំនាក់ទំនង (Sponsoring Bank) សម្រាប់ការទូទាត់ប្រាក់រៀលឆ្លងដែន តាមឃ្យូអរកូត (QR Code) ជាមួយបណ្តាប្រទេសជិតខាងក្នុងតំបន់អាស៊ាន រួមមាន៖ សាធារណរដ្ឋសង្គមនិយមវៀតណាម និងសាធារណរដ្ឋប្រជាធិបតេយ្យប្រជាមានិតឡាវ បន្ថែមលើការទូទាត់ប្រាក់រៀលឆ្លងដែនតាមរយៈឃ្យូអរកូត (QR Code) ជាមួយព្រះរាជាណាចក្រថៃ ដែលបានដាក់ឲ្យដំណើរការនៅខែកុម្ភៈ ឆ្នាំ២០២០ ដើម្បីជំរុញការប្រើប្រាស់ប្រាក់រៀលឲ្យកាន់តែទូលំទូលាយ បង្កភាពងាយស្រួលក្នុងការទូទាត់ នៅតាមបណ្តាប្រទេសជាសមាជិកអាស៊ាន និងដើម្បីជំរុញបរិយាបន្នហិរញ្ញវត្ថុអាស៊ាន ស្របតាមទិសដៅសមាហរណកម្មសហគមន៍សេដ្ឋកិច្ចអាស៊ាន។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា៖ "ជាមួយនឹងការត្រៀមខ្លួនរួចជាស្រេចនូវបច្ចេកវិទ្យាហិរញ្ញវត្ថុ ធនាគារជាតិ នៃ កម្ពុជា បានជ្រើសរើសយក ធនាគារ អេស៊ីលីដា ភីអិលស៊ី ជាធនាគារទំនាក់ទំនងសម្រាប់ការទូទាត់ប្រាក់រៀលឆ្លងដែនតាមឃ្យូអរកូត (QR Code) ជាមួយសាធារណរដ្ឋសង្គមនិយមវៀតណាម និងសាធារណរដ្ឋប្រជាធិបតេយ្យប្រជាមានិតឡាវ ក្នុងគោលដៅលើកកម្ពស់ការទូទាត់ប្រាក់រៀលឲ្យកាន់តែទូលំទូលាយក្នុងតំបន់អាស៊ាន និងដើម្បីជំរុញបរិយាបន្នហិរញ្ញវត្ថុអាស៊ាន ស្របតាមទិសដៅសមាហរណកម្មសហគមន៍សេដ្ឋកិច្ចអាស៊ាន"។

លោកបណ្ឌិត បានបន្តថា កាលពីខែកុម្ភៈ ឆ្នាំ២០២០ ធនាគារ អេស៊ីលីដា ភីអិលស៊ី និង Siam Commercial Bank (SCB) ត្រូវបានជ្រើសរើសជាធនាគារទំនាក់ទំនង ដើម្បីសហការគ្នាគាំទ្រលើការទូទាត់តាមរយៈប្រព័ន្ធឃ្យូអរកូត (QR Code) ឆ្លងដែន ដោយអតិថិជន និងប្រជាជនកម្ពុជាអាចទូទាត់ជា ប្រាក់រៀល នៅក្នុងព្រះរាជាណាចក្រថៃ តាមរយៈការស្កែនឃ្យូអរកូត (QR Code)។

នៅចុងឆ្នាំ២០២២នេះ អតិថិជន និងប្រជាជនថៃ អាចទូទាត់ជាប្រាក់បាតថៃ នៅក្នុងព្រះរាជាណាចក្រកម្ពុជា តាមរយៈការស្កែនឃ្យូអរកូត (QR Code)។ បន្ថែមលើការទូទាត់ប្រាក់រៀល តាមឃ្យូអរកូត (QR Code) នៅព្រះរាជាណាចក្រថៃ ដែលកំពុងដំណើរការ ធនាគារ អេស៊ីលីដា បាននិងកំពុងសហការជាមួយស្ថាប័នពាក់ព័ន្ធ ដើម្បីដំណើរការការទូទាត់ប្រាក់រៀលឆ្លងដែននៅ សាធារណរដ្ឋសង្គមនិយមវៀតណាម និងសាធារណរដ្ឋប្រជាធិបតេយ្យប្រជាមានិតឡាវ តាមរយៈការប្រើប្រាស់ ឃ្យូអរកូត (QR Code) ដែលគ្រោងនឹងដាក់ឲ្យដំណើរការនៅចុងឆ្នាំ២០២២ នេះដែរ។

ជំហានបន្ទាប់ ធនាគារ អេស៊ីលីដា គ្រោងនឹងសហការជាមួយបណ្តាប្រទេសដទៃទៀត ដែលជាសមាជិកអាស៊ាន ដើម្បីបន្តពង្រីកការទូទាត់ប្រាក់រៀល នៅតំបន់អាស៊ានឲ្យកាន់តែទូលំទូលាយបន្ថែមទៀត ដើម្បីសម្រួលដល់ការទូទាត់ កាត់បន្ថយចំណាយប្រតិបត្តិការ និងជួយជំរុញបរិយាបន្នហិរញ្ញវត្ថុអាស៊ាន។

« ព័ត៌មានមុន
ជំនួបពិភាក្សាជាមួយអ្នកជំនួញជោគជ័យ ក្នុងប្រទេសកម្ពុជា ព័ត៌មានបន្ទាប់ »
ពានរង្វាន់អ្នកដឹកនាំធុរកិច្ចឆ្នើមប្រចាំតំបន់អាស៊ាន

ការទូទាត់​ប្រាក់រៀល​ឆ្លងដែន​តាម​ឃ្យូអរកូត (QR Code) កាន់តែ​ទូលំទូលាយ​ក្នុង​តំបន់​អាស៊ាន

ការទូទាត់ប្រាក់រៀលឆ្លងដែនតាមឃ្យូអរកូត (QR Code) កាន់តែទូលំទូលាយក្នុងតំបន់អាស៊ាន