ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី ចុះអនុស្សរណៈយោគយល់គ្នា ជាមួយ សមាគមគ្រូពេទ្យស្ម័គ្រចិត្តយុវជនសម្តេចតេជោ

ធនាគារ អេស៊ីលីដា ភីអិលស៊ី ចុះអនុស្សរណៈយោគយល់គ្នា ជាមួយ សមាគមគ្រូពេទ្យស្ម័គ្រចិត្តយុវជនសម្តេចតេជោ

ថ្ងៃទី១៧ ខែមីនា ឆ្នាំ២០២៣

រាជធានីភ្នំពេញ ថ្ងៃសុក្រ ១១រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែមីនា ឆ្នាំ២០២៣៖ ធនាគារ អេស៊ីលីដា ភីអិលស៊ី ជាធនាគារពាណិជ្ជទីមួយ ដែលបានបោះផ្សាយមូលបត្រកម្មសិទ្ធិជាសាធារណៈនៅកម្ពុជា បានចុះអនុស្សរណៈយោគយល់គ្នា ជាមួយ សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្នុងគោលបំណងដើម្បីសហការគ្នាក្នុងការផ្តល់សេវាពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋក្រីក្រទូទាំងព្រះរាជាណាចក្រកម្ពុជា។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា សុខភាពរបស់ប្រជាពលរដ្ឋពិតជាមានសារៈសំខាន់ខ្លាំងណាស់ ពីព្រោះពួកគេជាកម្លាំងចលករនៃការកសាងជាតិ និងរួមចំណែកក្នុងការអភិវឌ្ឍសេដ្ឋកិច្ចជាតិ។

ប្រជាជនមានសុខភាពល្អ មានការចូលរួមកាន់តែសកម្ម ដើម្បីធ្វើឲ្យសេដ្ឋកិច្ចជាតិមានការរីកចម្រើន។ ដោយសង្កេតឃើញថា សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានចូលរួមចំណែកយ៉ាងសំខាន់ក្នុងការព្យាបាលជំងឺរបស់ប្រជាជន និងសាធារណៈជនទូទៅ ដោយឥតគិតថ្លៃ ជូនពួកគាត់ឲ្យជាសះស្បើយពីជំងឺ និងមានសុខភាពល្អ ធនាគារ អេស៊ីលីដា គាំទ្រថវិកា សម្រាប់រយៈពេល ០៣ឆ្នាំ (២០២៣-២០២៥) តាមរយៈការចុះអនុស្សរណៈយោគយល់គ្នា ជាមួយសមាគម គ្រូពេទ្យស្ម័គ្រចិត្តយុវជនសម្តេចតេជោ (TYDA) រួមចំណែកក្នុងសកម្មភាពមនុស្សធម៌ ក្នុងបុព្វហេតុប្រជាពលរដ្ឋ និងសង្គម ដើម្បីគាំទ្រដល់សុខុមាលភាពសាធារណៈ ក្នុងការចុះពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋក្រីក្រទូទាំងព្រះរាជាណាចក្រកម្ពុជា ព្រមទាំងចូលរួមចំណែកក្នុងការកាត់បន្ថយភាពក្រីក្រ និងសម្រាលបន្ទុកចំណាយជូនដល់ពួកគាត់។

លោកបណ្ឌិត បានបន្ថែមទៀតថា ក្នុងរយៈពេលជាង ១២ឆ្នាំកន្លងមកនេះ ធនាគារ អេស៊ីលីដា បានចូលរួមចំណែកក្នុងការបរិច្ចាគ និងឧបត្ថម្ភក្នុងសកម្មភាពសង្គម និងមនុស្សធម៌សំខាន់ៗ ជាច្រើនរួមមាន៖ កាកបាទក្រហមកម្ពុជា មូលនិធិគន្ធបុប្ផាកម្ពុជា មន្ទីរពេទ្យកុមារអង្គរ មូលនិធិរក្សាកុមារ និងចូលរួមជាមួយរាជរដ្ឋាភិបាលក្នុងការទិញវ៉ាក់សាំងការពារជំងឺកូវីដ-១៩ និងការឧបត្ថម្ភសម្រាប់ជួយសង្រ្គោះប្រជាពលរដ្ឋរងគ្រោះដោយសារទឹកជំនន់ ព្រមទាំងចូលរួមចំណែកនូវគ្រប់សកម្មភាព ផ្សេងៗជាច្រើនទៀត។

« ព័ត៌មានមុន
ធនាគារ អេស៊ីលីដា ឧបត្ថម្ភកម្មវិធីបុណ្យទន្លេលើកទី៧ ព័ត៌មានបន្ទាប់ »
Ria Money Transfer ចាប់ដៃគូជាមួយធនាគារ អេស៊ីលីដា ក្នុងការពង្រីកសេវាកម្មផ្ទេរប្រាក់នៅកម្ពុជា