ព័ត៌មានព័ត៌មានថ្មីៗកម្មវិធីជំនួបធុរកិច្ច រវាងវិនិយោគិនកម្ពុជា និងជប៉ុន

កម្មវិធីជំនួបធុរកិច្ច រវាងវិនិយោគិនកម្ពុជា និងជប៉ុន

ថ្ងៃទី២០ ខែវិច្ឆិកា ឆ្នាំ២០២៣

ធនាគារ អេស៊ីលីដា ភីអិលស៊ី សហការជាមួយ សមាគមជប៉ុន-កម្ពុជា (JCA) បានរៀបចំកម្មវិធីជំនួបធុរកិច្ច នៅការិយាល័យកណ្តាល ធនាគារ អេស៊ីលីដា នាថ្ងៃទី២០ ខែវិច្ឆិកា ឆ្នាំ២០២៣។

កម្មពិធីនេះអញ្ជើញចូលរួមជាអធិបតី ដោយបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី និង ឯកឧត្តម តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា (JCA)។

នេះជាលើកទី៣ហើយដែល JCA និងធនាគារ អេស៊ីលីដា បានរៀបចំកម្មវិធីជំនួបធុរកិច្ច រួមគ្នានេះ ដែលលើកទី១ ធ្វើនៅថ្ងៃទី១១ ខែធ្នូ ឆ្នាំ២០១៩ និងលើកទី២ នៅថ្ងៃទី២៥ ខែមេសា ឆ្នាំ២០២២។

យើងខ្ញុំសង្ឃឹមថាព្រឹត្តិការណ៍ថ្ងៃនេះនឹងនាំមកនូវឱកាស និងចំណេះដឹងបន្ថែមទៀត សម្រាប់វិនិយោគិនដែលបានចូលរួមទាំងអស់ ដើម្បីជំរុញការផ្លាស់ប្តូរ និងការទំនាក់ទំនងប្រកបដោយផ្លែផ្កា ដើម្បីបង្កើត និងពង្រឹងឱកាសអាជីវកម្ម។

ថ្ងៃនេះជាលើកទី៣ហើយ ដែលធនាគារ អេស៊ីលីដា និង JCA រៀបចំកម្មវិធីដ៏សំខាន់នេះ ដើម្បីអនុញ្ញាតឱ្យវិនិយោគិនដ៏មានកិត្យានុភាពមកពីវិស័យពាណិជ្ជកម្មចម្រុះ ចូលរួមព្រឹត្តិការណ៍ដ៏សំខាន់នេះ។ មានប្រមាណ ៦០ក្រុមហ៊ុន ទាំងវិនិយោគិនក្នុងស្រុក និងវិនិយោគិនជប៉ុន បានចូលរួមក្នុងកម្មវិធីជំនួបធុរកិច្ចនេះ។ ក្រុមហ៊ុនទាំងនោះរួមមាន សហគ្រាសធុនតូច និងមធ្យម, ឧស្សាហកម្ម, អ្នកបច្ចេកទេសជួសជុល និងថែទាំយានយន្ត, សាលាកែសម្ផស្ស, បច្ចេកវិទ្យាព័ត៌មាន, អ្នកទីផ្សារ និងអ្នកផ្សព្វផ្សាយការលក់, វេជ្ជសាស្ត្រ, កសិកម្ម, អចលនទ្រព្យ, ហិរញ្ញវត្ថុ, ទេសចរណ៍ និងបដិសណ្ឋារកិច្ចជាដើម។

កម្មវិធីជំនួបធុរកិច្ចនេះ ក៏ជាវេទិកាមួយ ដើម្បីផ្លាស់ប្តូរចំណេះដឹងអំពីការគ្រប់គ្រងហិរញ្ញវត្ថុ ចំណេះដឹងបច្ចេកទេស និងការច្នៃប្រឌិតសំខាន់ៗ សម្រាប់ភាពជោគជ័យនៃអាជីវកម្ម ហើយវានឹងបើកឱកាសសម្រាប់អ្នកវិនិយោគកម្ពុជា និងជប៉ុន ណែនាំគ្នាទៅវិញទៅមក។

ប្រទេសកម្ពុជាមានភាពអំណោយផលដល់ការវិនិយោគលើគ្រប់វិស័យ ដូចជា ហេដ្ឋារចនាសម្ព័ន្ធ, សំណង់, អចលនទ្រព្យ, ធនាគារ និងហិរញ្ញវត្ថុ, បច្ចេកវិទ្យា, រោងចក្រ, និងកសិកម្ម ជាដើម។ កម្ពុជាមានធនធានមនុស្សវ័យក្មេងច្រើន ជាមួយនឹងតម្លៃពលកម្មប្រកួតប្រជែងជាមួយប្រទេសដទៃក្នុងតំបន់។ កម្លាំងពលកម្មថាមវន្ត និងវ័យក្មេង (ជាង ៦៧% នៃចំនួនប្រជាជនសរុប ដែលមានអាយុក្រោម ៣០ឆ្នាំ) ជាមួយនឹងប្រាក់ឈ្នួលប្រកួតប្រជែង (ប្រភពពី វិទ្យាស្ថានជាតិស្ថិតិ និងក្រសួងផែនការ)។

រដ្ឋាភិបាលបានរៀបចំតំបន់សេដ្ឋកិច្ចពិសេសជាច្រើន ក៏ដូចជាហេដ្ឋារចនាសម្ព័ន្ធផ្លូវថ្នល់ អគ្គិសនី ជាដើម នៅតាមទីក្រុង និងជនបទ សម្រាប់គាំទ្រការវិនិយោគ។ ជាងនេះទៅទៀត រដ្ឋាភិបាលចេញច្បាប់ជាច្រើនទាក់ទងនឹងការវិនិយោគ រួមទាំងច្បាប់វិនិយោគដែលផ្តល់ការធានាការវិនិយោគ និងការលើកទឹកចិត្តវិនិយោគ ការអនុគ្រោះ និងការលើកលែងផ្សេងៗ និងការទាមទារដល់វិនិយោគិនពីការវិនិយោគ។ ទន្ទឹមនឹងនេះ ច្បាប់មិនបានរឹតត្បិតលំហូរចេញមូលធន នៃការវិនិយោគបរទេសនៅកម្ពុជាឡើយ។

លើសពីនេះ ច្បាប់ភូមិបាលបានអនុញ្ញាតឲ្យជនបរទេស មានសិទ្ធិកាន់កាប់នៅក្នុងអគារសហកម្មសិទ្ធិឯកជន ចាប់ពីជាន់ទី១។ រដ្ឋាភិបាលក៏បានចុះហត្ថលេខា លើកិច្ចព្រមព្រៀងពាណិជ្ជកម្មសេរី RCEP (Regional Comprehensive Economic Partnership) និងកិច្ចព្រមព្រៀងពាណិជ្ជកម្មសេរីផ្សេងៗជាច្រើនទៀត ជាមួយប្រទេសជាច្រើនលើពិភពលោក។

សម្រាប់ព័ត៌មានលម្អិតអំពី ការអភិវឌ្ឍសេដ្ឋកិច្ច និងឱកាសវិនិយោគនៅកម្ពុជា សូមមើលឯកសារបទបង្ហាញដោយ បណ្ឌិត ហោ ចន្ថា សេដ្ឋវិទូនៃធនាគារ អេស៊ីលីដា ភីអិលស៊ី។

« ព័ត៌មានមុន
ធនាគារ អេស៊ីលីដា ទទួលបានចំណាត់ថ្នាក់ "B+/Stable/B" ភាពរឹងមាំ និងមានស្ថិរភាពហិរញ្ញវត្ថុរយៈពេលវែង ពី Stand & Poor's ព័ត៌មានបន្ទាប់ »
ដាក់ឱ្យប្រើប្រាស់ជាផ្លូវការនូវដំណើរការទូទាត់តាមឃ្យូអរកូតឆ្លងដែន រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម