navigate_nextព័ត៌មានnavigate_nextព័ត៌មាន​ថ្មីៗnavigate_nextក្រុមហ៊ុន NPCI International និងធនាគារ អេស៊ីលីដា ភីអិលស៊ី ចុះហត្ថលេខាលើកិច្ចព្រមព្រៀង ដើម្បីបើកដំណើរការទទួលយកការទូទាត់ឆ្លងដែនតាមរយៈ UPI និង KHQR ក្នុងប្រទេសឥណ្ឌា និងកម្ពុជា

ក្រុមហ៊ុន NPCI International និងធនាគារ អេស៊ីលីដា ភីអិលស៊ី ចុះហត្ថលេខាលើកិច្ចព្រមព្រៀង ដើម្បីបើកដំណើរការទទួលយកការទូទាត់ឆ្លងដែនតាមរយៈ UPI និង KHQR ក្នុងប្រទេសឥណ្ឌា និងកម្ពុជា

ដំណាក់កាលទី ១៖ ឥណ្ឌាស្កេន KHQR កម្ពុជា

ថ្ងៃទី៤ ខែធ្នូ ឆ្នាំ២០២៥

រាជធានីភ្នំពេញ ថ្ងៃព្រហស្បតិ៍ ១៤កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៤ ខែធ្នូ ឆ្នាំ២០២៥ នៅការិយាល័យកណ្តាល ធនាគារ អេស៊ីលីដា ភីអិលស៊ី "ធនាគារ អេស៊ីលីដា" ជាធនាគារពាណិជ្ជទីមួយ ដែលបានបោះផ្សាយមូលបត្រជាសាធារណៈនៅកម្ពុជា បានប្រកាសជាផ្លូវការនៅថ្ងៃនេះថា ធនាគារ អេស៊ីលីដា បានចុះហត្ថលេខាលើកិច្ចសហប្រតិបត្តិការ ជាមួយក្រុមហ៊ុន NPCI International Payments Limited (NIPL) ដែលជាក្រុមហ៊ុនដៃគូអន្តរជាតិរបស់សាជីវកម្មទូទាត់រូបិយបណ្ណជាតិនៃប្រទេសឥណ្ឌា (NPCI)។

ធនាគារ អេស៊ីលីដា ត្រូវបានជ្រើសរើសដោយធនាគារជាតិនៃកម្ពុជា ក្នុងការធ្វើជាធនាគារទំនាក់ទំនងសម្រាប់បណ្តាញនៃការទូទាត់តាមរយៈបាគង (KHQR) នៅក្នុងប្រទេសកម្ពុជា ដែលនឹងសហការជាមួយ NIPL ដើម្បីបើកដំណើរការទទួលយកការទូទាត់ឆ្លងដែនតាមរយៈ Unified Payments Interface (UPI) នៅទូទាំងប្រទេសកម្ពុជា និង KHQR នៅទូទាំងប្រទេសឥណ្ឌា។

ភាពជាដៃគូនេះនឹងផ្តល់ជូនអ្នកធ្វើដំណើរជនជាតិឥណ្ឌា និងកម្ពុជា នូវភាពងាយស្រួលនៃការទូទាត់តាមឃ្យូអរកូត យ៉ាងរហ័សទាន់ចិត្ត និងមានសុវត្ថិភាព នៅតាមតំបន់ទេសចរណ៍ ភោជនីយដ្ឋាន ហាងលក់ទំនិញ និងបណ្តាអាជីវកម្មផ្សេងៗទៀត។ ភ្ញៀវទេសចរដែលជាជនជាតិឥណ្ឌានៅកម្ពុជា អាចប្រើប្រាស់កម្មវិធី UPI ដើម្បីធ្វើការទូទាត់ថ្លៃទំនិញ និងសេវាកម្មផ្សេងៗ បានយ៉ាងងាយស្រួលនៅតាមទីតាំងរបស់អាជីវករចំនួនជាង ៤.៥ លាន នៅប្រទេសកម្ពុជា។ ជាមួយគ្នានេះដែរ ភ្ញៀវទេសចរកម្ពុជានៅប្រទេសឥណ្ឌា នឹងអាចស្កេន UPI QRs ចំនួនជាង ៧០៩ លាន ដើម្បីធ្វើការទូទាត់ថ្លៃទំនិញ និងសេវាកម្មផ្សេងៗ យ៉ាងងាយស្រួលដោយប្រើកម្មវិធីទូទាត់ប្រាក់ Bakong (KHQR) របស់កម្ពុជា។

កិច្ចសហការនេះនឹងគាំទ្រដល់ធុរកិច្ចក្នុងប្រទេសទាំងពីរដោយផ្តល់ជូននូវបទពិសោធន៍ទូទាត់ប្រកបដោយសុវត្ថិភាព ការទូទាត់តាមអន្តរប្រតិបត្តិការ និងមានប្រសិទ្ធភាព តាមរយៈ UPI និង KHQR ដែលជួយបង្កើនភាពងាយស្រួលសម្រាប់អ្នកប្រើប្រាស់នៅក្នុងទីផ្សារនៃប្រទេសទាំងពីរ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា "ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយក្នុងការចុះហត្ថលេខាលើកិច្ចព្រមព្រៀងសេវាកម្មទូទាត់ឆ្លងដែន ជាមួយក្រុមហ៊ុន NPCI International Payments Limited។ កិច្ចព្រមព្រៀងសេវាកម្មនេះ នឹងអនុវត្តតាមលក្ខខណ្ឌជាផ្លូវការតាមលក្ខណៈបច្ចេកទេស និងការភ្ជាប់ប្រព័ន្ធប្រតិបត្តិការតាមរយៈបណ្តាញ UPI របស់ក្រុមហ៊ុន NPCI ជាមួយប្រព័ន្ធអេកូឡូស៊ី KHQR របស់ធនាគារ អេស៊ីលីដា។ ការបង្កើតបណ្តាញប្រតិបត្តិការនេះធានានូវការទូទាត់ដែលមានសុវត្ថិភាព និងអាចធ្វើអន្តរកម្មទូទាត់បានយ៉ាងងាយស្រួល ដែលអនុញ្ញាតឱ្យអ្នកប្រើប្រាស់ និងអតិថិជនឥណ្ឌា ប្រើប្រាស់ទូរស័ព្ទចល័តដើម្បីស្កេនឃ្យូអរកូតសម្រាប់ទូទាត់ទិញទំនិញនិងសេវាកម្ម របស់ពាណិជ្ជករកម្ពុជា។

បន្ថែមពីនេះ កិច្ចសហប្រតិបត្តិការនេះតំណាងឱ្យជំហានដ៏សំខាន់មួយ ឆ្ពោះទៅរកអន្តរប្រតិបត្តិការនៃការទូទាត់ក្នុងតំបន់ ស្របតាមចក្ខុវិស័យរបស់អាស៊ានក្នុងការជំរុញបរិយាបន្នសេដ្ឋកិច្ចឌីជីថល និងនវានុវត្តន៍ហិរញ្ញវត្ថុតាមរយៈប្រព័ន្ធ QR ក្នុងការទូទាត់ប្រាក់តាមប្រព័ន្ធឌីជីថល ដោយផ្តល់នូវមធ្យោបាយដល់អតិថិជនរបស់យើងខ្ញុំ ជាមួយនឹងជម្រើសការទូទាត់ឆ្លងដែន ល្បឿនរហ័ស និងមានសុវត្ថិភាព ដែលជំរុញពាណិជ្ជកម្ម និងទេសចរណ៍រវាងប្រទេសទាំងពីរ។

ក្រោមកិច្ចផ្តួចផ្តើម និងដឹកនាំរបស់លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ប្រទេសកម្ពុជា និងឥណ្ឌា បានផ្តួចផ្តើមបង្កើតការទូទាត់តាមប្រព័ន្ធឌីជីថលឆ្លងដែនរវាងប្រទេសទាំងពីរ ដើម្បីលើកកម្ពស់ប្រតិបត្តិការទូទាត់ និងផ្ទេរប្រាក់ឱ្យកាន់តែមានភាពងាយស្រួល និងមានប្រសិទ្ធភាព ជាពិសេសលើកកម្ពស់ការប្រើប្រាស់រូបិយបណ្ណជាតិរវាងកម្ពុជា និងឥណ្ឌា។ កាលពីខែមីនា ឆ្នាំ២០២៣ ធនាគារជាតិ នៃ កម្ពុជា និង NIPL បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការ ដើម្បីបើកដំណើរការឱ្យមានការទូទាត់ប្រាក់ឆ្លងដែនរវាងកម្ពុជា និងឥណ្ឌា។

ជាមួយគ្នានេះដែរ នៅខែឧសភា ឆ្នាំ២០២៣ ធនាគារ អេស៊ីលីដា ត្រូវបានជ្រើសរើសជាធនាគារទំនាក់ទំនង (Sponsoring Bank) ជាមួយ NPCI International Payment Limited (NIPL) សម្រាប់ការទូទាត់ និងការផ្ទេរប្រាក់ឆ្លងដែន។ បន្ទាប់ពីការចុះហត្ថលេខាលើកិច្ចព្រមព្រៀងនេះ ធនាគារ អេស៊ីលីដា និង NIPL នឹងសហការគ្នាលើការអភិវឌ្ឍប្រព័ន្ធទូទាត់ឃ្យូអរ។ បច្ចុប្បន្ន ធនាគារ អេស៊ីលីដា និង NIPL បាននឹងកំពុងសហការគ្នាអភិវឌ្ឍសមាហរណកម្មប្រព័ន្ធទូទាត់ឆ្លងដែន។ ហើយគម្រោងនេះផងដែរ នឹងគ្រោងដាក់ឱ្យដំណើរការការទូទាត់ឆ្លងដែនតាម QR រវាងប្រទេសកម្ពុជា និងឥណ្ឌា (ឥណ្ឌា QR UPI ស្កេន KHQR) នៅក្នុងឆមាសទី ២ នៃឆ្នាំ២០២៦។

នាពេលអនាគត ធនាគារ អេស៊ីលីដា និង NPCI International Payment Limited (NIPL) នឹងសហការជាមួយធនាគារដៃគូបន្ថែមទៀត ដើម្បីរួមបញ្ចូលប្រព័ន្ធទូទាត់ឃ្យូអរ ដែលអាចឱ្យអតិថិជនទទួលបានការទូទាត់ឆ្លងដែនរវាងប្រទេសកម្ពុជា និងឥណ្ឌា។ កិច្ចសហប្រតិបត្តិការនេះតំណាងឱ្យភាពជោគជ័យដ៏សំខាន់មួយនៅក្នុងការពង្រីកវិសាលភាពជាសកល ក្រៅពីតំបន់អាស៊ាន ដោយបន្ថែមប្រតិបត្តិការទូទាត់ឆ្លងដែនទៅកាន់ប្រទេសជប៉ុន កូរ៉េខាងត្បូង ចិន និងប្រទេសដទៃទៀត ដោយពង្រឹងទីតាំងរបស់ខ្លួននៅក្នុងប្រព័ន្ធអេកូនៃការទូទាត់តាមឌីជីថលអន្តរជាតិ ដោយសម្របសម្រួលប្រតិបត្តិការកាន់តែមានភាពរលូន រហ័ស និងមានប្រសិទ្ធភាពជាងមុនសម្រាប់អ្នកធ្វើដំណើរ ដោយហេតុនេះជំរុញការតភ្ជាប់កាន់តែជិតស្និទ្ធរវាងប្រទេសឥណ្ឌា និងកម្ពុជា ដើម្បីឈានទៅរកបណ្តាញទូទាត់សកលដែលអាចធ្វើអន្តរកម្មបានពេញលេញ។"

លោក Ritesh Shukla, នាយកប្រតិបត្តិ ក្រុមហ៊ុន NPCI International បានមានប្រសាសន៍ថា "ភាពជាដៃគូរបស់យើងជាមួយធនាគារ អេស៊ីលីដា ភីអិលស៊ី គឺជាជំហានដ៏សំខាន់មួយក្នុងការពង្រឹងច្រករបៀងទូទាត់ឌីជីថលអន្តរប្រតិបត្តិការរវាងប្រទេសឥណ្ឌា និងកម្ពុជា។ តាមរយៈការបើកដំណើរការឱ្យមានការទទួលយកការទូទាត់តាមរយៈ UPI និង KHQR នៅក្នុងប្រទេសទាំងពីរ គឺមានគោលបំណងជំរុញឱ្យការធ្វើដំណើររបស់ភ្ញៀវទេសចរណ៍នៃប្រទេសទាំងពីរកាន់តែមានភាពងាយស្រួល និងផ្តល់ឱ្យអតិថិជននូវជម្រើសនៃការទូទាត់យ៉ាងសំបូរបែប និងប្រកបដោយទំនុកចិត្តខ្ពស់។ កិច្ចសហការនេះឆ្លុះបញ្ចាំងពីការប្តេជ្ញាចិត្តក្នុងការពង្រីកការទូទាត់ប្រាក់តាមបែបឌីជីថលប្រកបដោយសុវត្ថិភាព បរិយាបន្ន និងវិសាលភាពក្នុងការទូទាត់ឌីជីថលនៅក្នុងកម្រិតសកល។"

អំពីធនាគារ អេស៊ីលីដា ភីអិលស៊ី

ធនាគារ អេស៊ីលីដា មានសាខាបុត្រសម្ព័ន្ធចំនួន ៤ គឺ សាកលវិទ្យាល័យ ពាណិជ្ជសាស្ត្រ អេស៊ីលីដា ឯ.ក, ក្រុមហ៊ុនមូលបត្រ អេស៊ីលីដា ម.ក, ធនាគារ អេស៊ីលីដា ឡាវ លីមីតធីត និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំងការិយាល័យតំណាងនៅមីយ៉ាន់ម៉ា។ គិតត្រឹមដំណាច់ខែកញ្ញា ឆ្នាំ២០២៥ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១១,៩៤ ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៩,២៨ ប៊ីលានដុល្លារអាមេរិក និងមានអតិថិជនប្រមាណជាង ៦,១៨ លាននាក់។ បច្ចុប្បន្ន ធនាគារ អេស៊ីលីដា មានដៃគូអាជីវកម្ម សរុបច្រើនជាង ០,៧០លានដៃគូ និងមានអ្នកប្រើប្រាស់អេស៊ីលីដាស៊ូភើអេប សរុបចំនួនជាង ៥,៣៥លាននាក់។

អំពី NPCI International Payments Limited

NPCI International Payments Limited (NIPL) ត្រូវបានបង្កើតឡើងនាថ្ងៃទី៣ ខែមេសា ឆ្នាំ២០២០ ជាក្រុមហ៊ុនបុត្រសម្ព័ន្ធរបស់សាជីវកម្មទូទាត់រូបិយបណ្ណជាតិនៃប្រទេសឥណ្ឌា (NPCI)។ ក្នុងនាមជាដៃគូរបស់ NPCI អន្តរជាតិ NIPL មានការប្តេជ្ញាក្នុងការដាក់ពង្រីកបណ្តាញប្រព័ន្ធទូទាត់របស់ NPCI - Unified Payments Interface (UPI) និងគម្រោងបណ្ណ (RuPay) នៅខាងក្រៅប្រទេសឥណ្ឌា។ NPCI បានអភិវឌ្ឍប្រកបដោយភាពជោគជ័យ និងបង្ហាញនូវផលិតផល ព្រមទាំងប្រព័ន្ធបច្ចេកវិទ្យានៅក្នុងទីផ្សារក្នុងស្រុក ដោយផ្លាស់ប្តូរប្រព័ន្ធទូទាត់នៅក្នុងប្រទេសឥណ្ឌា។ បច្ចុប្បន្ននេះ មានប្រទេសមួយចំនួនដែលកំពុងស្វែងរកការបង្កើតប្រព័ន្ធទូទាត់ជាក់ស្តែង ឬគម្រោងបណ្ណក្នុងស្រុក។

NIPL ជាមួយនឹងចំណេះដឹង និងបទពិសោធន៍ប្រកបដោយភាពនវានុវត្តន៍ អាចផ្តល់ជំនួយបច្ចេកវិទ្យាដល់ប្រទេសទាំងនោះ តាមរយៈការផ្តល់អាជ្ញាប័ណ្ណ និងការប្រឹក្សាសម្រាប់ការបង្កើតប្រព័ន្ធទូទាត់តាមពេលវេលាជាក់ស្តែង ដើម្បីបំពេញតាមតម្រូវការដែលកំពុងរីកចម្រើនយ៉ាងឆាប់រហ័សនៃអាជីវកម្មសកល។ NIPL ផ្តោតសំខាន់លើការផ្លាស់ប្តូរប្រព័ន្ធទូទាត់នៅទូទាំងពិភពលោកតាមរយៈបច្ចេកវិទ្យា និងនវានុវត្តន៍។ ការណ៍នេះ មិនត្រឹមតែបើកដំណើរការសម្រាប់ការទូទាត់ប្រាក់របស់ប្រជាជនឥណ្ឌាប៉ុណ្ណោះទេ ប៉ុន្តែថែមទាំងជួយដល់ប្រទេសដទៃទៀតតាមរយៈការបង្កើនសមត្ថភាពទូទាត់ដោយប្រើប្រាស់ជំនួយបច្ចេកវិទ្យា ការប្រឹក្សា និងហេដ្ឋារចនាសម្ព័ន្ធ។ សម្រាប់ព័ត៌មានបន្ថែមសូមចូលទៅកាន់គេហទំព័រ www.nipl.com

close

ចែករលែក​ព័ត៌មាន​នេះ​នៅ​លើ ៖

Facebook
LinkedIn
Twitter
Telegram
Line