ស្នេហា

- បទពាក្យ៧ -

១-	កូនស្នេហ៍ចម្បងគឺពុកម៉ែ	កតញ្ញូថែអ្នកមានគុណ
	ត្រងត្រាប់រៀនសូត្រទុកជាទុន	គ្រូដើមគេមុនគឺមេបា ។

២-	ស្នេហ៍ដូនស្នេហ៍តាស្នេហ៍ផៅពង្ស	ស្នេហ៍ពិតទ្រទ្រង់ស្ទួយញាតិសា
	កេរ្តិ៍គាប់ត្រកូលរួមរក្សា	ប្រឹងសាងអាត្មាឱ្យខ្ពង់ខ្ពស់ ។

៣-	ស្នេហ៍យុវវ័យមិត្តស្រីប្រុស	ស្នេហ៍ត្រូវមិនខុសស្នេហ៍មានយស
	ស្នេហាបាបមិត្ត^(១)ខូចកេរ្តិ៍ឈ្មោះ	ចង់បានខ្ពង់ខ្ពស់ស្នេហ៍មិត្តល្អ ។

៤-	ស្នេហ៍មានវិន័យថ្លៃមេបា	ចូលស្តីរៀបការកូនបវរ
	គោរពទំនៀមដោយស្មោះសរ	ឈ្មោះថាកូនល្អពិតស្នេហា ។

៥-	ស្នេហ៍ល្បួងលួងលោមប្រលោមស្និទ្ធ	ឆបោកកៀកកិតដោយតណ្ហា
	បំពានទំនៀមច្បាប់ខេមរា	ខុសច្បាប់មាត្រាស្នេហ៍មិនពិត ។

៦-	ស្នេហ៍ស្និទ្ធពិតស្មោះមានមង្គល	ស្នេហ៍ល្មើសអំពល់ខ្វល់គំនិត
	ប្រសិនសាងស្នេហ៍សូមស្នេហ៍ពិត	មុនស្នេហ៍សូមគិតដល់មេបា ។

^(១) បាបមិត្ត (អានថា) : បាប-ប៉ាក់មិត្ត