បណ្តាំពុកម៉ែ

- បទពាក្យ៧ -

*	កុំខ្ជិលនាំក្រណាស្ងួនភ្ងា	កុំធ្វើខ្ជីខ្ជានាំអសោច
	ប្រសិនខ្ជះខ្ជាយនាំហិនហោច	ដាច់ដោចខ្លោចផ្សាណាចរណៃ ។

*	ប្រហែសប្រហោងតោងប្រយ័ត្ន	ប្រហែសបង់បាត់ផលកម្រៃ
	ប្រហែសច្រើនដងនាំក្សិណក្ស័យ	ហិនហោចចង្រៃមិនស្រាកស្រាន្ត ។

*	វិជ្ជាជាទ្រព្យជាប់អាត្មា	ចោរចង់ប្រាថ្នាក៏មិនបាន
	វិជ្ជាជួយឱ្យរស់ក្សេមក្សាន្ត	ជីវិតចរថ្កានថ្កើងកិត្តិយស ។

*	ប្រសិនមិនចេះត្រូវប្រឹងរៀន	ចង់ធ្វើអ្នកមានធំខ្ពង់ខ្ពស់
	ព្យាយាមរៀនសូត្រសាងកេរ្តិ៍ឈ្មោះ	ឧស្សាហ៍សាបព្រោះសាងកុសល ។

*	ទាន់ខ្លួននៅក្មេងក្រេបចំណេះ	កូនកុំប្រហែសនាំវិកល
	ប្រហែសបាត់បង់អំណោយផល	ខូចខាតខ្វាយខ្វល់នាំស្តាយក្រោយ ។

ពុកម៉ែជាព្រះនៃកូនចៅ លោកប្រៀនប្រដៅឲ្យកូនល្អ នាំគ្នាប្រណិប័តន៍បានបវរ សាងផលស្មោះសរតរុងរឿង ។