លទ្ធផលសេពគប់មិត្ត

- បទពាក្យ៧ -

១-	សេពគប់មិត្តល្អពិតថ្លៃថ្លា	គាប់កាយវិការពាក្យមានន័យ
	ល្អទាំងដួងចិត្តឈ្មោះប្រពៃ	ល្អិតល្អតាមវ័យពិតជាល្អ ។

២-	មិត្តល្អរែងជួយគ្រាអាសន្ន	ជ្រោមជ្រែងបែរបន់ឱ្យបវរ
	តោងតាមតាក់តែងមិត្តបន្ត	ស្នេហ៍ស្និទ្ធស្មោះសរកុសលស្នង ។

៣-	បាបមិត្តទ្រុស្តសីលចិត្តមិនល្អ	កាយកាចបង្កពិសពុលផង
	ពោលពាក្យមុសាល្បិចសាសង	បាបកម្មកន្លងទោសតែងតោង ។

៤-	បាបមិត្តគិតគូរគៃលបលួច	ម្ចាស់ទ្រព្យគិតស្តួចឆ្លោះប្រហោង
	ប្រហែសបាត់ទ្រព្យចាស់ថ្មីថ្មោង	ពាលពើតែងតោងល្បែងល្បិចកល ។

៥-	ឆបោកកេងកិបគិតកែច្នៃ	លួចបានយល់ថ្លៃកម្រៃផល
	បាបមិត្តសន្សំអកុសល	ទោសទណ្ឌបានផ្ដល់សល់ទុក្ខា ។

៦-	សេពគប់បាបមិត្តពិតមិនល្អ	វិបត្តិបន្តរស់ខ្លោចផ្សា
	រស់គ្មានមង្គលដូចមរណា	គួរគិតពិចារណ៍ការសេពគប់ ។